Zyrtarë të lartë të shëndetësisë paralajmërojnë për ndikimin negativ të medias sociale te të rinjtë—Çfarë thotë Bibla?

Më 23 maj 2023, zyrtarë të lartë të shëndetësisë në Shtetet e Bashkuara paralajmëruan publikun se media sociale po ndikon për keq te shumë të rinj.

• «Mbase disa fëmijë e adoleshentë po nxjerrin dobi nga media sociale, ama ka shumë tregues se media sociale mund të shkaktojë edhe dëme të mëdha te shëndeti mendor dhe fizik i fëmijëve dhe i adoleshentëve.»—Social Media and Youth Mental Health: The U.S. Surgeon General’s Advisory, 2023.

Ky raport përmendte disa studime që shpjegojnë pse duhet të shqetësohemi.

• Adoleshentët e moshës 12-15 vjeç, «të cilët kalonin më shumë se 3 orë në ditë në mediat sociale, rrezikonin dyfish të kishin probleme me shëndetin mendor, madje edhe simptoma depresioni e ankthi».

• 14-vjeçarët «që i përdornin më shumë mediat sociale, shpesh nuk flinin mirë, i bullizonin në internet, ndiheshin keq për pamjen, ndiheshin të pavlerë dhe shfaqnin më shumë simptoma depresioni. Kjo ishte më e zakonshme për vajzat se për djemtë».

Si mund t’i mbrojnë prindërit fëmijët nga këto rreziqe? Bibla ofron këshilla praktike.

Ç’mund të bëjnë prindërit

Përfshihuni edhe ju. Si prindër, shqyrtoni rreziqet e mediave sociale dhe vendosni nëse fëmija juaj duhet t’i përdorë apo jo.

• Parim nga Bibla: «Stërvite fëmijën në udhën që duhet të ndjekë.»—Proverbat 22:6, shënimi.

• Që të mësoni më shumë, lexoni artikullin «A duhet ta përdorë fëmija im median sociale?»

Nëse e lejoni fëmijën ta përdorë median sociale, jini gjithë sy e veshë ndaj rreziqeve të mundshme dhe përfshihuni në aktivitetet e fëmijës në internet. Si ta bëni këtë?

Mbroni fëmijën nga përmbajtjet e dëmshme. Stërviteni fëmijën që të identifikojë dhe të shmangë përmbajtjet e dëmshme.

• Parim nga Bibla: «Imoraliteti seksual e çdo lloj ndyrësie a lakmie as të mos përmenden ndër ju, . . . as sjellja e turpshme, as të folurit pa mend, as shakatë e ndyra.»—Efesianëve 5:3, 4.

• Për sugjerime praktike, lexoni artikullin «Mësoje fëmijën ta përdorë në mënyrë të sigurt median sociale».

Vendosni limite. Për shembull, vini rregulla se kur dhe për sa kohë mund ta përdorë fëmija median sociale.

• Parim nga Bibla: «Bëni shumë kujdes, pra, që të . . . ecni . . . si të mençurit, duke e shfrytëzuar sa më mirë kohën.»—Efesianëve 5:15, 16.

• Përdorni videon me skicime Rrjetet sociale: Tregohu i zgjuar, që ta ndihmoni fëmijën të kuptojë pse kufizimet janë të domosdoshme.