Mari Dzine Zita raMwari

TARISISA mari dzesirivha dzinoratidzwa pano. Yakagadzirwa namambo weGermany Wilhelm V mukati mokutonga kwake kubvira muna 1627 kusvikira kuna 1637. Panguva yacho, Europe yepakati yakanga iri muHondo Yamakore Makumi Matatu, kurwisana pakati pavaKaturike navaPurotesitendi. Wilhelm V akatsigira zvinangwa zvechiPurotesitendi. Kuti aripire ndyiko huru yerwisano yacho, iye akatora sirivha yake yose ndokugadzira mari nayo.

Nenzira inofadza, mifananidzo iri padzakawanda dzemari dzacho inoratidzira zuva rakatenderedza zita raMwari, Jehovha, muchimiro cheTetragrammaton yechiHebheru. Panewo muti womuchindwe, uyo unoratidzira simba. Revo yacho ndeyokuti muti wacho, kunyange zvazvo wakakombamiswa nemhepo, unoramba usingatyoki mudziviriro yaMwari. Runyoro rwechiLatin rwuri pamari yacho rune zita rokuti Jehovha uye runoratidzira chivimbo mutarisiro yake yokudzivirira.

Panzvimbo pokukumbira dziviriro yaMwari, kushandiswa kwakadaro kwezita raMwari zvirokwazvo kwakanga kuri kusina maturo, nokuti Jehovha haatsigiri rwisano dzamasimba masimba dzorudzi rwomunhu. Zvirokwazvo, Hondo Yamakore Makumi Matatu yaisagona kuve yakawana tendero yaMwari. “Mukuwirirana nefungidziro dzokungwarira,” rinodaro Funk & Wagnalls New Encyclopedia, “isiri pasi pehafu yavanhu veGermany vakaparara mukati mehondo. Maguta eGermany asingaverengeki, mataundi, misha, uye mapurazi zvakaparadzwa chose chose. Zvinenge zvikamu zviviri zvezvitatu zvezvivako zvenzvimbo dzamabasa okugadzira zvinhu, zvokurima, uye zvezvokutengeserana zveGermany zvakaparara.”

Kushandiswa kwezita rokuti Jehovha paidzi mari kunoyeuchidza murayiro wakapiwa kuna Israeri, wokuti: “Usareva zita raJehovha Mwari wako pasina.” (Eksodho 20:7) Zvisinei, idzi mari dzinopupura kuti zita roumwari, Jehovha, ranguve richizivikanwa navanhu muGermany. Unosanoziva sei Mwari ane zita iroro?