Zvinotaura Bhaibheri

VaKristu Vanofanira Kupemberera Gore Idzva Here?

“MASIKATI anotangira Usiku Hwegore Idzva anenge ane runyararo kwazvo,” anodaro Fernando, mumwe chiremba muBrazil. “Zvadaro, kunenge kuma11 usiku, vanotanga kusvika—varwere vanoramba vachiuya vane zvironda zvokubayiwa nemapanga kana kuti zvokupfurwa nepfuti, vachiri kuyaruka vanenge vakuvara mutsaona dzemotokari, uye madzimai anenge arohwa nevarume vawo. Zvose izvozvo zvinoita sezvinokonzerwa nedoro nguva dzose.”

Tichifunga zviri pamusoro apa, hazvishamisi kuti imwe magazini yokuBrazil yakataura nezvezuva rokutanga regore sezuva rebhabharasi pasi pose. Rimwe sangano renhau rokuEurope rinoti “Gore Idzva nderevanhu vasina kudzidza vane pfungwa yokuti mafaro ndiwo upenyu chete,” rakawedzerazve kuti “kumwezve kurwisana pakati pomunhu nedoro.”

Ichokwadi kuti haasi munhu wose anopemberera Gore Idzva nokunwa doro zvakanyanya uye kuita zvemhirizhonga. Kutaura zvazviri, vakawanda vanoyeuka nomufaro chiitiko chacho. “Tichiri vana, taitarisira zvikuru Usiku Hwegore Idzva,” anodaro Fernando, ane mashoko ambotaurwa. “Nguva dzose paiva nemitambo yakawanda kwazvo, zvokudya, uye zvokunwa. Pakati pousiku taizombundirana, kutsvodana, uye taikwazisana tichiti ‘Muve Negore Idzva Rakanaka!’”

Saizvozvowo, vakawanda nhasi vanofunga kuti vanoita mhemberero dzeGore Idzva pasina kupinda nomwenje mudziva. Kunyange zvakadaro, vaKristu vanoita zvakanaka kuongorora mavambo emhemberero iyi yakakurumbira uye ine zvainoreva. Mhemberero dzeGore Idzva dzinopesana nezvinodzidziswa neBhaibheri here?

Mashoko Anobva Muzvakaitika Kare

Mhemberero dzeGore Idzva hadzisi itsva. Zvinyorwa zvekare zvinoratidza kuti dzaiitwa muBhabhironi kare muchiuru chemakore chechitatu B.C.E. Mhemberero yacho, yaiitwa pakati paMarch, yaikosha kwazvo. “Panguva iyoyo mwari ainzi Marduk airatidza zvaizoitika munyika yacho mugore raizouya,” inodaro The World Book Encyclopedia. Mhemberero dzeGore Idzva dzaiitwa nevanhu vokuBhabhironi dzaitora mazuva 11 uye dzaisanganisira zvibayiro, kufamba vanhu vakaita midungwe, uye tsika dzoruzvaro.

Kwenguva yakati kuti, vaRoma vaitangawo gore ravo mumwedzi waMarch. Asi muna 46 B.C.E., Mutongi Julius Caesar akarayira kuti gore raifanira kutanga pazuva rokutanga raJanuary. Zuva iroro rakanga rakatotsaurirwa kuna Janus, mwari wezvokuvamba, uye zvino raizova zuva rokutanga regore revaRoma. Zuva racho rakachinja asi kupemberera kwacho kwakaramba kuripo. Musi wokutanga waJanuary, vanhu “vaimbosiya upenyu hwezuva nezuva vachizvifadza nezvakawanda,” inodaro Cyclopedia yaMcClintock naStrong, “uye kudavira mashura kunoshamisa.”

Kunyange nanhasi, tsika dzokudavira mashura dzinoita basa guru mumhemberero dzeGore Idzva. Somuenzaniso, mune dzimwe nharaunda dzokuSouth America, vakawanda vanogamuchira Gore Idzva vakamira negumbo ravo rorudyi. Vamwe vanoridza mabhosvo uye vanobatidza mafire crackers. Maererano neimwe tsika yokuCzechoslovakia, Usiku Hwegore Idzva inguva yokudya muto wenyemba, nepo imwe tsika yokumabvazuva kweCzechoslovakia inoita kuti vanhu vaise mari kana kuti makwande ehove pasi pejira repatafura. Tsika dzakadaro, dzinoitirwa kubvisa rombo rakaipa uye kusimbisa kubudirira, dzinongopfuudzira chitendero chekare chokuti panotanga gore ndiyo nguva yokusarudza zvichaitika.

Zvinotaura Bhaibheri

Bhaibheri rinokurudzira vaKristu kufamba “nenzira yakafanira sepamasikati, kwete mumitambo yokuzvifadza nenguva dzokunwira kudhakwa.”a (VaRoma 13:12-14; VaGaratiya 5:19-21; 1 Petro 4:3) Sezvo mhemberero dzeGore Idzva dzichiwanzova nokupfurikidza mwero kunoshorwa neBhaibheri, vaKristu havabatanidzwi madziri. Izvi hazvirevi kuti vaKristu vanofarira zvokuvhiringidza mafaro evamwe. Kusiyana neizvozvo, vanoziva kuti Bhaibheri rinoudza raudzazve vanamati vaMwari wechokwadi kuti vafare—uye nokuda kwezvikonzero zvinoverengeka. (Dheuteronomio 26:10, 11; Pisarema 32:11; Zvirevo 5:15-19; Muparidzi 3:22; 11:9) Bhaibheri rinobvumawo kuti zvokudya nezvokunwa zvinowanzova pamwe chete nokufara.—Pisarema 104:15; Muparidzi 9:7a.

Zvisinei, sezvataona, mhemberero dzeGore Idzva dzinobva mutsika dzechihedheni. Kunamata kwenhema hakuna kuchena uye kunosembura mumaziso aJehovha Mwari, uye vaKristu vanoramba miitiro ine mavambo akadaro. (Dheuteronomio 18:9-12; Ezekieri 22:3, 4) Muapostora Pauro akanyora kuti: “Kururama kune ushamwari hwei nokusateerera mutemo? Kana kuti chiedza chine mugove wei nerima? Uyezve, itsinhiranoi iripo pakati paKristu naBheriari?” Nokuda kwechikonzero chakanaka, Pauro akawedzera kuti: “Musabata chinhu chisina kuchena.”—2 VaKorinde 6:14-17a.

VaKristu vanozivawo kuti kuva nechokuita mutsika dzokudavira mashura hakuvimbisi mufaro nokubudirira—zvikurukuru sezvo kuitawo mhemberero dzakadaro kuchigona kuguma nokusadiwa naMwari. (Muparidzi 9:11; Isaya 65:11, 12) Uyezve, Bhaibheri rinokurudzira vaKristu kuva nomwero uye kuzvidzora mumufambiro wavo. (1 Timoti 3:2, 11) Zvakajeka kuti zvaizova zvisina kukodzera kune mumwe anotaura kuti anotevera zvinodzidziswa naKristu kuitawo mhemberero yakazara nokudarikidza mwero.

Pasinei nokukwezva uye kufadza pfungwa kunoita mhemberero dzeGore Idzva, Bhaibheri rinotiudza kuti “musabata chinhu chisina kuchena” uye ‘kuzvichenesa pazvinosvibisa nyama nomudzimu zvose.’ Kune vaya vanoteerera, Jehovha anovimbisa noushamwari kuti: “Ini ndichakugamuchirai. . . . Ndichava baba venyu, uye imi muchava vanakomana nevanasikana vangu.” (2 VaKorinde 6:17–7:1) Zvechokwadi, anopikira zvikomborero zvisingagumi uye kubudirira kune vaya vakavimbika kwaari.—Pisarema 37:18, 28; Zvakazarurwa 21:3, 4, 7.

[Mashoko Omuzasi]