Si të mprehim aftësitë në shërbim?—Të stërvitim studentët e Biblës të zhvillojnë zakone të mira studimi

Pse ka rëndësi? Që të përparojnë drejt pjekurisë frymore, studentët e Biblës nuk duhet t’i ushqejnë mendjet dhe zemrat vetëm me mësimet themelore të Fjalës së Perëndisë. (Hebr. 5:12–6:1) Studimi kërkon përpjekje. Përfshin të lidhim informacionin e ri me atë që tashmë dimë dhe të dallojmë vlerën praktike të tij. (Prov. 2:1-6) Kur mësojnë t’i bëjnë vetë kërkimet, studentët e Biblës aftësohen që t’u përgjigjen pyetjeve biblike me anë të botimeve tona të krishtere. Përpjekjet e zellshme që bëjnë për të zbatuar çfarë mësojnë, do t’i ndihmojnë t’u rezistojnë sprovave që do të hasin si të krishterë.—Luka 6:47, 48.

Si ta zbatosh?

Thekso sa rëndësi ka të kërkohet në lutje ndihma e Jehovait çdo herë që fillojmë të studiojmë.—Gjoni 14:26; 1 Kor. 2:10.
Që nga fillimi, inkurajoje studentin të parapërgatitet për studimin e tij të Biblës. Tregoji kopjen tënde të studiuar dhe mësoje të nënvizojë vetëm fjalët ose shprehjet kryesore.
Ndihmoje studentin t’u përgjigjet pyetjeve me fjalët e tij. Shmang që studimi të kthehet në një seancë pyetjesh e përgjigjesh të thata, ku studenti vetëm sa i lexon përgjigjet drejtpërdrejt nga libri.
Nxite studentin të lexojë një pjesë nga Fjala e Perëndisë çdo ditë. Tregoji programin për leximin e Biblës në sitin jw.org, i cili paraqet një mënyrë praktike si mund ta bëjë këtë. Duhet vendosmëri që leximi i përditshëm i Biblës të bëhet zakon, por do t’ia vlejnë përpjekjet.—Psal. 1:2, 3.
Tregoji studentit si mund t’i gjejë përgjigjet për pyetjet biblike duke përdorur Bibliotekën Watchtower ose BIBLIOTEKËN ONLINE Watchtower. Ndihmoje të identifikojë siglat përkatëse të botimeve që përdoren shpesh në mbledhjet e kongregacionit; për shembull, fg është sigla e broshurës Një lajm i mirë nga Perëndia.

Gjatë muajit provo këtë:

Në përfundim të një nëntitulli ose kapitulli, kërkoji studentit të bëjë një përmbledhje të shkurtër të asaj që mësoi. Nëse nuk ke një student, praktikohu duke bërë vetë një përmbledhje të shkurtër të një pjese nga Bibla ose të një paragrafi nga Kulla e Rojës. Në këtë mënyrë do të aftësohesh që të kuptosh më mirë atë që lexon.