Çfarë thotë Bibla për abortin?

Përgjigjja e Biblës

Bibla nuk e përmend abortin në kontekstin e ndërprerjes së qëllimshme të shtatzënisë. Gjithsesi, ajo ka plot shkrime që na tregojnë pikëpamjen e Perëndisë për jetën e njeriut, ku përfshihet edhe jeta e një foshnje të palindur.

Jeta është dhuratë nga Perëndia. (Zanafilla 9:6; Psalmi 36:9) Për Të, çdo jetë është e çmuar; edhe jeta e fëmijës së palindur. Prandaj t’i japësh fund jetës së një fëmije të palindur, është e barabartë me vrasjen.

Ligji që u dha Zoti izraelitëve, thoshte: «Në rast se disa burra zihen me njëri-tjetrin dhe godasin një grua shtatzënë, dhe asaj i del fëmija jashtë, por nuk ndodh asnjë aksident vdekjeprurës, fajtori do të paguajë patjetër dëmin që do t’i kërkojë burri i saj. Ai do të paguajë si të vendosin gjykatësit. Por nëse ndodh ndonjë aksident vdekjeprurës, do ta paguajë shpirt për shpirt.»—Dalja 21:22, 23.a

• Kur fillon jeta e njeriut?

• A do ta falë Perëndia dikë që ka kryer abort?

• A është e gabuar të abortosh nëse rrezikohet jeta e nënës ose e fëmijës?

Kur fillon jeta e njeriut?

Për Perëndinë, jeta fillon në momentin e ngjizjes. Në Fjalën e tij, në Bibël, Ai i konsideron foshnjat e palindura si persona. Le të shikojmë disa shembuj që tregojnë se për Perëndinë jeta e një foshnje të palindur është njësoj si jeta e një të porsalinduri.

• Nën frymëzim hyjnor, mbreti David iu lut Perëndisë: «Sytë e tu panë embrionin tim.» (Psalmi 139:16) Pra, për Zotin, jeta e Davidit kishte filluar që para se lindte.

• Edhe për profetin Jeremia Perëndia kishte një qëllim të veçantë kohë para se të lindte. Ai i tha Jeremisë: «Që para se të të formoja në bark të nënës, të njihja, dhe që para se të dilje nga barku, të shenjtërova. Unë të bëra profet të kombeve.»—Jeremia 1:5.

• Luka, mjek dhe shkrimtar i Biblës, përdori të njëjtën fjalë greke kur foli për një fëmijë të palindur dhe për një të sapolindur.—Luka 1:41; 2:12, 16.

A do ta falë Perëndia dikë që ka kryer abort?

Perëndia mund t’i falë gratë që kanë abortuar. Nëse e pranojnë pikëpamjen e Tij për jetën, s’ka pse t’i kaplojnë ndjenjat e fajit. «Jehovai është i mëshirshëm dhe hirmadh. . . . Sa larg është lindja nga perëndimi, aq larg nga ne i ka vënë shkeljet tona.»b (Psalmi 103:8-12) Jehovai do t’i falë të gjithë ata që pendohen sinqerisht për mëkatet e së kaluarës, ku përfshihet edhe aborti.—Psalmi 86:5.

A është e gabuar të abortosh nëse rrezikohet jeta e nënës ose e fëmijës?

Duke pasur parasysh pikëpamjen e Biblës për jetën e një fëmije të palindur, aborti është i pajustifikueshëm edhe nëse rrezikohet jeta e nënës ose e fëmijës.

Ç’të themi për rastet e rralla kur gjatë lindjes ka komplikacione dhe duhet zgjedhur midis jetës së nënës dhe të fëmijës? Në këtë situatë, çifti duhet të vendosë cilën jetë do të shpëtojë.