«Balsam për të lyer sytë»

KËTË recetë i dha Jezu Krishti kongregacionit të krishterë të shekullit të parë në Laodice të Azisë së Vogël.

Jezui tha: «Të blesh . . . balsam për të lyer sytë që të shohësh.» Nuk ishte një sëmundje e mirëfilltë e syve, por verbëria frymore, ajo që kishte nevojë për një kurë. Të krishterët në Laodice duke u ndikuar nga fryma që ekzistonte në qytetin e begatë materialisht, në të cilin jetonin, ishin bërë indiferentë për nevojat e vërteta frymore.

Duke komentuar për këtë dukuri si shkaku i shikimit të dobësuar të tyre, Jezui tha: «Ti thua: ‘Jam i pasur dhe kam fituar pasuri e s’kam nevojë për asgjë.’ Por nuk e di që je i mjerë dhe i ngratë, i varfër, i verbër e lakuriq.» Ndonëse nuk ishin në dijeni për të, pjesëtarët e kongregacionit kishin nevojë për «balsam» kurues që mund të merrej vetëm duke iu nënshtruar mësimit dhe disiplinës së Jezu Krishtit. ‘Bli nga unë’,—tha Jezui.—Zbulesa 3:17, 18.

Siç duhej të bënin të krishterët në Laodice, të krishterët e vërtetë sot duhet të ruhen që të mos ndikohen në mënyrë të papërshtatshme, ndoshta pa qenë të vetëdijshëm, nga mjedisi në të cilin jetojnë—një mjedis materialist dhe i prirur drejt kënaqësive. Receta për të mbajtur një këndvështrim të shëndetshëm frymor tregohet në këshillën: ‘Blini nga [Jezui] . . . balsam për të lyer sytë që të shihni.’

Ia vlen të vërehet fakti se ky «balsam» duhet blerë. Në të përfshihet një kosto. Duhet shpenzuar kohë për të studiuar Fjalën e Perëndisë dhe për të medituar rreth saj. Kjo Fjalë, na siguron psalmisti, ‘është e pastër dhe ndriçon sytë [frymorë]’.—Psalmi 19:8.