Jezui mëson njerëzit në një mal

SHIKO Jezuin të ulur këtu. Ai po mëson gjithë këta njerëz, në një mal në Galile. Këta që i janë ulur më afër, janë dishepujt e tij. Jezui ka zgjedhur 12 prej tyre që të jenë apostuj. Apostujt janë dishepuj të veçantë të Jezuit. A ua di emrat?

Dy janë Simon Pjetri dhe vëllai i tij, Andrea. Pastaj janë Jakovi dhe Gjoni, edhe këta vëllezër. Ka edhe një apostull tjetër që quhet Jakov e një tjetër që quhet Simon. Dy apostuj e kanë emrin Juda. Njëri prej tyre është Judë Iskarioti, kurse Judën tjetër e njohin edhe me emrin Tadeu. Pastaj janë Filipi dhe Natanaeli (që e quajnë edhe Bartolome), si edhe Mateu e Thomai.

Pasi u kthye nga Samaria, Jezui filloi të predikonte për herë të parë: ‘Mbretëria e qiejve është afër.’ A e di çfarë është kjo mbretëri? Është një qeveri e vërtetë e Perëndisë. Mbreti i kësaj mbretërie është Jezui. Ai do të qeverisë nga qielli dhe do t’i sjellë paqe tokës. Mbretëria e Perëndisë do ta bëjë të gjithë tokën një parajsë të bukur.

Jezui këtu po u mëson njerëzve për mbretërinë. ‘Duhet të luteni kështu,​—shpjegon ai.—​Ati ynë që je në qiell, u nderoftë emri yt. Ardhtë mbretëria jote. U bëftë vullneti yt në tokë, ashtu si në qiell.’ Shumë njerëz e quajnë këtë edhe ‘Lutja e Zotërisë’. Të tjerë e quajnë lutja ‘Ati ynë’. A mund ta thuash të gjithë lutjen?

Jezui po u mëson njerëzve edhe se si ta trajtojnë njëri-tjetrin. ‘Bëni për të tjerët atë që doni t’ju bëjnë ata juve’,​—thotë ai. A nuk të pëlqen kur të tjerët sillen mirë me ty? Prandaj, Jezui thotë që duhet të sillemi mirë me të tjerët. A nuk do të jetë e mrekullueshme në tokën parajsore, kur të gjithë të sillen kështu?