Waizopa Zvakawanda Sei nokuda Kwaihwohwu?

IWE unoziva nezvechinhu chipi nechipi chinokosha kwazvo zvokuti waizorega nokudisa chinhu chiri chose chaunacho kuti uve nacho here? Jesu akadaro, uye akataura nezvacho kuvateveri vake.

Iye akati: “Ushe hwokudenga hwakafananazve nomutengi unotsvaka maparera akanaka. Akati awana parera rimwe rino mutengo mukuru, akaenda, akandotengesa zvose zvaakanga anazvo, akaritenga iro.”—Mateo 13:45, 46.

Mutengesi iyeyo akanga achidisa kurega chinhu chiri chose kuti ave ne“parera,” Umambo hwaMwari. Neiko? Nemhaka yokuti hakuna chinhu munyika ino chinoenzana nahwo. Umambo hwaMwari huchapedza zvinetso izvo munhu ave asingakwanisi kupedza, zvakadai sehondo, nzara, utsotsi, uye dzvinyiriro. (Pisarema 72:4-8, 13, 14) MuUmambo, kunyange chivi, hosha, uye rufu hazvisati zvichizovamozve. (Zvakazarurwa 21:4, 5) Hakushamisi kuti chikumbiro chechipiri choMunyengetero waShe (“Baba Vedu”) ndeichi, “Umambo hwenyu ngahuuye”!—Mateo 6:9, 10, NW.

Chii chawaizopa kuti ugoverane muzvikomborero zvoUmambo? Kutaura idi, zvikomborero zvacho ndezvapachena. Asi kuti uzvifarikanye, unofanira kuziva chiri Umambo, kudavira kuti chinhu chaichoicho, uye kuhupa nzvimbo yokutanga muupenyu hwako. Unogona kuita izvozvo here? Kuna mashoko ari muBhaibheri achakubetsera. Kuregerereiko kubvumira Zvapupu zvaJehovha kukubatsira mukudzidza pamusoro poUmambo hwaMwari nokuwana kuti hunogona sei kukubetsera kunyange zvino.