Vabereki Vanoramba Kusarura Kwomudzidzisi

Mudzidzisi wemagiredhi okutanga muCassano Murge, Italy, akatumira mapepa okunamira nevamwe vevaanodzidzisa. Mapepa okunamira aya, akanga achida kuiswa pasuo rapamberi, aive nechiziviso chokuti: “Tiri vaKaturike. Zvapupu zvaJehovha zvinokumbirwa kusagogodza pasuo rino.”

Vamwe vevabereki vevana vacho, kunyange vakanga vasiri Zvapupu zvaJehovha pachavo, vakaramba zvakasimba zvakaitwa nomudzidzisi uyu. Maererano nemagazini yenhau inonzi Muoviti Muoviti, vabereki vacho vakati ‘kupa vana mashoko akadai kunovaita kuti varambe munhu upi noupi asingafungi zvavanoita kana kusada kutamba nomumwe nokuti ane chitendero “chakasiyana.”’ Mumwe mubereki akanyorera kumagazini yacho akadana pepa rokunamira racho kuti “mbeu yamasora, mwanasikana wokusaziva uye wokupusa.”

Sezvinoratidzwa nomushumo uyu, vanhu vane pfungwa dzakanaka vanoziva ngozi dzokudyara mbeu dzokusarura. Vanoremekedzawo ushumiri hwechiKristu hunoitwa neZvapupu zvaJehovha muItaly yose uye pasi pose. Wadii kubvunza Zvapupu nokuda ‘kwechikonzero chetariro iri mazviri’? Zvichada kuikurukura newe kwazvo, zvichiita kudaro “noruremekedzo rukuru.”—1 Petro 3:15.