«Ndjeva atmosferën paqësore»

NË NJË kongres të organizuar nga Dëshmitarët e Jehovait erdhi një burrë që fliste gjermanisht, me qëllim që të «spiunonte» Dëshmitarët. Përse? Synimi i tij ishte që të «demaskonte këtë sekt dhe të shpëtonte miqtë e tij nga rruga e gabuar». Pasi ndoqi kongresin, ai u shkroi miqve të tij letrën e mëposhtme:

«Kur iu afrova vendit të kongresit, pyeta veten nëse ishte ky vendi i duhur apo jo. Nuk më zuri syri asnjë njeri përjashta dhe përtokë nuk kishte asnjë kanoçe birre ose mbeturina të tjera. Kur shkova më afër, pashë dy zotërinj në hyrjen e stadiumit. Ata më përshëndetën dhe më lejuan të hyja.

Prisja të dëgjoja zhurmat e mijëra njerëzve që mendoja se ishin atje, por ambienti ishte shumë i qetë. ‘Epo,—mendova,—me sa duket ka vetëm një grusht njerëzish të shpërndarë në stadium.’

Kur hyra, menjëherë më tërhoqi vëmendjen një dramë që po luhej në platformë. Vetëm më vonë e kuptova që stadiumi ishte mbushur në kapacitetin e tij të plotë me mijëra dëgjues të vëmendshëm. Ndjeva atmosferën paqësore. Ajo që dëgjova, pashë dhe ndjeva gjatë pjesës tjetër të kongresit më la mbresa të thella.

Duke u përzier me Dëshmitarët, nuk mund të mos vëreja fytyrat e tyre të lumtura dhe shprehjet e dashurisë. Papritur, nuk munda ta ndrydhja mendimin: ‘Këta janë vërtet populli i Perëndisë!’»

Në vend se ‘të shpëtonte miqtë e tij nga rruga e gabuar’, i riu u kërkoi atyre që të studionin Biblën me të. Rezultati? Sot, ai është një plak i krishterë. Së bashku me familjen, ai është aktiv në një nga kongregacionet në Zug, Zvicër.