Vazivisi voUmambo Vanoshuma

Vechiduku Vanozivisa Mashoko Akanaka muAfrica

NOKUKURUMIDZA pashure porumuko rwaJesu, mumwe murume weAfrica akanga achishanyira Jerusarema. Bhaibheri haripi zita rake. Anozivikanwa bedzi so“muranda mukuru kwazvo waKandase, mambokadzi weEtiopia, waichengeta fuma yake yose.” Neiko achidudzwa muBhaibheri? Nemhaka yokuti ngirozi yakarayira muevhangeri wechiKristu Firipo kuti azivise kwaari “mashoko akanaka pamusoro paJesu.” Uyu muEtiopia akanga ari mugari womuAfrica wokutanga akanyorwa kuva mutezo weungano yechiKristu.—Mabasa 8:26-39, NW.

Nhasi, kune mazana ezviuru eZvapupu zvaJehovha muAfrica. Zvinoshandisa mukana uri wose kugoverana navamwe mashoko akanaka pamusoro paJesu. Zvakaitika zvinotevera zvinoratidza kuti kunyange vechiduku muAfrica vane basa rokuita muna ikoku.

◻ Sandy naPriya, vasikana vaviri vane makore 11 muNairobi, Kenya, vakanga vari vavakidzani. Vaifarikanya kutamba pamwe chete uye kuchinjana mabhuku engano. Vabereki vaPriya vakavamba kufunda Bhaibheri neZvapupu zvaJehovha. Zvino Priya akanga ava namabhuku matsva okusarudza kuti awedzere kumuunganidzwa wake, kubatanidza rimwe zvikurukuru iro rakava raanofarira, KuTerera kunoMudzidzisi muKuru, rakabudiswa neWatchtower Bible and Tract Society. Akagoverana bhuku rake raMudzidzisi muKuru neshamwari yake Sandy, uye vasikana vaviri vacho vakavamba kurifunda nguva dzose.

Zvisinei, amai vaSandy, Una, vaipinda Anglican Church uye vaisada kuti mwanasikana wavo arave mabhuku anobva kuZvapupu zvaJehovha. Pasinei zvapo nechishoro chaamai vacho, fundo yacho yakapfuurira. Mumwe musi Sandy akateterera kuna amai vake kuti vateerere kurukurirano yavo kamwe chete. Ganhuro iro vasikana vakarava zuva iroro raiva nomusoro unoti “Varume Vaviri Vakachengeta Mazuva Okuberekwa.” Una akateerera uye akaororwa zvikuru. Akasvika nokukurumidza amai vaPriya nemibvunzo yakawanda yeBhaibheri.

Amai vaPriya vakaronga kuti Chapupu chifunde Bhaibheri naUna. Nokukurumidza Una amene akanga ava kugoverana izvo akanga achidzidza nemushandi biyake Dolly. Munguvayi, Priya ana makore 11 okukura akapfuurira kuita fambiro mberi ndokusarudza kuratidzira tsauriro yake kuna Jehovha Mwari kupfurikidza norubhapatidzo rwomumvura pakokorodzano yoruwa yeZvapupu zvaJehovha. Pakokorodzano imwe cheteyo, kumufaro mukurusa waPriya, Una naDolly vakabhapatidzwawo!

◻ Kune dzimwe nyika dzeAfrica uko basa reZvapupu zvaJehovha risina kunyoreswa. Munyika imwe yakadaro, kune muitiro wavose wokushivira mibato yorudzidziso nezvitendero zveZvapupu. Mune chimwe chikoro munyika iyoyo, mumwe mukomana ane makore manomwe okukura nomunin’ina wake ane makore matanhatu okukura—vana veZvapupu—vakabvumirwa kuzvihesvura vamene mukati menguva yeminyengetero yorudzidziso.

Rimwe zuva mudzidzisi mutsva akarayira kuti vakomana vacho vakumbanire mumunyengetero navamwe vana. Mukomana mukuru akaramba uye akarohwa nomudzidzisi wacho. Munin’ina wake, Shadrack ane makore matanhatu okukura, akaomerera pakuda kuona mukuru wechikoro muhofisi yake. Mukuru wechikoro nomudzidzisi mutsva wacho vakamubvunza chikonzero nei vakanga vasingadi kukumbanira navamwe. Vakamubvunza kana akanga achitya kurohwa navabereki vake. Akapindura muchiArab chakanaka zvikuru, achiti: “Aiwa, Mwari wandinonamata haasati ari Mwari wenyongano asi wenhevedzano. Handigoni kuva mumwe weZvapupu zvaJehovha kumusha uye worumwe rudzidziso kuchikoro!” Somugumisiro, akahesvurwa.

Mushure mokubhapatidzwa, murume weEtiopia anodudzwa mubhuku raMabasa “akafamba rwendo rwake, achifara.” (Mabasa 8:39) Nenzira yakafanana nhasi, vazivisi voUmambo munyika yakakura yeAfrica vari kufara muropafadzo yavo yo‘kuzivisa mashoko akanaka pamusoro paJesu.’—Mabasa 8:35.