Anobatsira Vamwe Pasinei Nematambudziko Eutano

Maria Lúcia, wekuBrazil, ane chirwere chinonzi Usher’s syndrome icho chinoita kuti vanhu vakawanda vave matsi uye zvishoma nezvishoma vapedzisire vasingachaoni. Akaberekwa ari matsi uye akadzidzira mutauro wemasaini achiri mwana mudiki. Paakanga ava nemakore anenge 30, akatanga kusaona zvakanaka. Pasinei nematambudziko ake, Maria Lúcia haana kuzviparadzanisa nevamwe. Iye zvino ava nemakore anodarika 70, asi achiri kufara uye ari kurarama upenyu hune chinangwa.

Maria Lúcia akaonana neZvapupu zvaJehovha muna 1977, paakanga achiri kuona zvakanaka. Anoti: “Ndakaonana naAdriano wandakanga ndadzidza naye kuchikoro, uyo akanga achangobva kuva Chapupu. Akandiudza nezvevimbiso yaMwari yekuti nyika ino ichava paradhiso uye kuti vanhu vachararama vaine utano hwakanaka. Ndakabayiwa mwoyo nezvaakandiudza zvekuti ndakabvuma kudzidza Bhaibheri. Munguva pfupi ndakatanga kupinda misangano neungano yaiva muRio de Janeiro, uye mimwe misangano yaiturikirwa mumutauro wemasaini. Ndichibatsirwa naJehovha ndakafambira mberi mune zvekunamata uye ndakabhabhatidzwa muna July 1978.”

Papera nguva, Maria Lúcia akatamira kuungano yakanga isina Zvapupu zvaiziva mutauro wemasaini. Pakutanga zvakanga zvakamuomera nekuti akanga asinganzwisisi zvaidzidziswa pamisangano. Hanzvadzi mbiri dzakamubatsira. Vaigara naye pamisangano uye vaimunyorera zvaidzidziswa. Maria Lúcia anoti, “Ndava kumba, ndairamba ndichiverenga zvavainge vanyora kusvikira ndava kuzvinzwisisa. Hanzvadzi mbiri idzi dzakazodzidzira mutauro wemasaini uye ndidzo dzakanga dzava kuturikira.”

Maria Lúcia paakanga ava kuwedzera kusaona, akanga asingachakwanisi kuona vaturikiri pavaisaina. Saka akatanga kusainirwa mumaoko. Izvozvo zvinoitwa sei? Anoti: “Ndinoisa maoko angu pamusoro peemunhu anenge achiturikira. Izvi zvinoita kuti ndikwanise kuziva kuti ari kuti kudii.”

Maria Lúcia anoonga chaizvo basa riri kuitwa nevanhu vanoturikira. Anoti “Vanhu ava chipo chaicho chinobva kuna Jehovha. Kundibatsira kwavari kuita kuri kuita kuti ndikwanise kunzwisisa zvinodzidziswa pamisangano uye magungano.”

Maria Lúcia anogara achiita basa rekuparidza. Anoparidzira matsi achiita zvekusainirwa mumaoko, uye vanoshamiswa nekushanda nesimba kwaanoita kuti avaudze mashoko akanaka. Munguva yeCOVID-19, Maria Lúcia akanyorera matsi tsamba dzakawanda achibatsirwa nehanzvadzi yake, José Antônio, uyo asinganzwiwo kana kuona.a

Anozviita sei? Anoti, “Ndinoshandisa chirura chepurasitiki chakaita L. Chinondibatsira kuti ndinyore mitsetse yakatwasuka uye ndigadzire ndima pandinenge ndichinyora. José Antônio anoyeuka chaizvo zvinhu zvaanenge abata. Anotaura nyaya dzemuBhaibheri nemavhesi, uye ndinoaisa mutsamba dzangu. Ndinoedza kunyora zvinonzwisiswa nevanhu vanenge vari matsi. Vamwe vanhu vanenge vari matsi havakwanisi kunzwisisa zvinhu zvakanyorwa.”

Kunyange zvazvo Maria Lúcia ava bofu, achiri kukwanisa kuita mabasa. Karoline, mumwe wevanomuturikira, anoti: “Maria Lúcia anoita mabasa ese emumba ega uye mumba make munogara makachena. Anofarira kubika uye kupa shamwari dzake zvaanenge abika.”

Mumwe mukuru wemuungano yaMaria Lúcia anonzi Jefferson anoti: “Maria Lúcia anoda Jehovha chaizvo. Anodawo vanhu. Anogara achiita zvinhu zvinobatsira vamwe. Haafungi zvakangomunakira.”—VaFiripi 2:4.