Jezui u shfaqet peshkatarëve

Pak kohë pasi Jezui iu shfaq apostujve, Pjetri doli të peshkonte në detin e Galilesë. Thomai, Jakovi, Gjoni dhe disa dishepuj të tjerë shkuan me të. Peshkuan gjithë natën, por nuk kapën asgjë.

Herët në mëngjes, panë një burrë që qëndronte në breg. Ai u thirri që andej: ‘A zutë gjë?’ Ata ia kthyen: «Jo.» Burri u tha: «Hidheni rrjetën në të djathtë të varkës.» Kur e hodhën rrjetën, zunë aq shumë peshq, saqë nuk mund t’i tërhiqnin në varkë. Në çast, Gjoni e kuptoi se burri ishte Jezui dhe tha: «Është Zotëria!» Sakaq, Pjetri u hodh në ujë dhe notoi për në breg. Dishepujt e tjerë e ndoqën me varkë.

Kur arritën në breg, panë një zjarr dhe mbi të po piqeshin bukë e peshq. Jezui u tha të sillnin edhe disa nga peshqit që zunë. Pastaj u tha: «Ejani të hani mëngjesin.»

Pasi hëngrën mëngjesin, Jezui e pyeti Pjetrin: ‘A më do mua më shumë se peshkimin?’ Pjetri iu përgjigj: ‘Po Zotëri, ti e di se unë të dua.’ Jezui i tha: «Ushqeji qengjat e mi.» Jezui e pyeti përsëri: ‘A më do mua Pjetër?’ Pjetri iu përgjigj: ‘Po Zotëri, ti e di që të dua.’ Jezui i tha: «Kulloti delet e mia të vogla.» Jezui e pyeti prapë për herë të tretë. Pjetri u ndie shumë i trishtuar dhe i tha: ‘Zotëri, ti di gjithçka. Ti e di që të dua.’ Jezui ia ktheu: «Ushqeji delet e mia të vogla.» Pastaj shtoi: «Vazhdo të më ndjekësh.»