“Kupindura Nenzira Yakananga”

MUMHARIDZO yapaGomo, Jesu akanongedzera ku“Mutemo naVaporofita.” Chikamu chechitatu chaMagwaro echiHebheru chakanga chiri Manyoro, ayo akabatanidza mabhuku amadetembedzo zvakadai saMapisarema naZvirevo. (Mateo 7:12; Ruka 24:44) Izvozviwo zvaiva nouchenjeri hwaMwari.

Somuenzaniso, zvirevo zvakanyevera vatongi muna Israeri wakare, kuti: “Unoti kuno wakaipa: ‘Wakarurama,’ vanhu vachamutuka, nendudzi dzichamusema. Asi vanomuraira, vachaitirwa zvakanaka; ropafadzo yakanaka ichauya pamusoro pavo. Unopindura [nenzira yakananga, NW], unosveta miromo.”—Zvirevo 24:24-26.

Kudai mutongi akatera kudzvinyiriro dzefufuro kana kuti chizivano uye akazivisa kuti wakaipa akarurama, vamwe vaizomuona saasina kukodzera nzvimbo yake. Chokwadi, kunyange mitezo ye“ndudzi” dzaVamarudzi iyo yakanzwa nezvechakaipa chakadaro chokutonga vaizoita nokunyomba! Pane rumwe rutivi, kudai mutongi akatsiura noushingi munhu akaipa ndokupindura nenzira yakananga kunhau iripo, iye aizowana ruremekedzo norudo zvavanhu. Vanhu vose zvavo vaizosundwa kumushuvira “ropafadzo yakanaka.” Chirevo chinokutaurazve, chichiti: “Unopindura [nenzira yakananga, NW], unosveta miromo.”

Kusveta kwakadaro kwakaratidzira kuremekedzana—pakati pomupi wezano naavo vanocherechedza tsiuro yake yakananga. Zvichida kunyange munhu ari kutsiurwa amene aizogamuchira zvakanaka ndokuratidza chidakadaka nokuda kwomutongi. Zvirevo 28:23 inoti: “Unorairira munhu uchaona nyasha pashure, kupfuura iye unobata kumeso norurimi rwake.” Avo vanobatira savakuru veungano nhasi vanofanira naizvozvo kudzivisa ushamwari kana kuti ukama hwemhuri kushatisa rutongeso rwavo. Kupfurikidza nokupa zvakananga zano rinodikanwa, vakuru vachawana ruremekedzo rweungano.