Jehovha Anodei Kwatiri Nhasi?

“Inzwi rikabva mugore, richiti: Uyu Mwanakomana wangu unodikanwa, wandinofarira, mumunzwei.”—MATEO 17:5.

1. Mutemo wakazadzika rini chinangwa chawo?

JEHOVHA akapa rudzi rwaIsraeri Mutemo, nezvinhu zvakawanda zvaibatanidzwa mauri. Nezvazvo, muapostora Pauro akanyora kuti: “Yaingova mitemo yenyama, . . . yavakatemerwa kusvikira panguva yokuvandudzwa.” (VaHebheru 9:10) Mutemo pawakaita kuti vakasarira vevaIsraeri vagamuchire Jesu saMesiya, kana kuti Kristu, wakanga wazadzika chinangwa chawo. Saka, Pauro akati: “Kristu ndimugumo wo[“Mutemo,” NW].”—VaRoma 10:4; VaGaratia 3:19-25; 4:4, 5.

2. Ndivanaani vaidzorwa noMutemo, uye vakasunungurwa rini pauri?

² Izvi zvinoreva here kuti hatichasungirwi kuchengeta Mutemo nhasi? Chaizvoizvo, vanhu vakawanda havana kumbobvira vadzorwa noMutemo, sezvakatsanangurwa nemunyori wepisarema kuti: “[Jehovha] unozivisa Jakobho shoko rake, naIsraeri mitemo yake nezvaakatonga. Haana kutongoitira rumwe rudzi saizvozvo; kana zviri zvaakatonga, havana kuzviziva.” (Pisarema 147:19, 20) Mwari paakatanga sungano itsva pahwaro hwechibayiro chaJesu, nyange rudzi rwaIsraeri rwakanga rwusisasungirwi kuteerera Mutemo. (VaGaratia 3:13; VaEfeso 2:15; VaKorose 2:13, 14, 16) Zvino, kana zvisisasungirwi kuchengeta Mutemo, Jehovha anodei kune vanoda kumushumira nhasi?

Zvinodiwa naJehovha

3, 4. (a) Jehovha anonyanyodei kwatiri nhasi? (b) Nei tichifanira kunyatsotevera makwara aJesu?

³ Mugore rokupedzisira roushumiri hwaJesu, vaapostora vake Petro, Jakobho, naJohane vakaenda naye kugomo refu, zvimwe imwe nzvimbo yakakwirira yeGomo reHermoni. Vari ipapo vakaona chiratidzo chouprofita chaJesu ari mumbiri yakaisvonaka ndokunzwa inzwi raMwari pachake richizivisa kuti: “Uyu Mwanakomana wangu unodikanwa, wandinofarira, mumunzwei.” (Mateo 17:1-5) Izvi ndizvo zvinonyanyodiwa naJehovha kwatiri—kuteerera Mwanakomana wake ndokutevedzera muenzaniso wake nedzidziso. (Mateo 16:24) Saka, muapostora Petro akanyora kuti: “Kristu [aka]kutambudzikiraiwo, akakusiyirai mufananidzo, kuti mutevere makwara ake.”—1 Petro 2:21.

⁴ Nei tichifanira kunyatsotevera makwara aJesu? Nokuti patinomutevedzera, tinenge tichitevedzera Jehovha Mwari. Jesu ainyatsoziva Baba, zvaakanga apedza mabhiriyoni nemabhiriyoni emakore anaye mudenga asati auya pasi pano. (Zvirevo 8:22-31; Johane 8:23; 17:5; VaKorose 1:15-17) Paakanga ari pasi pano, Jesu akamiririra Baba vake akavimbika. Akatsanangura kuti: “Ndinoreva izvozvo zvandakadzidziswa naBaba.” Chokwadi, Jesu ainyatsotevedzera Jehovha zvokuti aigona kuti: “Wandiona ini, waona Baba.”—Johane 8:28; 14:9.

5. VaKristu vanodzorwa nomutemo upi, uye mutemo iwoyo wakatanga rini kushanda?

⁵ Chii chinobatanidzwa pakuteerera Jesu nokumutevedzera? Zvinoreva here kudzorwa nomutemo? Pauro akanyora kuti: ‘handisi pasi pomutemo.’ Pano akanga achitaura “sungano yakare,” sungano yoMutemo yakaitwa naIsraeri. Pauro akabvuma kuti aiva “pasi po[“Mutemo,” NW] waKristu.” (1 VaKorinte 9:20, 21; 2 VaKorinte 3:14) Nokuguma kwesungano yekare yoMutemo, “sungano itsva” yakatanga kushanda ne“mutemo [wayo] waKristu” uyo vashumiri vose vaJehovha vanosungirwa kuteerera.—Ruka 22:20; VaGaratia 6:2, NW; VaHebheru 8:7-13.

6. “Mutemo waKristu” ungatsanangurwa sei, uye tinouteerera sei?

⁶ Jehovha haana kuita kuti “mutemo waKristu” unyorwe pasi sebumbiro remitemo, achiuronga muzvikamu zvakasiyana-siyana, sezvakaitwa nesungano yekare yoMutemo. Uyu mutemo mutsva wevateveri vaKristu hausanganisiri mudorododo wezvokuita nokusaita. Zvisinei, Jehovha akachengetedza nhoroondo ina muShoko rake dzine zvose dzoupenyu nedzidziso zvoMwanakomana wake. Uyezve, Mwari akafemera vamwe vevateveri vokutanga vaJesu kuti vape mirayiridzo yakanyorwa pamusoro pemufambiro womunhu, nhau dzeungano, mufambiro mumhuri, nedzimwe nhau. (1 VaKorinte 6:18; 14:26-35; VaEfeso 5:21-33; VaHebheru 10:24, 25) Patinowiriranisa upenyu hwedu nemuenzaniso nedzidziso zvaJesu Kristu ndokuteerera zano revanyori veBhaibheri vakafemerwa vomuzana remakore rokutanga, tiri kuteerera “mutemo waKristu.” Jehovha anoda izvi kuvashumiri vake nhasi.

Kukosha Kworudo

7. Jesu akasimbisa sei chinhu chinokosha mumutemo wake paPaseka yokupedzisira ane vaapostora vake?

⁷ Kunyange rudo rwaikosha muMutemo, ndirwo musimboti, kana kuti chinhu chinonyanya kukosha, chomutemo waKristu. Izvi zvakasimbiswa naJesu paakasangana nevaapostora vake kuti vachengete Paseka ya33 C.E. Maererano nepfupiso yomuapostora Johane yezvakaitika usiku ihwohwo, mashoko aJesu aibva pamwoyo aisanganisira kutaura nezverudo ka28. Izvi zvakasimbisa kuvaapostora vake chinhu chinokosha mumutemo wake, kana kuti zvaunonyatsoreva. Zvinokosha kuti, Johane anosuma zvaanotaura nezvezviitiko zvousiku ihwohwo hunokosha nokuti: “Mutambo wepaseka usati wasvika, Jesu wakaziva kuti nguva yake yasvika, kuti abve munyika ino, aende kuna Baba, zvaakanga aida vanhu vake vaiva munyika, wakavada kusvikira pakuguma.”—Johane 13:1.

8. (a) Chii chairatidza kuti vaapostora vaigaroitirana nharo? (b) Jesu akadzidzisa sei vaapostora vake chidzidzo nokuzvininipisa?

⁸ Jesu aida vaapostora vake, nyange zvazvo akanga aedza asingabudiriri zvinooneka kuvabatsira kukurira kuda kwavo simba nezvinzvimbo kwakanyanyisa. Mwedzi yakati kuti vasati vasvika muJerusarema, ‘vakanga vaita nharo pakati pavo munzira, kuti ndiani aiva mukuru.’ Uye vava kuda kupinda muguta nokuda kwePaseka, nharo dzezvinzvimbo dzakamukazve. (Marko 9:33-37; 10:35-45) Chairatidza kuti ichi chakanga chiri chinetso chairamba chiripo ndezvakaitika vaapostora vacho vachangobva kupinda mukamuri repamusoro kuti vadye vose yaizova Paseka yavo yokupedzisira vari pamwe. Panguva iyoyo hapana akatora mukana wokuita basa retsika, rokugamuchira vaeni rokugeza tsoka dzevamwe. Kuti avadzidzise chidzidzo nokuzvininipisa, Jesu pachake akageza tsoka dzavo.—Johane 13:2-15; 1 Timotio 5:9, 10.

9. Jesu akabata sei nezvakaitika Paseka yokupedzisira yapera?

⁹ Pasinei zvapo nechidzidzo ichocho, Paseka yapera kuchengetwa uye Jesu atanga Chirangaridzo chorufu rwake rwakanga rwava kusvika, cherechedza chakaitikazve. Nhoroondo yeEvhangeri yaRuka inoti: “Nharo dzakamuka pakati pavo kuti ndiani kwavari uchanzi mukuru.” Panzvimbo pokutsamwira vaapostora vacho nokuvatsoropodza kwazvo, Jesu akavapa zano nomutsa pamusoro pokudiwa kwokusiyana nevatongi venyika vanokara kuva nesimba. (Ruka 22:24-27) Akabva apa unganzi musimboti womutemo waKristu, achiti: “Ndinokupai murayiro mutsva, wokuti mudane; sezvandakakudai imi, nemi mudanewo saizvozvo.”—Johane 13:34.

10. Jesu akapa vadzidzi vake murayiroi, uye waisanganisirei?

¹⁰ Gare gare usiku ihwohwo Jesu akataura nezvokuti rudo rwakafanana nerwaKristu rwunofanira kuva rwakakura sei. Akati: “Uyu ndiwo murayiro wangu, kuti mudane, seni ndakakudai imi. Hakuna munhu une rudo rukuru kune urwu, kuti munhu arasire hama dzake upenyu hwake.” (Johane 15:12, 13) Jesu akanga ari kuti here vateveri vake vanofanira kuda kufira vavanotenda navo kana zvinenge zviripo zvichida kuti vadaro? Ndiwo manzwisisire akaita Johane, chapupu chakaona zvaiitika panguva iyi, nokuti akazonyora kuti: “Ndozvatinoziva rudo nazvo, kuti [Jesu Kristu] wakatipa upenyu hwake; nesuwo tinofanira kupa hama upenyu hwedu.”—1 Johane 3:16.

11. (a) Tinozadzika sei mutemo waKristu? (b) Jesu akapa muenzaniso wei?

¹¹ Saka, hatizadziki mutemo waKristu nokungodzidzisa vamwe pamusoro pake. Tinofanirawo kurarama nokuita sezvaiita Jesu. Chokwadi, Jesu aishandisa mashoko akanaka, akanyatsosarudzwa muhurukuro dzake. Asi, aidzidzisawo nomuenzaniso. Nyange zvazvo Jesu aimbova chisikwa chomudzimu chine simba mudenga, akatora mukana wokuita zvinofarirwa naBaba vake pasi pano uye kuratidza mararamire atingaita. Aizvininipisa, aiva nemutsa, uye aifunga vamwe, achibatsira vaya vakanga vakaremerwa nevakadzvinyirirwa. (Mateo 11:28-30; 20:28; VaFiripi 2:5-8; 1 Johane 3:8) Uye Jesu akakurudzira vateveri vake kuti vadanane, sezvaakanga avada iye.

12. Nei zvinganzi mutemo waKristu hauderedzi kudiwa kwokuda Jehovha?

¹² Kuda Jehovha—murayiro mukuru kupfuura mimwe muMutemo—kuri munzvimbo ipi mumutemo waKristu? (Mateo 22:37, 38; VaGaratia 6:2) Nzvimbo yechipiri here? Kana! Kuda Jehovha nokuda vaKristu vatinonamata navo kwakabatanidzwa zvisingaparadzanisiki. Munhu haanganyatsodi Jehovha asingadiwo hama yake, nokuti muapostora Johane akati: “Kana munhu achiti, ndinoda Mwari, achivenga hama yake, murevi wenhema; nokuti usingadi hama yake yaakaona, ungada seiko Mwari, waasina kumuona?”—1 Johane 4:20; enzanisa na1 Johane 3:17, 18.

13. Kuteerera kwevadzidzi murayiro mutsva waJesu kwakaguma nei?

¹³ Jesu paakapa vadzidzi vake murayiro mutsva wokudanana sokuvada kwaaive aita akatsanangura zvazvaizoguma zvaita. “Vose vachaziva naizvozvi kuti muri vadzidzi vangu,” akadaro, “kana mune rudo pakati penyu.” (Johane 13:35) Maererano naTertullian, akararama makore anopfuura zana Jesu afa, rudo kudanana kwevaKristu vokutanga sehama kwakanga kwakadaro chaizvo. Tertullian akadzokorora zvaitaurwa nevakanga vasiri vaKristu vachiti nezvevateveri vaKristu: ‘Onai kuti vanodanana sei uye kuti vakagadzirira kufirana sei.’ Tingazvibvunza kuti, ‘Ndinoratidza vaKristu vandinonamata navo rudo rwakadaro zvokuti zvinoratidza kuti ndiri mumwe wevadzidzi vaJesu here?’

Maratidzire Atingaita Rudo Rwedu

14, 15. Chii chingaita kuti kuteerera mutemo waKristu kuome, asi chii chingatibatsira kuita kudaro?

¹⁴ Zvinokosha kuti vashumiri vaJehovha varatidze rudo rwakafanana nerwaKristu. Asi unozviona zvakaoma here kuda vaKristu vaunonamata navo vanoratidza udyire? Zvakanaka, sezvataona, nyange vaapostora vaiitirana nharo uye vakaedza kusimudzira zvavaifarira pachavo. (Mateo 20:20-24) VaGaratiawo vaipopotedzana. Aratidza kuti kuda muvakidzani kwaizadzika Mutemo, Pauro akavanyevera kuti: “Asi kana muchirumana nokudyana, chenjerai kuti murege kupedzana.” Apedza kuenzanisa mabasa enyama nechibereko chomudzimu waMwari, Pauro akawedzera kurayira kuti: Nga“tirege kuzvikudza, [“tichinyandura makwikwi pakati pedu,” NW] tichigodorana.” Ipapo muapostora wacho akakurudzira kuti: “Takuriranai mitoro yenyu, mugozadzisa [“Mutemo,” NW] waKristu saizvozvo.”—VaGaratia 5:14–6:2.

¹⁵ Jehovha ari kuda zvakanyanyowanda kwatiri here, zvaanoda kuti mutemo waKristu uteererwe? Nyange zvazvo zvingava zvakaoma kuva nomutsa nevaya vakatonyatsotipopotera nokutikuvadza mupfungwa, tinosungirwa ku‘va vateveri vaMwari savana vanodikanwa; nokufamba murudo.’ (VaEfeso 5:1, 2) Tinofanira kuramba tichitarira muenzaniso waMwari, “unoratidza rudo rwake kwatiri pakuti Kristu wakatifira, tichiri vatadzi.” (VaRoma 5:8) Nokutanga kubatsira vamwe, kusanganisira vaya vasina kutibata zvakanaka, tinogona kugutsikana nokuziva kuti tiri kutevedzera Mwari uye tiri kuteerera mutemo waKristu.

16. Tinoratidza sei kuda kwedu Mwari naKristu?

¹⁶ Tinofanira kuyeuka kuti tinoratidza rudo rwedu nezvatinoita, kwete chete nezvatinotaura. Nyange Jesu akamboona zvimwe zvaidiwa naMwari zvakaoma kugamuchira nemhaka yezvose zvaibatanidzwa. “Baba, kana muchida, bvisai mukombe uyu kwandiri,” Jesu akanyengetera kudaro. Asi akakurumidza kuwedzera kuti: “Asi kuda kwangu kurege kuitwa, asi kwenyu.” (Ruka 22:42) Pasinei nezvose izvo Jesu akatambura, akaita zvaidiwa naMwari. (VaHebheru 5:7, 8) Kuteerera kunoratidza rudo rwedu uye kunoratidza kuti tinoziva kuti nzira yaMwari ndiyo yakanakisisa. “Rudo rwaMwari ndirwo,” rinodaro Bhaibheri, “kuti tichengete mirayiro yake.” (1 Johane 5:3) Uye Jesu akaudza vadzidzi vake kuti: “Kana muchindida, muchachengeta mirayiro yangu.”—Johane 14:15.

17. Jesu akapa vateveri vake murayiroi wakasiyana nemimwe, uye tinoziva sei kuti unoshanda kwatiri nhasi?

¹⁷ Kunze kwokurayira vateveri vake kuti vadanane, Jesu akavapa murayiro wei wakasiyana nemimwe? Akavarayira kuti vaite basa rokuparidza raakanga avarovedza. Petro akati: “Akatirayira kuti tiparidzire vanhu, nokupupura kwazvo.” (Mabasa 10:42) Jesu akanga arayira zvakajeka kuti: “Endai naizvozvo, mudzidzise marudzi ose, muvabhabhatidze muzita raBaba, neroMwanakomana, neroMweya Mutsvene; muvadzidzise kuchengeta zvose zvandakakurayirai imi.” (Mateo 28:19, 20; Mabasa 1:8) Jesu akazivisa kuti mirayiridzo yakadaro yaizoshandawo kuvateveri vake zvino mu“nguva yokupedzisira,” nokuti akati; “Evhangeri iyi youshe ichaparidzirwa munyika dzose, chive chapupu kumarudzi ose; ipapo kuguma kuchasvika.” (Dhanieri 12:4; Mateo 24:14) Chokwadi, tinoparidza kuda kwaMwari. Asi, vamwe vangafunga kuti, kunyanyisa kuti Mwari ade kuti tiite basa iri. Asi chaizvoizvo ndizvo here?

Nei Zvingaita Sezvakaoma

18. Chii chatinofanira kuyeuka patinotambura nokuda kwokuita zvinodiwa naJehovha kwatiri?

¹⁸ Sezvataona, Jehovha akaudza vanhu kuti vaite maererano nezvinodiwa zvakasiyana-siyana munhau yose. Uye sezvo zvavakanga vanzi vaite zvakanga zvakasiyana-siyana, ndizvo zvakanga zvakaitawo rudzi rwemiedzo yavakava nayo. Mwanakomana waMwari anodiwa akawana miedzo yakaomesesa, akapedzisira aurayiwa noutsinye hwakaipisisa pamusana pokuita zvaakanzi naMwari aite. Asi patinotambura nokuda kwokuita zvinodiwa naJehovha kwatiri, tinofanira kuyeuka kuti handiye anokonzera miedzo yedu. (Johane 15:18-20; Jakobho 1:13-15) Kupanduka kwaSatani kwakaunza chivi, kutambura, uye rufu, uye ndiye akatanga mamiriro ezvinhu ayo kakawanda akaita kuti zviome zvikuru kuita zvinodiwa naMwari kuvashumiri vake.—Jobho 1:6-19; 2:1-8.

19. Nei kuita zvatakaudzwa naMwari achishandisa Mwanakomana wake kuri kuropafadzwa?

¹⁹ Achishandisa Mwanakomana wake, Jehovha akarayira kuti munguva ino yomugumo, vashumiri Vake vazivise pasi pose kuti mushonga chete wokutambura kwevanhu kutonga kwoUmambo. Iyi hurumende yaMwari ichabvisa matambudziko ose ari pasi—hondo, utsotsi, urombo, kukwegura, urwere, rufu. Umambo huchapinza paradhiso yapasi ine mbiri, muchatomutsirwa vakafa. (Mateo 6:9, 10; Ruka 23:43; Mabasa 24:15; Zvakazarurwa 21:3, 4) Kuropafadzwa zvakadini kuparidza mashoko akanaka ezvinhu zvakadai! Saka zviri pachena kuti hapana chinetso neizvo Jehovha anoda kwatiri. Tinoshorwa, asi Satani Dhiyabhorosi nenyika yake ndivo vanokonzera izvi.

20. Tingabata sei nedambudziko ripi neripi rinounzwa naDhiyabhorosi?

²⁰ Tingabata sei nedambudziko ripi neripi rinounzwa naSatani tichibudirira? Nokufunga mashoko aya: “Mwanakomana wangu, iva wakachenjera, ufadze mwoyo wangu; kuti ndigone kupindura unondishora.” (Zvirevo 27:11) Jesu akapa Jehovha mhinduro yokushora kwaSatani nokurega upenyu hwokudenga hwakachengeteka kuti aite zvinodiwa naBaba vake pasi pano. (Isaya 53:12; VaHebheru 10:7) Somunhu, Jesu akatsungirira muedzo wose wakaunzwa paari, nyange rufu padanda rokutambudzira. Kana tikamutevedzera soMuenzaniso wedu, nesuwo tinogona kutsungirira kutambura ndokuita zvinodiwa naJehovha kwatiri.—VaHebheru 12:1-3.

21. Unonzwa sei pamusoro porudo rwakaratidzwa naJehovha noMwanakomana wake?

²¹ Rudo rwakadini rwakaratidzwa naMwari noMwanakomana wake kwatiri! Pamusana pechibayiro chaJesu, vanhu vanoteerera vane tariro yokurarama nokusingaperi muParadhiso. Saka ngatisabvumira chinhu kudzikatidza tariro yedu. Panzvimbo pezvo, ngatifungisisei somunhu oga izvo Jesu akaita kuti zvibvire, sezvakaita Pauro, akati: “Mwanakomana waMwari, wakandida, akazvipa nokuda kwangu.” (VaGaratia 2:20, tisu tatsveyamisa mashoko.) Uye ngatiratidzei kuonga nomwoyo wose Mwari wedu ane rudo, Jehovha, uyo asingambodi zvakanyanyowanda kwatiri.

Ungapindura Sei?

◻ Jehovha anodei kwatiri nhasi?

◻ Pausiku hwake hwokupedzisira ane vaapostora vake, Kristu akasimbisa sei kukosha kworudo?

◻ Tingaratidza sei kuti tinoda Mwari?

◻ Nei kuita zvinodiwa naJehovha kwatiri kuri kuropafadzwa?

[Mufananidzo uri papeji 23]

Jesu akadzidzisa chidzidzoi nokugeza tsoka dzevaapostora vake?

[Mufananidzo uri papeji 25]

Pasinei zvapo nokushorwa, kutaurirawo vamwe mashoko akanaka iropafadzo inofadza