KEJLAHU

Qytet i fortifikuar i Judës në Shefelah. (Js 15:20, 33, 44; 1Sa 23:7) Kejlahun ndoshta e kishin themeluar a qeverisur dikur një ose disa pasardhës të Kalebit. (1Kr 4:15, 19) Në përgjithësi e lidhin me Kirbet-Kilën (Keilën), që ndodhet në një kodër afro 14 km në veriperëndim të Hebronit. Sot afër Kirbet-Kilës kultivohet drithë, ashtu si në rajonin e Kejlahut të lashtë.​—Krahaso 1Sa 23:1.

Gjatë kohës që mbreti Saul e kishte nxjerrë jashtë ligjit, Davidi e shpëtoi Kejlahun nga filistinët. Megjithatë, më pas atij dhe njerëzve të tij iu desh të iknin nga ai qytet, që pronarët e tokës së Kejlahut të mos i dorëzonin në duart e ushtrisë së Saulit.​—1Sa 23:5, 8-13.

Pas mërgimit në Babiloni, qyteti u ripopullua. Gjatë meremetimit të mureve të Jerusalemit nën drejtimin e Nehemisë, Kejlahu përbëhej nga dy gjysma krahinash, secila nën sundimin e një ‘princi’.​—Ne 3:17, 18.