DINA

[e gjykuar (d.m.th. e shkarkuar nga faji; e shfajësuar)].

Vajza e Jakobit dhe e Leas. Dina mund të ketë qenë rreth 6 vjeçe kur Jakobi u kthye në Kanaan dhe u vendos në Sukot; ajo kishte lindur në Haran gjatë kohës që i ati banonte atje.​—Zn 30:21, 22, 25; 31:41.

Në kohën kur Jakobi dhe familja e tij kishin fushuar jashtë qytetit të Sikemit, Dina, që në atë kohë ishte e re në moshë, e kishte bërë zakon të vizitonte vajzat kananite të atij qyteti, një gjë jo fort e mençur. Një ditë atë e përdhunoi Sikemi, i biri i Hamorit, prijësit hivit të qytetit. Sikemi ra në dashuri me Dinën dhe ajo qëndroi në shtëpinë e tij derisa vëllezërit e saj të një gjaku, Simeoni dhe Levi, morën hak. (Zn 34:1-31) Disa pretendojnë se Dina duhet të ketë qenë fëmijë kur e përdhunuan. Megjithatë, s’duhet harruar se para se të shkonte në Sikem, Jakobi ndërtoi një shtëpi dhe disa kasolle në Sukot, gjë që tregon se ai banoi atje për disa kohë. (Zn 33:17) Në Sikem ai bleu një copë tokë dhe, me sa duket, qëndroi për ca kohë atje. Të gjitha këto, bashkë me faktin që Sikemi ra në dashuri me Dinën dhe e kërkoi «vajzën» për grua, lënë të kuptohet se Dina, megjithëse ende e re, nuk ishte fëmijë në kohën kur shoqërohej me Sikemin.​—Zn 33:18, 19; 34:12.

Vite më vonë, Dina bashkë me pjesën tjetër të shtëpisë së Jakobit vajti në Egjipt me ftesë të Jozefit.​—Zn 46:7, 15.