**Si të mprehim aftësitë në shërbim?—Të ofrojmë librin Çfarë mëson vërtet Bibla?**

Pse ka rëndësi? Libri Çfarë mëson vërtet Bibla? është një mjet kryesor në çantën e mjeteve tona mësimore. Mirëpo, para se ta përdorim librin që të studiojmë me dikë, duhet t’ia japim. Prandaj, të gjithë duhet të bëjmë përpjekje që të aftësohemi për të ofruar librin Çfarë mëson vërtet Bibla? (Prov. 22:29) Për këtë ka plot mënyra, ndaj lajmëtarët duhet të përdorin atë që u përshtatet më shumë.

Si ta zbatosh?

Bëj një pyetje që ngjall interes për t’ia drejtuar vëmendjen të zotit të shtëpisë te një kapitull specifik i librit. Madje mund të zgjedhësh një nga pyetjet në fillim të çdo kapitulli. Pasi të dëgjosh përgjigjen, lexo një shkrim të përshtatshëm, pastaj tregoji një paragraf për atë temë dhe shkurtimisht diskutojeni bashkë.
Një mënyrë tjetër është duke përdorur pyetjet në faqet hyrëse për t’i zgjuar interesin. Pastaj tregoji të zotit të shtëpisë ku gjendet në libër përgjigjja e Biblës. Për shembull, mund të përmendësh ndonjë tragjedi të kohëve të fundit për të cilën është folur në lajme dhe t’i shpjegosh se shumë veta duan të dinë përgjigjet e pyetjeve në faqen 3. Ose mund të thuash se po u tregon fqinjëve një lajm të mirë për të ardhmen. Pastaj tregoji figurat në faqet 4-5 dhe pyete: «Cili premtim ju pëlqen të plotësohet?» Një mundësi tjetër është të thuash se shkurtimisht po u tregon njerëzve ku mund t’i gjejnë përgjigjet për pyetjet e rëndësishme të jetës. Më pas tregoji të zotit të shtëpisë pyetjet në fund të faqes 6 dhe pyete cila i intereson më shumë.
Përdor metodën e drejtpërdrejtë për të filluar një studim biblik. Mund të thuash: «Po u tregonim fqinjëve këtë botim ndihmës për studimin e Biblës. A e keni parë ndonjëherë? [Lëre të përgjigjet.] Nëse keni pak minuta, doja t’ju tregoja si mund ta përdorni bashkë me Biblën tuaj.»

Gjatë muajit provo këtë:

Gjatë adhurimit familjar praktikoni si të ofroni librin.
Kur je në shërbim, tregoju lajmëtarëve të tjerë çfarë ke ndër mend të thuash. (Prov. 27:17) Ndryshoje prezantimin nëse nuk është i efektshëm.