Muisambo wa Salomone auleesha kilombene kukitshikila mulanguidi a Yehowa ooso. Mmulombene kupona mu muluisho ukata, na kunyima amona’shi mianda yooso ngikidikie “mu kimpulunkamba.” Sunga mmulombene kuamba’shi: “Ngukitshikie nka mu kabasamushi.” Na akupu su banangushena ku akikalanga kikitshikie pangi mmulombene kutundula’shi ayikalanga muate bitshibilo bi bubi kumpala kua kukita muluisho ukata. Pangi mmusangule ba kuuku bashi bafule Yehowa, sunga’shi mmukishe kapapi mu mushindo wi bubi, mmutuele mu ma site ashi buwa, sunga kuenda mu ma mbalo ashi buwa bua bena Nkidishitu. Pangi dingi ayikalanga mulekie kuela nteko, kuibadikila Bible, kutuela mu bisangilo, sunga kulungula mukandu wi buwa. Anka bu songualume abadi baleshe mu mukanda wa Nkindji, bua kuakula kalolo, ta mmukite wawa muluisho mu “kimpulunkamba”. Bino abitulongiesha kinyi? T’abitungu tushikue penda muluisho ao unabene nya, anka abitungu dingi tushikue matabula aetutakula mu kuiukita. Salomone baadi mupatuule bianka kunyima kuaye kulonda muanda wa nsongualume na mukashi ndumba.​—Mat. 5:29, 30. w24.07 16 ¶10-11

Dino ebue nkinyi? Nyi mudimo wa kulungula mukandu wi buwa bua kupaasha miuwa. (2 Ko. 4:1) Bipulu bia nsenga namu nkinyi? Bipulu bia nsenga abilesha bafubi ba Efile Mukulu abatuadila bangi mukandu wi buwa. Mu mafuku a Mpoolo, ba nsunga babaadi abafubisha bipulu bia nsenga bua kutuala bintu bi buwa bu bidibua, maalua a nfinyo, na makuta. Mu mushindo umune, Yehowa mmuitupe kintu ki na muulo ukata, kuamba’shi mukandu wi buwa. Ku bukuashi Yehowa, tui kupeta bukome buatudi nabo lukalo buatudia kulungula bantu mukandu wi buwa na lulamato looso. Ingi nsaa tui kuikala na moo wa bantu, sunga moo wa kubingibua mu bulungudi. Tui kukambila luno lukalakashi naminyi? Tutaluuleyi luteko lubabakitshine kui batumibua, nsaa i baabadi abebapelasha kulungula mukandu wi buwa. Pa mutue pa kupusha moo na kuleka kulungula mukandu wi buwa, babatekiele Yehowa bua’shi ebakuashe “batungunukie na kuakula n’eshimba dinyingie.” Yehowa be baluluile ku luteko nka paapa ku’shi kunyengakana. (Bik. 4:18, 29, 31) Su ingi nsaa tuapusha moo wa bantu, tutekie Yehowa bua’shi anyingishe kifulo kietu bua bantu. w24.04 16 ¶8-9

Kifulo kietu bua Yehowa akitutakula bua kutumbisha eshina diaye. Bino abipushisha’shi mianda yabakuete kuakula kui Satana pabitale Yehowa, ngia madimi. (Kib. 3:1-5; Yob. 2:4; Yo. 8:44) Mu mudimo wetu wa bulungudi atuikalaa na lukalo lukata lua kulungula bantu abetuteemesha bia binyibinyi pabitale Efile Mukulu etu. Atukumiina kuwukisha bantu booso’shi eyikashi dikata dia Yehowa nyi nkifulo. Na’shi kumunana kuaye kui buwa na nkululame, na dingi Bufumu buaye abufiki binobino bua kukatusha makienga oso, na butuadile bantu booso butaale na muloo. (Mis. 37:10, 11, 29; 1 Yo. 4:8) P’atukaluila nkumo ya Yehowa mu mudimo wetu wa bulungudi, atutumbisha eshina diaye. Atuikala dingi na muloo wa kuuka’shi tui na nshalelo muipushene n’eshina dietu. w24.05 18 ¶12