Iva Neushingi Uye Ramba Wakavimbika saBhenaya

Bhenaya aiva musoja akashinga. Aiva muuto raMambo Dhavhidhi uye akazoshandawo muuto raMambo Soromoni. Bhenaya aiva mwana wemupristi. Kazhinji vapristi nevaRevhi vaisarwa hondo kana kushandisa zvombo asi Bhenaya airwa hondo achidzivirira vanhu vaJehovha. Akaratidza kuti aiva neushingi. Pamwe pacho akatombopinda mugomba maiva neshumba akaiuraya. Akaurayawo rimwe zirume rakanga rakakura raiva rakapakata zvombo. Dhavhidhi aivimba naBhenaya zvekuti akatomuita mukuru wevarindi vake.—2 Sam. 23:​20-23.

Absaromu naAdhonija pavakapandukira Dhavhidhi, Bhenaya akaramba akavimbika kuna Dhavhidhi. (2 Sam. 8:18; 15:18; 1 Madz. 1:8) Dhavhidhi paakanga akwegura, Bhenaya akaramba achimutsigira uye akabatsira kuti Soromoni agadzwe samambo. (1 Madz. 1:​32-40) Bhenaya akaramba akavimbika kuna Jehovha uye kumadzimambo akagadzwa naMwari kunyange vamwe pavaipanduka.

Nesuwo tinofanira kuva neushingi kuti tirambe tichirwisa muvengi wedu ane simba, Satani, nevaya vanomutsigira. Uye tinofanira kuita zvese zvatinogona kuti tirambe tichiteerera mitemo yaJehovha. (VaEf. 6:11; 1 Pet. 5:​8, 9) Kunyange kana vamwe vakasiya Jehovha, isu tinoramba takavimbika kwaari tichiziva kuti achatipa mubayiro.—2 Sam. 22:26.