Dilema e një nxënësi
Piteri nuk gjen rehat në karrige dhe në stomak i mblidhet një si lëmsh. Mësuesja e tij, të cilën e respekton, sapo ka shpjeguar se si Çarls Darvini dhe teoria e tij e evolucionit përmirësuan kuptueshmërinë shkencore dhe e çliruan njerëzimin nga besëtytnitë. Tani u ka kërkuar nxënësve të shprehin mendimin e tyre për këtë temë.
Piteri është përballë një dileme. Prindërit i kanë mësuar se tokën dhe çdo gjallesë në të, e krijoi Perëndia. Ata thonë se tregimi biblik i krijimit është i besueshëm dhe se evolucioni është vetëm një teori, e cila nuk mbështetet nga provat. Si mësuesja, edhe prindërit e tij, nisen nga qëllime të mira. Por, kë të besojë Piteri?
Çdo vit shkollor, një skenë e tillë përsëritet në mijëra klasa përreth globit. Ç’duhet të bëjë Piteri dhe nxënës të tjerë si ai? Me siguri, ti je dakord se ata duhet të formojnë mendimin e tyre për këtë çështje. Duhet të shqyrtojnë provat për evolucionin dhe për krijimin e pastaj të vendosin vetë çfarë të besojnë.
Në fakt, Bibla na paralajmëron që të mos besojmë verbërisht çfarë thonë të tjerët. Një shkrimtar biblik thotë: «Kush është pa përvojë, i beson çdo fjale, por kush është mendjehollë, i shqyrton hapat e tij.» (Proverbat 14:15) Bibla na nxit të përdorim ‘fuqinë për të arsyetuar’ dhe t’i vërtetojmë gjërat që mësojmë nga të tjerët.—Romakëve 12:1, 2.
Kjo broshurë nuk ka si qëllim të mbështetë përpjekjet e disa grupeve fetare, të cilat duan që nëpër shkolla të mësohet edhe krijimi. Qëllimi i saj është të shqyrtojë pohimet e atyre që mësojnë se jeta u shfaq spontanisht dhe që thonë se tregimi biblik i krijimit është një mit.
Do të përqendrohemi te qeliza, pasi ajo është njësia bazë e jetës. Do të kesh mundësi të shqyrtosh disa fakte mahnitëse për mënyrën si janë ndërtuar qelizat. Do të të ftojmë edhe të analizosh pohimet që mbështetin teorinë e evolucionit.
Herët a vonë, të gjithëve do të na duhet të bëjmë pyetjen: jeta u krijua apo evoluoi? Ka mundësi që tashmë të kesh menduar seriozisht rreth kësaj çështjeje. Në këtë broshurë do të paraqiten vetëm disa nga provat që i kanë bindur shumë veta se jeta u krijua.