Mu dia Kasatu 15, Mueshi wa 4
Nuifulene.—Yo. 15:12.
Muilo wa Yehowa ngufule kuikuashena. (2 Ko. 8:4) Anka ingi nsaa, abitekie’shi bekale n’eshimba dinyingie buabadia kuibikita. Bu kileshesho, nsaa ayituuku ngoshi, bakulu ba mu tukongie abashinguula’shi bakuabo balume na bakashi be na lukalo na kunyingishibua, kukuashibua, na pangi’shi be na lukalo na bintu bia ku mbidi mpaa na bia mu kikudi. Bakulu mbafule bakuabo balume na bakashi, ngi buakinyi abakitaa muabo mooso bua kuibapa bintu. Mu nsaa i bino, bi na muulo bua’shi tushaale mu buumune. Kookiela bukunkushi abutuukila ku biro bia filiale eenu. (Eb. 13:17) Abitungu’shi bakulu bekale abataluula bukunkushi abutuukila kui ndumbuluilo pabitale mushindo wa kuilumbuula bua masaku na kia kukita nsaa ayituuku masaku. (1 Ko. 14:33, 40) Ikala n’eshimba dinyingie, anka wekale mudimukie. (Nki. 22:3) Nangushena kumpala kua kukita kintu kampanda. Tu’etuulanga mu masaku bisumanga. Kulupila mui Yehowa. Tentekiesha’shi Yehowa akumiina’shi obe na bakuenu, nuikale biya. w24.07 4 ¶8; 5 ¶11
Mu dia Kananka 16, Mueshi wa 4
Mu mpombo yande, needidi Yehowa, . . . musaase umwedibwe ubafiki ku matwi aaye.—Mis. 18:6.
Nfumu Davide baadi awuku Yehowa na baadi mumukulupile. Nsaa ibaabalunguile Nfumu Saule kui beshikuanyi naye bua kuipaa Davide, baadi mutekie bukuashi kui Yehowa. Kunyima kua Yehowa kualuula ku luteko luaye na kumupaasha, Davide bakuile’shi: “Yehowa e na mûwa!” (Mis. 18:46, EEM) Bino bishima, t’abilesha’shi Davide baadi penda muukie’shi Efile Mukulu e kuanka nya. Ungi mukanda auleesha’shi Davide baadi muleeshe lukulupilo luaye mui Yehowa “bu Efile Mukulu e na mûwa akaluilaa muilo waye.” Eyendo, Davide baadi muukie ku mianda ibaadi muimuene aye nabene’shi Efile Mukulu e na muwa, na kino kishinkamiisho kibaadi kinyingishe kitshibilo kia Davide kia kutungunuka na kufubila Yehowa na kumutumbisha. (Mis. 18:28, 29, 49) P’atushinkamisha’shi Yehowa nyi Efile Mukulu e na muwa abitukuasha buatudia kumufubila na kisumi. Abitupa bukome buatudia kunyingiila nkalakashi na kuitutakula buatudia kutungunuka na kufuba ngofu mu mudimo waye. Abinyingisha dingi kitshibilo kietu kia kushaala peepi na Yehowa. w24.06 20-21 ¶3-4
Mu dia Katano 17, Mueshi wa 4
Muntu tenulubishanga mu mushindo su ngumune.—2 Te. 2:3.
Nkinyi ki’atulongiela ku mayi a Mpoolo mutumibua kui bena Tesalonike? Nsaa y’atupusha muanda kampanda ushii wipushene na biatudi balongie mu Bible, sunga p’atupusha muanda wa madimi wabapalakasha awitukalakasha kuishimba, abitungu tufubishe kapatupatu. Mu Union Soviétique a kala, ungi musango beshikuanyi betu babaadi abapalakasha mukanda ubaadi aumueneka bu autuukila ku biro bietu bikata bia mu nsenga ishima. Wawa mukanda ubaadi autakula bangi bakuetu buabadia kukita ungi ndumbuluilo e pa buaye. Mukanda unabene ubaadi aumueneka bu wa binyibinyi. Anka bakuetu balume ba sha lulamato ta babaadi badimbibue nya. Babatunduile’shi mukandu ubaadi mu mukanda ta ubaadi wipushene na mianda ibaabadi balongie. Lelo uno, beshikuanyi ba bia binyibinyi, ingi nsaa bakuete kufubisha bintu bu internete na site a kuisamba na bantu be bungi bua kutompa kutuesha kafutakanyi na kuitshibuula munkatshi muetu. Pa mutue pa ‘kusanyishua bukidibukidi mu binangu bietu,’ tui balombene kuitaluula pa kukimbuula kalolo, su mianda yatupusha sunga y’atubadika, ngipushene na bia binyibinyi biatudi bapue kulonga.—2 Te. 2:2; 1 Yo. 4:1. w24.07 12 ¶14-15