Ta ruajmë emrin e mirë

STUDIMI me kujdes i një pikture të bukur mund të jetë një përvojë shpërblyese. Duke e vështruar me vëmendje, një person do të vërejë se si artisti ka përdorur qindra penelata për të aplikuar ngjyrime të ndryshme në kanavacë.

Në mënyrë të ngjashme, një emër i mirë nuk bëhet, si të thuash, vetëm me një të rënë të trashë peneli, por nga shumë veprime të vogla të bëra gjatë një periudhe kohe. Po, reputacioni ynë ndërtohet pak nga pak nëpërmjet veprave që bëjmë.

Nga ana tjetër, një penelatë në vendin e gabuar mund t’ia humbë vlerën një pikture. Po kështu është edhe me emrin tonë. Mbreti i mençur Solomon tha: «Është marrëzia e njeriut tokësor ajo që e shtrembëron udhën e tij.» (Proverbat [Fjalët e urta] 19:3, BR) Për ta njollosur një reputacion të mirë mjafton një e ashtuquajtur marrëzi e vogël, si për shembull, një shpërthim i dhunshëm zemërimi, një lëshim jo i përkorë ndaj pijeve alkoolike ose një veprim jo i dëlirë nga ana seksuale. (Fjalët e urta 6:32; 14:17; 20:1) Sa jetësore është pra, që të përpiqemi të fitojmë një emër të mirë dhe të punojmë me zell për ta ruajtur atë!—Krahaso Zbulesën 3:5.