Zvinoita Here Kuziva Mwari Nezita?

Kana munhu anokosha akakuti umumhorose uye utaure naye nezita rake, anenge akuremekedza chaizvo. Vanhu vane zvinzvimbo vanowanzoshevedzwa nemazita akadai sokuti “Purezidhendi,” “Vakuru,” kana kuti “Changamire.” Saka kana munhu ane chinzvimbo akakuti, “Ingondishevedza hako nezita rangu,” hapana mubvunzo kuti unenge waremekedzwa chaizvo.

MWARI wechokwadi anotiudza muShoko rake, Bhaibheri, kuti: “Ndini Jehovha. Ndiro zita rangu.” (Isaya 42:8) Kunyange zvazvo aine mamwe mazita akawanda okumuremekedza, akadai sookuti “Musiki,” “Wemasimbaose,” uye “Changamire Ishe,” agara achiremekedza vashumiri vake vakatendeka nokuvabvumira kuti vamudane nezita rake chairo.

Somuenzaniso, muprofita Mosesi akambotanga kuteterera Mwari achiti: “Pamusoroi, Jehovha.” (Eksodho 4:10) Pakatsaurirwa temberi muJerusarema, Mambo Soromoni paainyengetera akatanga nemashoko okuti: “Haiwa Jehovha.” (1 Madzimambo 8:22, 23) Uye muprofita Isaya paakataura kuna Mwari achimiririra vaIsraeri, akati: “Imi, haiwa Jehovha, ndimi Baba vedu.” (Isaya 63:16) Zviri pachena kuti Baba vedu vokudenga vanoda kuti tishandise nezita ravo patinotaura navo.

Sezvo kushevedza Jehovha nezita kuchikosha, kunyatsomuziva nezita kunoda kuti tiite zvakawanda. Jehovha anovimbisa munhu anoda Mwari uye anovimba naye, kuti: “Ndichamudzivirira nokuti ava kuziva zita rangu.” (Pisarema 91:14) Zviri pachena kuti kuziva zita raMwari kunofanira kunge kune zvakawanda zvakunoreva, zvauri iwo musimboti wokudzivirirwa naMwari. Saka unofanira kuitei kuti uzive Jehovha nezita?