Bhaibheri Rinogona Kutibatsira Here Nhasi?

“TIKATORA Bhaibheri rose zvaro, chinenge chikamu chimwe muzana chakakodzera kurava, asi zvimwe zvose hazvina basa uye ndezvechinyakare.” Rakadaro rimwe jaya. Vakawanda vangabvumirana naro. Kunyange Bhaibheri richipfuurira kuva bhuku rinotengwa kukunda mamwe munyika yose, mamiriyoni haanyanyi kufunga nezvaro uye haana kujairana nezvarinodzidzisa.

Munyaya yaro ya1996 yeKrisimasi, pepanhau rekuGermany rinonzi Süddeutsche Zeitung rakatsinhira kuti Bhaibheri riri kuva “nevaravi vari kuramba vachiderera. Munguva ino yemarudzi akasiyana-siyana esayenzi uye kuwedzera kwezvinoitwa munyika yose, nhau dzemuBhaibheri dzinoita sedzinoshamisa uye dzakaoma kunzwisisa kune vakawanda.” Kuongorora kwakaitwa kunotsigira mushumo uyu. Kumwe kuongorora kunoratidza kuti nhamba huru yevana haitombozivi chaizvoizvo kuti Jesu ndiani. Mune kumwe kuongorora, vasingasviki hafu yevanhu vakabvunzwa ndivo vaikwanisa kutsanangura nyaya yemwanakomana mupambadzi uye muSamaria ane ushamwari.

Bhuku reSwiss Evangelical Church rinonzi Reformiertes Forum rinoti kudiwa kweBhaibheri muSwitzerland kwasiyana nezvakwaive kwakaita. Kunyange pakati pevane Bhaibheri, rinowanzoita huruva riri pasherufu. MuBritain mamiriro ezvinhu haana kusiyana. Maererano nekumwe kuongorora, kunyange vanhu vazhinji vaine Bhaibheri, vazhinji kwazvo havana kumborirava.

Asiwo, mamiriyoni munyika yose anofunga nezveBhaibheri nenzira yakasiyana. Anoriona seShoko raMwari uye anoti rinokosha uye rinobatsira. Nokudaro, anorirava nguva dzose. Mumwe mukadzi wechiduku akanyora kuti: “Ndinoedza kurava chitsauko chimwe kana zviviri zveBhaibheri zuva rimwe nerimwe. Ndinonakidzwa naro zvikuru.” Vanhu vakadaro vanonyatsoteerera zvinodzidziswa neBhaibheri, uye vanoedza kushandisa zano raro muupenyu hwavo. Vanodavira kuti Bhabheri rinogona kuvabatsira munyika ino yatambura.

Iwe unofungei? Bhaibheri harina basa mumazuva ano here? Kana kuti rinokosha uye kuti rinobatsira here? Bhaibheri rinogona kutibatsira here nhasi?