“Ngatirambane!”
Imba yasakara inoratidza kuti haisi kutarisirwa. Kwemakore, yakapfuura nomumadutu akawanda, asi haina kuakunda ose. Iye zvino imba yacho haisisina kusimba, uye inoratidza kuti ingangowondomoka chero nguva.
IZVOZVO ndizvo zvakaita ukama hwevakaroorana vakawanda mazuva ano. Wakambofungawo here kuti ukama hwako newawakaroorana naye ndizvo zvahwava kuda kuita? Kana kuri kuti ndizvo, iva nechokwadi chokuti hapana vakaroorana vasina matambudziko. Kutaura chokwadi, Bhaibheri rinobvuma kuti vaya vanoroorana “vachasangana namatambudziko mazhinji.”—1 VaKorinde 7:28, Bhaibheri Dzvene.
Chimwe chikwata chevanotsvakurudza, chakatsigira kuti izvi ndezvechokwadi pachairondedzera nezvekuroorana chichiti “kuroorana kuri kuitwa nevanhu vakawanda munharaunda kune mikana yakawanda yokuti kungangotadza kubudirira.” Chakawedzera kuti: “Ukama hwevakaroorana hunotanga huchinakidza zvokunakidza zviya vachiita zvavakavimbisana, pakupedzisira hunogona kuzova chinhu chinovhiringidza uye chinorwadza zvakanyanyisa muupenyu hwavo.”
Zvakadini noukama hwako newawakaroorana naye? Pazvinhu zviri pasi apa, pane zviri kuitika kwamuri here?
Kugara muchingopopotedzana
Kukandana magara mwoyo
Kuita gumbo mumba gumbo kunze
Kuchengeta chigumbu
Kana kuri kuti ukama hwako newawakaroorana naye hwava zinyekenyeke uye kuti hungangoparara chero nguva, zvii zvaungaita? Kurambana ndiko kuzvipedza here?