Batsira Vamwe Kuti ‘Vateerere Zvichibva Pamwoyo’
1. Jehovha anodei kune vanomunamata?
1 Kuteerera kunokosha kuti tinamate Jehovha sezvaanoda. (Dheut. 12:28; 1 Pet. 1:14-16) Nokukurumidza, Jehovha achatonga “vaya vasingazivi Mwari nevaya vasingateereri mashoko akanaka.” (2 VaT. 1:8) Tingabatsira sei vamwe kuti pane zvinodzidziswa neShoko raMwari, ‘vateerere zvichibva pamwoyo’?—VaR. 6:17.
2. Nei zvichikosha kubatsira vamwe kuti vavake kutenda kwakasimba?
2 Nokubatsira Kuwedzera Kutenda uye Rudo: MuMagwaro, kuteerera kunonyanya kufambidzana nokutenda. Muapostora Pauro akataura nezvo“murayiro waMwari asingaperi kuti kuteerera kusimudzirwe pachishandiswa kutenda.” (VaR. 16:26) Chitsauko 11 chaVaHebheru chinotaura mienzaniso yakawanda yokutenda, yakawanda yacho yaisanganisira kuita maererano nezvinodiwa naJehovha zvaakataura. (VaH. 11:7, 8, 17) Asi, kusateerera kunofambidzana nokushayiwa kutenda. (Joh. 3:36; VaH. 3:18, 19) Tinofanira kuwana unyanzvi pakushandisa Shoko raMwari kuti tibatsire vamwe kuti vave nokutenda kunoita kuti vateerere.—2 Tim. 2:15; Jak. 2:14, 17.
3. (a) Kuteerera kunofambidzana sei norudo? (b) Tingabatsira sei vadzidzi veBhaibheri kuti vasvike pakuda Jehovha?
3 Kuteerera kunofambidzanawo nokuda Mwari. (Dheut. 5:10; 11:1, 22; 30:16) “Kuda Mwari kunoreva izvi,” inodaro 1 Johani 5:3, “kuti tichengete mirayiro yake; uye mirayiro yake hairemi.” Tingabatsira sei vadzidzi veBhaibheri kuti vawedzere kuda Jehovha? Pamunenge muchidzidza, tsvaka mikana yokuita kuti vawedzere kuda unhu hwaJehovha. Taura madire aunoita Mwari iwe pachako. Batsira mudzidzi kuti afunge nezvokuva noukama naJehovha iye pachake. Kupfuura zvinhu zvose, kuda Jehovha kuchaita kuti vamwe uye isu, titeerere Jehovha zvichibva pamwoyo.—Mat. 22:37.
4. (a) Nei muenzaniso wedu uchikosha? (b) Chii chatinofanira kuita kuti tive no“mwoyo unoteerera”?
4 Nomuenzaniso Wedu: Nzira ine simba yatingakurudzira nayo vamwe kuti vateerere mashoko akanaka ndeyomuenzaniso wedu. Zvisinei, tinofanira kuramba tichiedza kuti tive no“mwoyo unoteerera.” (1 Madz. 3:9; Zvir. 4:23) Izvi zvinosanganisira chii? Simbisa mwoyo wako nokudzidza Bhaibheri uye kupinda misangano nguva dzose. (Pis. 1:1, 2; VaH. 10:24, 25) Shamwaridzana nevaya vane mwoyo yakabatana mukunamata kwechokwadi. (Zvir. 13:20) Itawo ushumiri nguva dzose, uine chido chokubatsira vanhu vari mundima yenyu nomwoyo wose. Nyengetera kuna Jehovha kuti atungamirire kuti tive nomwoyo wakanaka. (Pis. 86:11) Usaita zvinhu zvingakanganisa mwoyo wako, zvakaita sounzenza kana kuti varaidzo yechisimba. Ita zvinhu zvinokuswededza pedyo naMwari uye zvinosimbisa ukama hwako naye.—Jak. 4:7, 8.
5. Vaya vanoteerera vari kukomborerwa sei?
5 Jehovha akavimbisa vanhu vake vekare kuti aizovakomborera kana vaizoteerera inzwi rake. (Dheut. 28:1, 2) Saizvozvowo nhasi, Jehovha ari kukomborera zvikuru “vaya vanomuteerera somutongi.” (Mab. 5:32) Naizvozvo, ngatibatsirei vamwe kuti vateerere zvichibva pamwoyo nokudzidzisa kwedu uye nomuenzaniso wedu.