Lëvizja Bibelkring

NGA fundi i viteve 30 në zonën përreth liqenit Tobë në Sumatrën e Veriut u formua një lëvizje e re fetare e quajtur Bibelkring (emër që në holandisht do të thotë «një grup studentësh të Biblës»). Kjo lëvizje filloi pasi disa mësues kishin pranuar botime nga një pionier që po vizitonte vendin, ndoshta Erik Juinsi, i cili kishte predikuar në zonën rreth liqenit Tobë në vitin 1936. Ajo që lexuan, i nxiti mësuesit të largoheshin nga Kisha Protestante e Batakëve dhe të formonin grupe për studimin e Biblës në shtëpi. Grupet u rritën e u përhapën aq sa anëtarët e tyre arritën në qindra.a

Duke u bazuar te botimet që lanë pionierët, pjesëtarët e hershëm të kësaj lëvizjeje kuptuan disa të vërteta biblike. Dame Simboloni, një ish-anëtare që e pranoi të vërtetën në vitin 1972, tha: «Ata nuk nderonin flamurin dhe nuk përziheshin fare në Krishtlindje e ditëlindje. Madje, disa predikonin shtëpi më shtëpi.» Megjithatë, duke mos pasur mbështetjen e organizatës së Perëndisë, shpejt kjo lëvizje ra viktimë e arsyetimeve njerëzore. Limeria Nadapdapi, një tjetër ish-anëtare që tani është motra jonë në besim, shpjegon: «Gratë nuk lejoheshin të bënin makijazh, të vinin bizhuteri, të vishnin rroba të kohës, madje as të vishnin këpucë. Gjithashtu, anëtarëve u ndalohej të kishin një kartë identiteti kombëtare, qëndrim që ndezi zemërimin e qeverisë.»

Me kalimin e kohës lëvizja Bibelkring u nda në disa grupe të vogla dhe gradualisht u shpërbë. Më vonë, kur pionierët u kthyen në zonën e liqenit Tobë, mjaft nga anëtarët e mëparshëm të asaj lëvizjeje pranuan të vërtetën.