Iwe Unoyeuka Here?

Ko wakapa mufungo wokungwarira kuzvinyorwa zvemisi ichangobva kupfuura iyi zveNharireyomurindi here? Kana kwakadaro, iwe zvimwe uchakwanisa kuyeuka zvinotevera:

◻ Pauro anoshandisa shoko rokuti “mureveri” pakunongedzera kuna Jesu pana 1 Timotio 2:5, 6 mupfungwai?

Murugwaro urwu, Pauro anoshandisa shoko rechiGiriki me·siʹtes nokuda kwo“mureveri,” riri shoko rine revo yapamutemo, naizvozvo iye haasi kushandisa iri shoko mupfungwa yakafara inozivikanwa navose mumitauro yakawanda. Nokudaro, Pauro haasi kutaura kuti Jesu ndiye Mureveri pakati paMwari norudzi rwose rwomunhu. Panzvimbo pezvo, iye ari kunongedzera kuna Kristu soMureveri wapamutemo wesungano itsva, iyo yakavanzarika hwaro hwokuti vateveri vakazodzwa vaKristu vagoverane naye muUmambo hwake hwokudenga. (2 VaKorinte 5:1, 5; VaEfeso 1:13, 14; VaHebheru 8:7-13)—8/15, mapeji 30, 31.

◻ Pana Mateo 25:34, chii chinoreva Jesu apo iye anoti kuvanhu vakafanana namakwai: “Mugare nhaka youshe hwakagadzirwemi kubva pakuvamba kwenyika”?

Jesu haana kureva kuti ava vakafanana namakwai vachatonga naye mudenga. Panzvimbo pezvo, makwai achagara nhaka nzvimbo yapasi yoUmambo hwakavagadzirirwa “kubva pakuvamba kwenyika” yorudzi rwomunhu runodzikinurika. Neiyi nzira ivo vanova vana vapasi va“Baba Vasingagumi” wavo, Mambo, Kristu Jesu. (Isaya 9:6, 7, NW)—9/1, peji 20.

◻ Kungava kuri madikanwa here kuti vakasarira vakazodzwa vave vapenyu pasi pano kuti vagamuchire vachidzoka vakatendeka vanomutswa avo vakafa pamberi pa 33 N.V.?

Aiwa, ikoku hakusati kwaizova kuri madikanwa. Vazhinji veboka guru avo vachapukunyuka dambudziko guru zvino vari kurovedzwa kutarisira mutoro wokuronga. Naizvozvo, ivo vaizova vanokwanisa kutarisira mugariro iwoyo nokurovedzanisa vanomutswa ne“pasi idzva” pasi pa“matenga matsva.” (2 Petro 3:13, NW)—9/1, mapeji 20, 21.

◻ Zvinhui zvinobatanidzwa muku“poneswa”? (Mabasa 16:30)

Chinodikanwa chikurusa ndeichi: “Tenda kunaShe Jesu, ugoponeswa.” (Mabasa 16:31) Ikoku kunobatanidza kupinza zivo yakarurama yamadonzo aMwari nenzira yake yoruponeso. Ipapo kutenda kunofanira kushandiswa muna Jesu Kristu soMumiriri Mukuru woruponeso. (Johane 3:16; Tito 2:14) Ikoku kunoisa muKristu mumugariro wokuponeswa, asi iye zvino anofanira kupfuurira mukuita kuda kwaMwari ndokupfuurira kunamatira kuzvose zvezvinodikanwa zvaMwari kwoupenyu hwake hwose hwasara. Panguva iyeyo bedzi iye achaponeswa kuupenyu husingagumi. (Mateo 24:13)—9/15, peji 7.

◻ Kutenda kwaNoa kwakashurikidza sei nyika? (VaHebheru 11:7)

Kuteerera kwaNoa namabasa akarurama zvakaratidzira kuti vamwe kunze kwake nemhuri yake vangadai vakapukunyuka Mafashamo kudai vakanga vave vachidisa kuchinja mutoo wavo woupenyu. Pasinei zvapo nedzvinyiriro dzakabva munyama yake amene isina kukwana, nyika yakamupoteredza, uye Dhiabhorosi, Noa akabvumikisa kuti kwaibvira kurarama upenyu hwaifadza Mwari.—10/1, peji 11.

◻ Neiko tichifanira kudzivisa kunyange guhwa risina kukomba?

Tingaita tsinhiro isina kurehwa kukuvadza munhu upi noupi, asi iri guhwa rinoratidzika kuva risina mhaka ringava rinokuvadza apo rinodzokororwa, kunatswa, kana kuti kumonyaniswa, zvokuti rinokuvadza mukurumbira womunhu anotaurwa pamusoro pake, kumutorera zita rake rakanaka. (Zvirevo 20:19)—10/15, peji 13.

◻ Ndedzipi dziri betsero apo vakwanyina veroorano vanenge vakaiswa pajoko zvakafanira?

Murume nomudzimai vanokwanisa kukurudzirana pamusoro pokunamata Mwari wavo. Uyewo, vanogona kutarira kuMagwaro nokuda kwenhungamiro mukupedza misiano yavo.—11/1, peji 20.

◻ Mirairo ine Gumi inogona sei kutibetsera nhasi?

Iyo inozivisa murangariro waJehovha pazvinhu uye inobatira sezviyeuchidzo zvomusengwa wedu wokuda Mwari nomuvakidzani. (Mateo 22:37-39; 2 Timotio 3:16, 17)—11/15, mapeji 5, 6.

◻ Mwari akataura panhamboi nhatu Jesu navamwe vanhu vachinzwa?

Nhambo yokutanga yakanga iri nguva yorubhapatidzo rwaJesu rwakaitwa naJohane Mubhapatidzi (Mateo 3:17); yechipiri yakanga iri apo Jesu akashanduka chitarisiko Jakobho, Johane, uye Petro vachiona (Mateo 17:5); uye yechitatu yaiva pana Nisani 10, mazuva mana pamberi porufu rwaJesu, apo inzwi raMwari rakanzwiwa neboka rakanga rimire mutembere. (Johane 12:28)—12/1, peji 8.