Neiko Jehovha Akazivisa Zita Rake?

Tsinhiro dzinotsanangura “Testamende Yekare” dzakabudiswa muPoland muna 1964 dzakapindura uyu mubvunzo nenzira inonyandura mufungo zvikuru. Pasi petendero yeChechi yeRoma Katurike, Dr. Stanisław Łach, purofesa weLublin Yunivhesiti, akati:

“Vanhu vakadzikinurwa vane mutoro wezita raMwari pamberi porudzi rwomunhu.” Wakanga uri mutoro wavaIsraeri kuita nhamburiko “kuti Vamarudzi varumbidze zita raJahwe [Jehovha] uye kuti vasazvidze” iro. “Jahwe ane revo . . . Nyika ichatongwa kuchitsamira pakuita kwaavo vanobvuma zita iroro.” Purofesa akazivisa kuti “zita rokuti Jahwe richava guru pakati pamarudzi . . . Iro richapararira pamusoro penyika yose. Wakadaro wakanga uri mugumo . . . wezita iroro kuna Mosesi.”

Hungu, Maraki 1:11, (NW) inoporofita, ichiti: “‘Zita rangu richava guru pakati pamarudzi,’ Jehovha wehondo akadaro.” Uye ndivanaani nhasi vari kuzivisa zita iroro munyika yose kuitira kuti “munhu ari wose anodana pazita raJehovha achaponeswa”? Zvapupu zvaJehovha! Kuita kwavanhu kuava “vanhu vezita rake,” hungu, “ava vanobvuma zita iroro,” inhau youpenyu norufu kwavari. Chii chiri kuita kwako kuna Jehovha neZvapupu zvake?—Mabasa 2:21; 15:14; enzanisa naMaraki 3:16-18.