SHALMANI

[nga rrënja e fjalës që do të thotë «bëj paqe; dëmshpërblej; shpaguaj»].

Plaçkitësi i shtëpisë së Arbelit që Hozea e përmend kur profetizon kundër mbretërisë veriore jobesnike të Izraelit. Ndonëse as për Shalmanin, as për Arbelin nuk flitet tjetërkund në Bibël, fakti që Hozea e nxjerr në pah rastin e tyre, edhe pse kalimthi, tregon se ngjarja duhet të ketë qenë e freskët në mendjen e dëgjuesve.​—Ho 10:14.

Një mbishkrim në mur i Tiglath-Pileserit III flet për një princ të Moabit që quhej Salamanu, por nuk ka asnjë bazë historike që ta lidhë me ndonjë plaçkitje në Izrael.​—Ancient Near Eastern Texts, nga Xh. Priçardi, 1974, f. 282.

Kështu, në përgjithësi, Shalman mendohet se është një formë e shkurtuar e «Shalmaneser», emri i pesë mbretërve asirianë. Ka shumë të ngjarë që Hozea ta ketë pasur fjalën për Shalmaneserin V, pasi nga fundi i periudhës kur profetizoi Hozea, ky mbret sulmoi Izraelin dhe rrethoi Samarinë.