TË RINJTË PYESIN
Pse duhet të lutem?
Sipas një ankete, 80 për qind e adoleshentëve në Amerikë luten, por vetëm gjysma e tyre lutet çdo ditë. Sigurisht, disa pyesin veten: «Lutja është thjesht lehtësim psikologjik apo diçka më tepër?»
Çfarë është lutja?
Lutja është komunikim i vërtetë me Krijuesin e gjithçkaje. Mendo pak se ç’do të thotë kjo! Jehovai është më lart se njerëzimi në çdo aspekt, prapëseprapë «ai nuk është larg nga secili prej nesh». (Veprat 17:27) Në fakt, Bibla bën këtë ftesë të mrekullueshme: «Afrojuni Perëndisë dhe ai do t’ju afrohet.»—Jakovi 4:8.
Si mund t’i afrohesh Perëndisë?
Me anë të lutjes, që është mënyra si flet ti me Perëndinë.
Me anë të studimit të Biblës, që është mënyra si «flet» Perëndia me ty.
Ky komunikim reciprok—lutja dhe studimi i Biblës—do të të ndihmojë të ndërtosh një miqësi të fortë me Zotin.
«Komunikimi me Jehovain, me Më të Lartin, është ndër privilegjet më të mëdha të njeriut.»—Xheremi.
«Kur i shpreh Jehovait në lutje ndjenjat më të thella, ndihem më afër tij.»—Miranda.
A i dëgjon Zoti lutjet?
Edhe nëse beson te Zoti, madje, edhe nëse i lutesh atij, mbase e ke të vështirë ta pranosh se të dëgjon vërtet. Gjithsesi, Bibla thotë se Jehovai është «Dëgjues i lutjes». (Psalmi 65:2) Madje, ajo të fton ‘të hedhësh gjithë ankthin tënd mbi të’. Pse? «Sepse interesohet për ty.»—1 Pjetrit 5:7.
Për të menduar: A gjen kohë për të folur rregullisht me miqtë e ngushtë? Mund të veprosh njësoj me Perëndinë. Lutju rregullisht duke iu drejtuar me emër, Jehova. (Psalmi 86:5-7; 88:9) Në fakt, Bibla të fton ‘të lutesh pa pushim’.—1 Selanikasve 5:17.
«Lutja është një bisedë mes meje dhe Atit tim qiellor, ku i zbraz zemrën.»—Moisiu.
«Kur flas me Jehovain, i hapem plotësisht, tamam siç do të flisja me mamin a me një shoqe shumë të ngushtë.»—Kerëni.
Për çfarë të lutem?
Bibla thotë: «Për çdo gjë, bëjani të njohura Perëndisë kërkesat tuaja me lutje, përgjërime dhe falënderime.»—Filipianëve 4:6.
A do të thotë kjo se mund të lutemi edhe për problemet? Po! Faktikisht, në Bibël thuhet: «Hidhja barrën tënde Jehovait, dhe ai vetë do të të mbështetë.»—Psalmi 55:22.
Sigurisht nuk duhet t’i lutesh Zotit vetëm kur ke probleme. Një e re me emrin Shantela, thotë: «Vështirë të quhet vërtet miqësi e mirë nëse i lutem Jehovait vetëm kur kam nevojë për ndihmë. Mendoj se në fillim duhet ta falënderoj, dhe lista për këtë është goxha e gjatë.»
Për të menduar: Për çfarë gjërash i je mirënjohës? A mund të mendosh tri gjëra për të cilat ta falënderosh Jehovain çdo ditë?
«Edhe një gjë e thjeshtë, si soditja e një luleje të bukur, mund të të nxitë ta falënderosh Jehovain.»—Anita.
«Medito për diçka që të mahnit nga krijimi ose për ndonjë varg biblik që të prek vërtet, pastaj falëndero Jehovain për këtë.»—Brajani.