Pse Perëndia na fton t’i lutemi?

Perëndia na fton të bëhemi miq me të

Miqtë komunikojnë që të kenë një marrëdhënie gjithnjë e më të mirë. Po kështu, Zoti na fton t’i flasim e të hapim rrugën për një miqësi të ngrohtë me të. Ai thotë: «Ju do të më thërritni, do të vini e do të më luteni, e unë do t’ju dëgjoj.» (Jeremia 29:12) Ndërsa i shprehesh Zotit, ‘do t’i afrohesh atij dhe ai do të të afrohet’. (Jakovi 4:8) Bibla na siguron: «Jehovai u rri pranë tërë atyre që e thërrasin.» (Psalmi 145:18) Sa më shumë t’i lutemi Perëndisë, aq më e ngushtë do të bëhet miqësia me të.

Perëndia dëshiron të të ndihmojë

Jezui tha: «Kush nga ju, kur i biri t’i kërkojë bukë, do t’i japë një gur? Apo nëse i kërkon një peshk, mos do t’i japë një gjarpër? Prandaj, nëse ju . . . dini t’u jepni fëmijëve tuaj dhurata të mira, aq më shumë Ati juaj që është në qiej, do t’u japë gjëra të mira atyre që ia kërkojnë!» (Mateu 7:9-11) Po, Perëndia të fton t’i lutesh sepse ‘interesohet për ty’ dhe dëshiron të të ndihmojë. (1 Pjetrit 5:7) Madje të fton t’i flasësh për problemet e tua. Bibla na tregon: «Mos jini në ankth për asgjë, por për çdo gjë, bëjani të njohura Perëndisë kërkesat tuaja me lutje, përgjërime dhe falënderime.»—Filipianëve 4:6.

Njerëzit kanë nevojë të mësojnë për Perëndinë

Ekspertët e natyrës njerëzore kanë vërejtur se qindra milionë njerëz ndiejnë nevojën për t’u lutur. Madje këtë nevojë e kanë edhe disa ateistë e agnosticistë.a Kjo vërteton faktin që njerëzit u krijuan me nevojën për të mësuar për Perëndinë. Jezui tha: «Lum ata që janë të vetëdijshëm se kanë nevojë të mësojnë për Perëndinë.» (Mateu 5:3) Një mënyrë si mund ta plotësojmë këtë nevojë është duke komunikuar rregullisht me Perëndinë.

Çfarë të mirash mund të presim nëse pranojmë ftesën e Perëndisë për t’iu lutur?