Si të mprehim aftësitë në shërbim?—Të jemi shokë shërbimi të dobishëm

Pse ka rëndësi? Jezui e kuptonte sa i çmuar ishte një shok shërbimi gjatë predikimit. Prandaj, kur dërgoi përpara 70 dishepujt që të predikonin, i ndau dy e nga dy. (Luka 10:1) Një shok shërbimi mund t’i japë ndihmën që i duhet lajmëtarit tjetër, kur ky has një situatë të vështirë ose kur nuk është i sigurt si t’i përgjigjet të zotit të shtëpisë. (Ekl. 4:9, 10) Mund të japë nga përvoja e tij dhe ndonjëherë të ofrojë ndonjë sugjerim që mund ta ndihmojë lajmëtarin tjetër të jetë më i efektshëm në shërbim. (Prov. 27:17) Gjithashtu, mund ta inkurajojë me anë të bisedave ndërtuese ndërsa shkojnë nga njëra shtëpi te tjetra.—Filip. 4:8.

Si ta zbatosh?

Ji i vëmendshëm kur shoku i shërbimit jep dëshmi. (Jak. 1:19) Ndiq në Biblën tënde kur lexohet një shkrim. Kështu do të jesh më i përgatitur për ta ndihmuar nëse lind nevoja.
Përdor gjykim të mirë që të përcaktosh nëse duhet të hysh në bisedë dhe kur ta bësh këtë. (Prov. 25:11) Nëse shoqëron një lajmëtar tjetër në një studim biblik, ka të ngjarë që komentet e tua tek e tuk të vlerësohen. Gjithsesi, kur predikoni shtëpi më shtëpi, ndoshta shoku i shërbimit parapëlqen ta lejosh që ta drejtojë ai bisedën, kur ka radhën për të folur. Sigurisht, nëse është lajmëtar i ri ose nuk është i sigurt si t’i përgjigjet një pyetjeje ose një kundërshtimi, ka shumë mundësi ta vlerësojë ndihmën tënde. Por, nëse shoqëron një lajmëtar në shërbimin shtëpi më shtëpi, në një rivizitë ose në një studim, mos e ndërprit, mos e merr në dorë bisedën dhe mos hap ndonjë temë tjetër.
Jep nga përvoja jote. Nëse, me raste, ke ndonjë sugjerim për t’i dhënë një lajmëtari që ta ndihmosh të bëhet më i aftë në shërbim, mos ngurro. (Prov. 3:27) Në një moment të përshtatshëm, mund të thuash: «Si mendon, si shkoi biseda?» ose «A mund të të jap një sugjerim?» ose «Unë përpiqem të bëj kështu . . . » Ki parasysh që, ndonëse të tjerët do ta vlerësonin ndonjë sugjerim tek e tuk, do të shkurajoheshin nëse u vihet në dukje çdo gabim.

Gjatë muajit provo këtë:

Në fund të shërbimit, thuaji shokut të shërbimit si të ka ndihmuar me fjalët dhe veprimet e tij gjatë predikimit.