Mhuri Inodenhwa!

“MHURI isangano rekaresa ravanhu. Munzira dzakawanda ndiro rinokosha zvikurusa. Iyo ndicho chinhu chinokosha zvikurusa chenzanga. Shambidziko dzose dzakapukunyuka kana kuti dzakanyangarika, kuchitsamira pakuti upenyu hwemhuri hwakanga hwakasimba kana kuti hwakaneta here.”

Yakadaro The World Book Encyclopedia shure muna 1973. Achirangarirwa mumurangariro wanhasi, zvisinei, mashoko iwayo anova nechimiro chinotyisa, chinodokuva chisingafadzi. Makore mashomanene apfuura akapupurira chakaenzana nedenho yakananga paupenyu hwemhuri. Mupi wezano akakurumbira John Bradshaw anonyora, kuti: “Mune ngwavaira mumhuri nhasi. . . . Mwero wakakwirira wechatanuro, nyongano dzavechiduku, kushandiswa zvisina kufanira kukuru kwemirimo, vatano yakapararira yehama dzokunyama, hosha dzine chokuita nezvokudya uye kurova ufakazi hwokuti chimwe chinhu chakaipa zvikuru.”

Zvamazvirokwazvo, “ufakazi hwokuti chimwe chinhu chakaipa zvikuru” nemhuri hunogona kuwanwa munyika yose. The Unesco Courier yakati pamusoro pomugariro wacho muEurope: “Chifo cha 1965, kwave kune wedzero huru muchiverengero chechatanuro munyika yose. . . . [Kwave] kune wedzero muchiverengero chemhuri dzine mubereki mumwe.” Nyika dziri kubudirira nenzira yakafanana dziri kuona wedzero munhamo yemhuri. Munyori Hélène Tremblay anoti: “Nokuda kwamamirioni avanhu anogara munzanga dzakaziva nzira yenguva dzose, inodeya kutaurwa, isingachinji youpenyu kwamazana amakore, nhasi inguva yenyongano.”

Inokatyamadza zvikuru ndiyo mhoteredzo iri mumisha yakawanda nhasi. MuUnited States moga, mamirioni pamusoro pamamirioni avana ari kurerwa nomubereki chidhakwa. Kwave kunewo wedzero inokatyamadza mumasimba masimba emhuri. Mubhuku ravo Intimate Violence, vanzveri Richard Gelles naMurray Straus vanoshuma, kuti: “Sezvingabvira zvikuru uchadenhwa mumuviri, kurohwa, uye kuurawa mumusha mako umene nomudiwa kupfuura imwe nzvimbo ipi neipi, kana kuti nomunhu upi noupiwo zvake munzanga yedu.”

Kana kupukunyuka kweshambidziko kuchitsamira chaizvoizvo pasimba remhuri, pane chikonzero chokutyira nguva yemberi yeshambidziko. Zvisinei, jambwa reshambidziko ringava duku zvikuru rokunetseka kwako. Kupfuura zvingabvira zvikuru itiro hanya yako ndeicho nyongano yakadaro ingaratidzira nokuda kwemhuri yako. Chii chichava muuyo? Mhinduro inobva mumanyuko ane chiremera ingasanokushamisa zvikuru.