INDIA

Nuk dihet me saktësi për cilën zonë përdoret në Bibël emri «India». (Es 8:9) Në përgjithësi studiuesit mendojnë se tregon zonën që laget nga lumi Ind dhe degët e tij, pra rajonin e Punxhabit e ndoshta edhe atë të Sindit. Sipas dëshmisë së historianit Herodot (III, 88, 94; IV, 44), «India» u bë pjesë e Perandorisë Perse gjatë sundimit të Dar Histaspisit (521-486 p.e.s.). Në epokën e Asuerit (që mendohet se ishte Kserksi I, bir i Dar Histaspisit), India përbënte kufirin lindor të perandorisë.​—Es 1:1.

Lugina e Indit ka shumë të ngjarë të jetë populluar pak pasi u ngatërrua gjuha e ndërtuesve të Babelit. Krahasimi i qytetërimit të lashtë të luginës së Indit me atë të Mesopotamisë nxjerr në pah ndërtime të ngjashme me platformat e zigurateve të Mesopotamisë, skulptura njerëzish me fytyra që duken si maska, karakteristikë kjo e skulpturave të moçme të Mesopotamisë, si edhe shenja të shkrimit me vizatime që ngjasojnë me shenjat e lashta të Mesopotamisë. Asiriologu Samuel N. Kremer ka hedhur idenë se në luginën e Indit banonte një popull që u largua nga Mesopotamia pasi atë zonë e shtinë në dorë sumerianët.