Kunzwisisa Kwaungaita Bhaibheri
2. Verenga Uine Chido Chokurinzwisisa
Shamwari yako yakambokuudza here zvinhu zvakaipa nezvomumwe munhu wawakanga usati wamboona? Pawakazoona munhu wacho, zvawakanga waudzwa neshamwari yako zvakakutadzisa here kuona unhu hwakanaka uye zvaanogona kuita? Zvakadai zvinogonawo kuitika kana wava kuverenga Bhaibheri.
MUAPOSTORA Pauro akanyevera nezvezvinogona kuitika kana tikatadza kuverenga Bhaibheri tiine chido chokurinzwisisa. NezvevaJudha vemunguva yake, Pauro akanyora kuti: “Ndinovapupurira kuti vanoshingairira kushumira Mwari; asi havazviiti maererano nezivo yakarurama.”—VaRoma 10:2.
Vamwe vaJudha ivavo vemuzana remakore rokutanga vakanga vasingadi kugamuchira chokwadi chokuti Magwaro echiHebheru akataura zvakajeka kuti: Mesiya aiva ani. Zvakatsanangurwa nezvaJesu wekuNazareta zvainyatsoti geje nezvinhu zvakanga zvafanotaurwa nezvaMesiya uye akazadzisa uprofita hwose. Asi, vaJudha vakanga vasingadi kuchinja mafungiro avo havana kukwanisa kunzwisisa Shoko raMwari.
Nyaya yomuBhaibheri iyi inotidzidzisei? Zvinokosha kuti tiverenge Bhaibheri tiine chido chokurinzwisisa. Kana muverengi akada kuomerera pamafungiro aagara ainawo anogona kutadza kunzwisisa chokwadi cheBhaibheri.
Somuenzaniso, mumwe purofesa wezvidzidzo zvezvitendero muNorth Carolina, kuU.S.A., anotsanangura Bhaibheri achiti “ibhuku revanhu, rine pfungwa dzevanhu, uye dzakawanda dzacho dzinosiyana-siyana uye hapana inogona kunyatsotitungamirira pamararamiro atinofanira kuita.” Saka, kana munhu akaverenga Bhaibheri achiti “ibhuku revanhu,” haazogumisiri here ava kungosarudza mitemo uye dzidziso zvinoenderana nezvaanofarira?
Asi, Bhaibheri rinotikurudzira kuti tiridzidze nomwoyo wose. Nezvevanhu vokuBheriya vomunguva yaPauro, Magwaro anoti: “Vakagamuchira shoko nepfungwa dzinoda kwazvo, vachinyatsoongorora Magwaro zuva nezuva kana zvinhu izvi zvakanga zvakadaro.” (Mabasa 17:11) Sevaverengi ivavo, unofanira kuverenga Bhaibheri uine chido chokunzwisisa zviri mariri. Verenga Shoko raMwari uine chido chokunzwisisa mashoko oMunyori wacho anonakidza zvikuru.