Bhaibheri—Bhuku Rakatanhamara

Rakanzi ibhuku rinotengeswa zvikuru kupfuura mamwe ese munyika, uye ndizvo zvariri. Bhaibheri rinoverengwa nekukosheswa kupfuura rimwe bhuku ripi neripi. Kusvikira panguva ino, rinofungidzirwa kuti rakaparadzirwa (rose kana kuti chidimbu charo) mumakopi mabhiriyoni mana mumitauro inopfuura 2 000.

Zvisinei, chinotofadza zvikuru kupfuura kuparadzirwa kweBhaibheri, kutaura kwaro kwekuti rakanyorwa naMwari. “Rugwaro rwose rwakafuridzirwa naMwari,” akanyora kudaro muapostora wechiKristu Pauro. (2 Timotio 3:16) Izvozvi zvinorevei? Kutaura kwekuti “rwakafuridzirwa naMwari” (chiGiriki, the·oʹpneu·stos) kunoreva kuti “rwakafemerwa naMwari.” Rimwe shoko rakafanana rechiGiriki, pneuʹma, rinoreva kuti “mudzimu.” Nokudaro, chokwadi ndechekuti mudzimu mutsvene waMwari wakasunda vanhu vainyora, uchiita sekunge waivafemera, zvokuti mugumisiro wacho waigona zvechokwadi kunzi Shoko raMwari, kwete remunhu. Chokwadi, vazhinji vakafunda Bhaibheri vanoshamiswa nekutsinhirana kwaro kwose, kururama kwaro mune zvesayenzi, kutendeseka nekunanga kwaiita vanyori varo, uye chinokosha zvikurusa, uporofita hwaro hwakazadzikwa—zvose zvakapwisa mamiriyoni evaverengi vanofunga kuti bhuku iri rinobva kumanyuko akakwirira kupfuura munhu.a

Asi Mwari akanyatsotungamirira sei kunyorwa kweBhaibheri? Vamwe vanotaura kuti akaita zvekutaura mashoko ose ari muBhaibheri. Vamwe vanotaura kuti akangofuridzira chete pfungwa dzinowanwa muBhaibheri, kwete mashoko acho. Kutaura chokwadi, zvisinei, kufuridzira hakugoni kuva muitiro mumwe chete, nokuti Mwari akataura “kuna madzibaba muvaporofita nemigove mizhinji, uye nemitoo mizhinji.” (VaHebheru 1:1; enzanisa na1 VaKorinte 12:6.) Munyaya inotevera, tichanzvera nzira dzakashandiswa naMwari kutaura nevanhu 40 avo vakanyora Bhaibheri.

[Mashoko Omuzasi]