Ganhuro 3
Ubati Ushe hwo“Muchinda woRugare” Pakati Pavavengi
CHINGUVANA pamberi pokukwira kwake kudenga anopfuura mazana amakore 19 akapfuura, “Muchinda woRugare” womunguva yemberi wapanguva iyeyo, Jesu Kristu, akataura aya mashoko okuoneka kuboka ravadzidzi vake vakatendeka anoti: “Naizvozvo endai mundoita vadzidzi vavanhu vamarudzi ose, muchivabhapatidza muzita raBaba neroMwanakomana neromudzimu mutsvene . . . Uye, tarirai! Ini ndinemi mazuva ose kusvikira kumhedziso yetsika yezvinhu.”—Mateo 28:19, 20.
2 Mashoko iwawo aJesu akada kutendeuka kwenyika pamberi pe“mhedziso yetsika yezvinhu” yakavamba muna 1914 here? Aiwa. Nhasi, pedyo nomugumo wezana rino ramakore rechi 20, nyika yavanhu iri kure zvikuru nokuva inotendeukira kuna Jesu Kristu soMuponesi wayo naMambo wapamaruramiro. Zvisinei, ikoku hakuna kunonozetsa kushanda kweizvo Jehovha akadeya kuzivisa muzviporofita zveBhaibheri. Rakanga risati richitongova donzo raMwari kuti nyika yose yavanhu itendeutswe Jesu Kristu asati avamba kubata ushe so“Muchinda woRugare.” Nomutoo wakasiana zvikuru, iye akadeya kuziviswa kuvamba kubata ushe pakati pavavengi vake.
3 Kunyange apo iye akanga ari pano pasi, Jesu Kristu aiziva idi ireri. Chinguvana pamberi porufu rwake somufiri kutendeka, iye akapokanidzana navashori vake vorudzidziso uye iye akaita nongedzero kuPisarema 110. Tinorava pamsoro paikoku pana Ruka 20:41-44, kuti: “Mukupindura iye akati kwavari: ‘Vanoreva seiko kuti Kristu ndiye mwanakomana waDhavhidhi? Nokuti Dhavhidhi iye amene anoreva mubhuku raMapisarema achiti, “Jehovha akati kunaShe wangu, Gara kuruoko rwangu rworudyi kusvikira ndaita vavengi vako chitsiko chetsoka dzako.” Naizvozvo, Dhavhidhi anomuidza kuti “Ishe”; naizvozvo iye anova sei mwanakomana wake?’”
4 Nomutoo uri pamhene, ipapoka, Jesu Kristu, soMwanakomana waDhavhidhi, haasati aizovamba kubata ushe pashure pokutendeuka kwenyika. Kupfuurezvo, iye aizovamba kubata ushe pakati pavavengi avo Jehovha Mwari kupfurikidza nehondo pakupedzisira aizoita chitsiko chetsoka nokuda kwetsoka dzoMwanakomana wake akagadzwa pachigaro choumambo. Pisarema 2 nomutoo wakafanana, mumashoko anotevera, rinoratidzira mavambo oubati ushe hwake so“Muchinda woRugare” pakati pavavengi:
5 “Neiko marudzi ave achiita bope namapoka amarudzi iwo amene akapfuurira kutaura chinhu chisina maturo? Madzimambo apasi akaita kumira kwawo uye vakuru vakuru ivo vamene vakazviunganidzira pamwe chete somumwe mukurwisana naJehovha uye mukurwisana nomuzodziwa wake [Kristu wake], vachiti: ‘Ngatidambure zvisungo zvavo ndokurasha mabote avo kubva kwatiri!’ Iye amene agere mumatenga achaseka; Jehovha iye amene uchavadadira. Panguva iyeyo iye achataura kwavari mukutsamwa kwake uye iye achavavhiringidza muhasha dzake huru, achiti: ‘Ini, kunyange ini, ndakagadza mambo wangu paZioni, gomo rangu dzvene.’
6 “Regai nditaure pamsoro pechirevo chaJehovha; iye akati kwandiri [Kristu]: ‘Iwe uri mwanakomana wangu; ini, nhasi, ndava baba vako. [Pisarema 2:7 rakazadzika apo Jehovha akamutsa Mwanakomana wake murufu, nokudaro ndokuva Baba vokusingaperi kuna Jesu. (VaRoma 1:4)] Ndikumbire, kuti ndipe marudzi senhaka yako nemigumo yapasi zvive zvako umene. Iwe uchavaputsanya netsvimbo yedare, uchavaputsanya sehari yomuumbi.’ Uye zvino, O madzimambo, shandisai nzwisiso; zviitei imi mumene kuti mururamiswe, O vatongi vapasi. Batirai Jehovha nokutya ndokuva vanofara nokudedera. Tsvodai mwanakomana, kuti Iye agorega kuva anotsamwa uye imi mugorega kupararira panzira, nokuti hasha dzake hadzitani kumuka. Vanofara ndivo avo vose vanotizira maari.”
7 Mukuwirirana naMabasa 4:24-27, vaapostora vaJesu Kristu vakanongedzera kune iri pisarema rechipiri pashure pezuva rePentekosta, 33 N.V.: “Ivo nomwoyo mumwe vakasimudzira manzwi avo kuna Mwari uye vachiti: ‘Changamire Ishe, imi ndimi Uyo akaita denga napasi negungwa nezvinhu zvose zviri mazviri, uye uyo kupfurikidza nomudzimu mutsvene makataura nomuromo waDhavhidhi baba vedu vekare, muranda wenyu, “Neiko marudzi akava anoita bope nendudzi dzichifungisisa pamsoro pezvinhu zvisina maturo? Madzimambo apasi akaita kumira kwawo uye vabati ushe vakaungana pamwe chete somumwe kuzorwisana naJehovha nokurwisana nomuzodziwa wake.” Kunyange zvazvo zvakadaro, vose vari vaviri Herodhe naPontio Pirato navanhu vamarudzi uye nendudzi dzaIsraeri vakanga vakaungana pamwe chete zvamazvirokwazvo mune iri guta mukurwisana nomuranda wenyu mutsvene Jesu, uyo imi makazodza.’”
Zadziko Huru yePisarema 2
8 Gore ra 33 rezana ramakore rokutanga rakaona kuzadzika kwokutanga kwamashoko iwawo echiporofita ePisarema 2:1, 2. Ikoku kwakanga kuri pamsoro pomunhu Jesu Kristu pasi pano. Iye akanga azodzwa nomudzimu mutsvene waJehovha panguva yorubhapatidzo rwake rwakaitwa naJohane Mubhapatidzi. Asi kuzadzika kukuru kwePisarema 2 kwave kuchiitika chifo chokuguma kweNguva dzaVamarudzi mugore ra 1914. (Ruka 21:24) Kwave kuchisimbisirwa zvakaringanira kuti “nguva dzakagadzwa dzamarudzi,” idzo dzakavamba pakuparadzwa kwokutanga kweguta reJerusarema muna 607 P.N.V., dzakaguma mugore ra 1914.a Panguva iyoyo chiratidzo chokuguma chakaziviswa nokuda kwamarudzi enyika ino, kubatanidza naawo echiKristudhomu.
9 Pakuparadzwa kwokutanga kweJerusarema, kwakaitwa navaBhabhironi, Umambo hwaJehovha Mwari parudzi rwaIsraeri, sohwaimirirwa nomutsara woumambo waMambo Dhavhidhi, hwakaguma. Chifo chenguva iyeyo, vaJudha vokunyama havana kuva namambo pavari mumutsara weimba yoUmambo yaDhavhidhi. Asi Umambo hwaMwari Wokumusorosoro hwunodzorwa nomuzukuru waDhavhidhi, uyo Jehovha akaita naye sungano nokuda kwoUmambo husingaperi mumutsara wake, hahusati hwaizogara husingaiti basa pasi pano nokusingaperi.
10 Kuna mambo weJerusarema rekare, chinguvana pamberi poruparadziko rwaro rwokutanga, Jehovha akasakisa muporofita wake Ezekieri kunangidzira aya mashoko, anoti: “Kana uriwe, O muchinda wakakuvadzwa zvikuru, wakaipa waIsraeri, une zuva rakasvika munguva yechakaipa chomugumo, izvi ndozvakataurwa naChangamire Ishe Jehovha, ‘Bvisa ngowani, ugobvisa korona. Ihwohwu hahusati huchizova hwakafanana. Kwidzai kunyange chakaderera, muderedze kunyange chakakwirira. Ini ndichariita matongo, matongo, matongo. Kana huri uhwuwo, zvamazvirokwazvo hahusati huchizova hwomumwe kusvikira asvika iye ana maruramiro apamutemo, uye ini ndinofanira kuhupa kwaari.’”—Ezekieri 21:25-27.
11 Uyo “ana maruramiro apamutemo” akasvika ari Jesu Kristu, uye mutsara wake wedzinza kubvira kuna Dhavhidhi wakanyorwa pana Mateo 1:1-16 naRuka 3:23-31. Iye aiwanzotaurwa so“Mwanakomana waDhavhidhi.” Pazuva rokutasva kwake kworukundo achipinda muJerusarema, akatasva mbongoro mukuzadzika kwechiporofita, boka raifara ravaJudha rakanga richifamba naye navaapostora vake rakadanidzira nomufaro, richiti: “Tinonyengetera kuti, muponesei, Mwanakomana waDhavhidhi! Wakakomborerwa iye unouya muzita raJehovha! Tinonyengetera kuti, muponesei, kumusoro kumatenga!”—Mateo 21:9.
“Mwanakomana waDhavhidhi” Akagadzwa Pachigaro Choumambo Mudenga
12 Makore ane 2 520 okuti vaVamarudzi vatsike-tsike pasi petsoka Umambo hwaMwari hunodzorwa neimba yaDhavhidhi akaguma muna 1914. Panguva iyeyo pakasvika nguva yokuti Jesu Kristu, “Mwanakomana waDhavhidhi,” ave anogadzwa pachigaro choumambo, kwete pasi pano pachigaro choumambo chapasi, asi mumatenga okumusorosoro kuruoko rworudyi rwaJehovha Mwari!—Dhanieri 7:9, 10, 13, 14.
13 Kubvira muna 1876 musi iwowo unoisvokosha wakanga waratidzirwa pachine nguva mberi naavo vakava vakabatana neWatch Tower Bible and Tract Society. Asi marudzi apasi, kunyange awo echiKristudhomu, akaramba kuuziva senguva yokuti iwo ape uchangamire hwawo hwapasi ku“Mwanakomana waDhavhidhi” achangobva kugadzwa pachigaro choUmambo. Iwo haana kubvuma kuti iye akanga ana maruramiro akapiwa naMwari ouchangamire papasi rose, iro riri chitsiko chetsoka dzaJehovha Mwari. (Mateo 5:35) Iwo akaratidzira kuramba kwawo kuzere Mambo wapamaruramiro kupfurikidza nokupinda muhondo yenyika yokutanga.
14 Mumarudzi ose anorwisana, maKristu akazvitsarira akanga akabatana neWatch Tower Society akadzvinyirirwa zvikurusa kuti asiye kutsunga kwawo kwokuramba asitongorina mhaka yeropa. Iwo panguva iyeyo haana kunzwisisa mwero mukurusa wechinodikanwa chokusatora rutivi kwomuKristu. Chiporofita cho“Mwanakomana waDhavhidhi,” Jesu Kristu, kuna vadzidzi vake pamsoro pe“mhedziso yetsika yezvinhu” chakava chinoitika nomutoo unorwadza: “Imi muchavengwa namarudzi ose nokuda kwezita rangu.” (Mateo 24:9) Uku kuvengwa hakuna kuterama chifo chomugumo weHondo yeNyika I. Mukurangarira aya maidi ane revo enhau yazvino uno, ko mugariro wenyika yose unoratidzirei? Ichi: “Muchinda woRugare” anobata ushe pakati pavavengi vari pasi pano chaipo!
15 Mwari Wamasimba ose akaparira Umambo hwoUmesia hwakapikirwa kuberekwa panguva yake yakagadzwa pasinei zvapo navavengi vake vose vaivamo mudenga napasi pano. Zvakazarurwa 12:1-9 inoratidzira kuti pashure pokuberekwa kwoUmambo hwo‘mwanarume’ mumatenga mumimba yesangano rakafanana nomudzimai raJehovha, sokunge zvakadaro, hondo pakarepo yakamuka mudenga imo mumene. Matenga matsvene akanga asati achasitongovazve nzvimbo yaDragoni wokufananidzira, Satani Dhiabhorosi, nengirozi dzake dzoudhemoni. Mune iyi hondo, isingaonwi nameso avanhu, “Mwanakomana waDhavhidhi” akapiwa simba muumambo akarwa nomutoo worukundo ndokubvisa Satani Dhiabhorosi namapoka ake amadhemoni mumatenga ndokuvaganhurira kunzvimbo iri pedyo nemburumbwa yedu yapasi. Uku kuderedzwa kwamauto aSatani sezvinooneka kwakapedzwa zvizere pana 1918, gore apo Hondo yeNyika I yakaguma.
Aderedzwa, Dhiabhorosi Anorwa Hondo
16 Satani Dhiabhorosi akaderedzwa, dragoni wokufananidzira, zvino akatsamwira zvikuru sangano rakafanana nomudzimai raJehovha Mwari. (Zvakazarurwa 12:17) Nokudaro anorwa hondo nomutoo wokurura pavakasarira vakaberekwa nomudzimu vamaKristu akazvitsaurira awo ano hufakazi hwokuti iro ndiro amai vao vomudzimu.—VaGaratia 4:26.
17 Satani anorwawo hondo pa“mamwe makwai,” awo nomutoo wokuteerera anoshanda navakasarira vakazodzwa mukupupurira kuberekwa kwoUmambo. (Johane 10:16) Iye haasati achingoshandisa bedzi mauto ake amadhemoni akaderedzwa, zvino ari munzvimbo iri pedyo napasi, asi anoshandisawo rutivi runooneka rwesangano rake kuita uku kurwisana navakasarira na“mamwe makwai.”
18 Ubati ushe hwo“Muchinda woRugare” pakati pavavengi vake pano papasi hwosvika mugumo wahwo. Iye akasanotarisira mugariro wacho. Masikati nousiku ngirozi dzake tsvene dzakavimbika dzinorindira, dzakagadzirira kugamuchira mirairo yoUmambo inobva kwaari uye kuita chiito nokuchimbidza. Idzo dzinobatira seuto retaviridziro nokuda kwavakasarira vakazodzwa neshamwari dzavo, “boka guru” ra“mamwe makwai,” ivava zvavari kupfuurira kubatira fariro dzoUmambo mukati menguva inokurumidza kupera apo “Muchinda woRugare” anobata ushe pakati pavavengi vake.—Zvakazarurwa 7:9.
[Mashoko Omuzasi]
a Nokuda kwamashoko oudzame, ona bhuku rinonzi Iwe Unogona Kurarama Nokusingaperi muParadhiso Pasi pano, mapeji 138-41, rakabudiswa neWatchtower Bible and Tract Society of New York, Inc.
[Mibvunzo Yechidzidzo]
1, 2. (a) Ko Jesu akataura mashokoi okuonekana kuboka ravadzidzi vake? (b) Ko ikoku kwakada kutendeuka kwenyika iye asati abata ushe so“Muchinda woRugare” here?
3. Ko nongedzero yaJesu kuPisarema 110 yakaratidzira sei kuti iye aizotonga pakati pavavengi?
4-6. (a) Ko Pisarema 2 nenzira yakafanana rinoratidzira sei kuti Jesu haasati aizofanira kumirira kutendeuka kwenyika pamberi pokuvamba kubata ushe kwake so“Muchinda woRugare”? (b) Ko Pisarema 2:7 rakazadzika panguva ipi?
7. Ko vaapostora vaJesu Kristu vakaita kunongedzerai kuPisarema 2 pashure pezuva rePentekosta?
8. (a) Ko zadziko yokutanga yePisarema 2:1, 2 yakaitika rini? (b) Ko kuzadzika kukuru kwePisarema 2 kwave kuchiitika kubvira rini?
9. Chii chakaitika pakuparadzwa kwokutanga kweJerusarema pamsoro poUmambo hwaMwari sohwaimirirwa nomutsara weimba youmambo yaMambo Dhavhidhi?
10, 11. (a) Ko Mwari kupfurikidza nomuporofita wake Ezekieri akataurei pamsoro pechigaro choUmambo chaDhavhidhi? (b) Ndiani akauya na“maruramiro apamutemo” kuchigaro choUmambo chaDhavhidhi? (c) Ko boka ravaJudha rakatii apo iye akazvipa iye amene somudyi wenhaka wapamutemo?
12. Apo Nguva dzaVamarudzi dzakaguma muna 1914, Jesu Kristu akanga ari kupi, somudyi wenhaka wechigarire waDhavhidhi, akagadzwa pachigaro choumambo?
13. (a) Ko gore ra 1914 rakanongedzerwa mberi somugumo weNguva dzaVamarudzi kubvira pamusii, uye navanaani? (b) Chii chakanga chiri chimiro chendangariro chamarudzi apasi ku“Mwanakomana waDhavhidhi” achangobva kugadzwa pachigaro choumambo?
14. (a) Nokumuka kweHondo yeNyika I, marudzi akaratidzira chimiroi chendangariro kuna maKristu aye akabatana neWatch Tower Society? (b) Nokuda kwaikoku, ko mugariro wenyika yose unoratidzirei?
15. Chii chakaitika kuna Satani Dhiabhorosi namapoka ake amadhemoni apo hondo yakamuka mudenga, uye miuyo inofanira kuve yakava yapedzwa pagore ripi?
16, 17. (a) Ko Satani Dhiabhorosi akaderedzwa anorwisana navanaani? (b) Ko iye anoshandisa vanaani kurwa hondo iyi?
18. (a) Kunyange zvazvo Dhiabhorosi nomutoo wokurura achirwisana navakasarira vakazodzwa neshamwari dzavo, iutoi rokutaviridzira ravanaro? (b) Rutivii rwoubati ushe hwo“Muchinda woRugare” rwosvika mugumo warwo?