Kuchengetedza Zita Rakanaka

KUNYATSOONGORORA mufananidzo wakaisvonaka kunogona kuva chiitiko chine mubayiro. Achinyatsotarisisa, mumwe achaona kuti munyori wemifananidzo akashandisa sei mazana emitsara yebhuracho kuisa mavara akasiyana-siyana pamucheka.

Nenzira yakafanana, zita rakanaka rinotangwa, kwete nemutsara mumwe wakafara webhuracho, sokunge zvakadaro, asi nezviito zviduku zvakawanda kwenguva yakareba. Hungu, zvishoma nezvishoma mukurumbira wedu unokura nokuda kwezvatinoita.

Neimwe nzira, mutsara mumwe webhuracho ukaiswa pasiripo unogona kuderedza ukoshi hwemufananidzo. Ndizvo zvimwe chete nezita redu. Mambo akachenjera Soromoni akati: “Upenzi hwomunhu hunokanganisa nzira yake.” (Zvirevo 19:3) Zvinongoda hunonzi upenzi hushomanene—zvichida kuputika nehasha kune chisimba, kunyanyisa muzvinwiwa zvinodhakisa, kana chiito chounzenza chisina kuchena—kushatisa mukurumbira wako wakaisvonaka. (Zvirevo 6:32; 14:17; 20:1) Nokudaro, zvinokosha sei, kuti tiedze kuwana zita rakanaka uye toshanda noushingi kuti tirichengetedze.—Enzanisa naZvakazarurwa 3:5.