Veganizmi—Çfarë thotë Bibla?

Kudo në botë ka një interes të madh për veganizmin.

• «Veganizmi është një filozofi dhe një mënyrë jetese që përpiqet të përjashtojë—për aq sa është e mundur dhe praktike—çdo formë shfrytëzimi dhe mizorie ndaj kafshëve për ushqim, veshje a diçka tjetër.»—The Vegan Society.

Përveç merakut për kafshët, disa bëhen veganë për të përmirësuar mjedisin ose për arsye shëndetësore a fetare.

• «Ndryshe nga shumica e zgjedhjeve në të ushqyer, veganizmi më shpesh shihet si një koncept filozofik, një zgjedhje etike dhe një formë aktivizmi individual që synon të ketë efekt global.»—Britannica Academic.

A është veganizmi zgjidhja për një botë më të mirë? Çfarë thotë Bibla?

Pikëpamja e Krijuesit për njerëzit dhe kafshët

Bibla tregon se Krijuesi, Perëndia Jehova,a i konsideron njerëzit superiorë ndaj kafshëve dhe se u ka dhënë pushtet mbi to. (Zanafilla 1:27, 28) Më vonë Perëndia lejoi që njerëzit të përdornin kafshët për ushqim. (Zanafilla 9:3) Gjithsesi nuk e justifikon në asnjë mënyrë keqtrajtimin ndaj kafshëve.—Proverbat 12:10.

Sipas Biblës, zgjedhim të hamë mish apo jo, është një vendim personal.b Vendimi që marrim, nuk na bën njerëz më të mirë në sy të Perëndisë. (1 Korintasve 8:8) Asnjëri prej nesh nuk duhet të kritikojë vendimet e të tjerëve për zgjedhjet në të ngrënë.—Romakëve 14:3.

Zgjidhja për një botë më të mirë

Bibla tregon se mënyra si zgjedhim ta jetojmë jetën, nuk i ndreq problemet që hasim sot. Shumë probleme i kanë rrënjët te sistemi politik, social dhe ekonomik i kësaj bote, të cilat asnjëri prej nesh nuk mund t’i zgjidhë. Bibla thotë:

• «Ajo që është e shtrembër, s’mund të drejtohet.»—Eklisiastiu 1:15.

Krijuesi ynë do t’i zgjidhë problemet që kemi sot. Bibla përdor një gjuhë të figurshme për të përshkruar çfarë do të bëjë Zoti.

• «Pashë një qiell të ri dhe një tokë të re, sepse qielli i mëparshëm dhe toka e mëparshme kishin kaluar dhe deti nuk ishte më.»—Zbulesa 21:1.

Perëndia do t’i zëvendësojë qeveritë njerëzore ose ‘qiellin e mëparshëm’ me «një qiell të ri», një qeveri qiellore që quhet Mbretëria e Perëndisë. Kjo Mbretëri do të eliminojë ‘tokën e mëparshme’, pra ata që janë të ligj, dhe do të qeverisë mbi «një tokë të re» ose mbi ata që janë të gatshëm t’i nënshtrohen autoritetit të tij.

Vetëm nën Mbretërinë e Tij njerëzit do të mësojnë si të jetojnë në harmoni të përsosur me kafshët dhe mjedisin.—Isaia 11:6-9.