Si të mprehim aftësitë në shërbim?—Të nisim biseda që të japim dëshmi joformale

Pse ka rëndësi? Shpesh, kur marrim pjesë në shërbimin shtëpi më shtëpi vërejmë se shumë njerëz nuk janë aty. Gjithsesi, mund t’i takojmë kur përdorim transportin publik, kur presim në ndonjë klinikë, kur bëjmë pushimin në punë ose në shkollë e kështu me radhë. Vullneti i Jehovait është që çdo njeri të ketë mundësi të dëgjojë mesazhin e Mbretërisë. (1 Tim. 2:3, 4) Shumë herë, duhet të marrim iniciativën për të nisur një bisedë me synimin që të dëshmojmë.

Si ta zbatosh?

Ji përzgjedhës. A duket personi miqësor dhe i gatshëm për të folur? A ju lejojnë rrethanat të bisedoni lirshëm? Fillimisht, disa lajmëtarë e shohin personin në sy dhe buzëqeshin. Nëse ai ia kthen buzëqeshjen, atëherë përpiqen të fillojnë një bisedë.
Bëj një lutje të shkurtër në heshtje nëse nuk ke guxim për të folur.—Neh. 2:4; Vep. 4:29.
Nise bisedën me një koment të thjeshtë, për shembull me një përshëndetje. Jezui nuk hyri në bisedë me gruan samaritane duke folur për Mbretërinë. (Gjoni 4:7) Ndonjëherë biseda mund të fillojë me një lavdërim: «Fëmijët tuaj janë shumë të sjellshëm!» Një mundësi tjetër për të nisur bisedën janë pyetjet. Mund të thuash: «I patë lajmet mbrëmë?»
Njëherë që ka nisur biseda, kërko mundësi për të folur për lajmin e mirë, por mos u nxito. Lejo që biseda të rrjedhë natyrshëm. Ndoshta mund të pohosh diçka që e bën personin kurioz ose diçka që e nxit të bëjë pyetje. Për shembull, nëse po bisedoni për familjen, mund të thuash: «Kam gjetur disa këshilla të besueshme për rritjen e fëmijëve.» Nëse po flitni për një lajm, mund të shprehesh: «Kohët e fundit u kënaqa kur lexova disa lajme të mira që tregojnë se gjërat do të ndryshojnë.» Mos u shkurajo nëse biseda mbyllet para se të japësh dëshmi.
Mbaj me vete fletushka ose literaturë tjetër që mund t’ia japësh dikujt që shfaq interes.

Gjatë muajit provo këtë:

Çdo javë përpiqu të fillosh të paktën një bisedë me synimin për të dhënë dëshmi joformale.