“Kutungamirirwa Nomudzimu waMwari”

Gungano Reruwa reZvapupu zvaJehovha

◼ ZVIURU zvemagungano eruwa aya emazuva matatu, akatanga kuUnited States musi waMay 23 kusvika musi wa25, achaitwa mumwedzi iri kuuya mumaguta akawanda munyika yose. Muna 2007 vanhu vanopfuura mamiriyoni 12 vakapinda magungano anopfuura 3 200 akadaro!

Munzvimbo dzakawanda gore rino, purogiramu dzacho dzichatanga zuva roga roga na9:20 mangwanani nokurira kwomumhanzi. Musoro wehurukuro yomusi weChishanu unobva pana Johani 16:13, unoti, ‘Mudzimu Uchakutungamirirai Muchokwadi Chose.’ Hurukuro dziri pokutanga dzinosanganisira idzi dzinoti, “Nei Tichifanira Kutungamirirwa Nomudzimu?” uye “Mudzimu Mutsvene—Wakashanda Mukusika!” Hurukuro yokusiyirana inoti, “Vakatendeka Vekare—Vaitungamirirwa Nomudzimu waMwari” ichasanganisira zvikamu zvinoti, “Munguva yaMosesi,” “Mumazuva eVatongi,” uye “Muzana Remakore Rokutanga.” Hurukuro inokosha inoti, “Basa Romudzimu Mutsvene Mukuitwa Kwechinangwa chaJehovha,” ndiyo ichagumisa purogiramu yemangwanani.

Chikamu chokutanga musi weChishanu masikati chichange chichiti “Mhinduro Dzemibvunzo Ine Chokuita Nomudzimu Mutsvene,” ichizoteverwa nehurukuro dzinoti, “Mudzimu Unoongorora . . . Zvinhu Zvakadzama zvaMwari” uye “Ivai Vanzwi uye Vaiti veShoko raMwari.” Hurukuro yokusiyirana inoti, “Vechiduku—Fambai Nomudzimu Mutsvene!” ine zvikamu zvinoti, “Kuchikoro,” “Kubasa,” “Mumhuri,” “Muungano,” “Pamunenge Muchisharanganya,” uye “Pamunenge Muri Moga.” Purogiramu yacho ichaguma nehurukuro inonakidza chaizvo pagungano racho inoti, “Vechiduku—Chengetedzai Ukama Hwenyu naJehovha!” ichabatsira vechiduku kuti vadaro.

Musoro wehurukuro yomusi woMugovera uchange uchiti “Kudyara Nokuda Kwomudzimu,” unobva pana VaGaratiya 6:8. Purogiramu yemangwanani ichasanganisira hurukuro yokusiyirana ine zvikamu zvitatu inoti, “Kutungamirirwa Nomudzimu waMwari Muushumiri Hwedu.” Purogiramu yacho ichaguma nehurukuro yorubhabhatidzo, zvadaro, vaya vanokodzera vachapiwa mukana wokubhabhatidzwa.

Hurukuro yokutanga masikati oMugovera ichange ichiti, “Vanyori veBhaibheri—‘Vaitungamirirwa Nomudzimu Mutsvene,’” ichateverwa nehurukuro yokusiyirana ine zvikamu zvishanu inoti, “Tinopiwa Simba Nomudzimu Mutsvene” “Rokurwisa Miedzo,” “Rokutsungirira Kuneta Nokuodzwa Mwoyo,” “Rokutsungirira Kutambudzwa,” “Rokuramba Kufurirwa Nevezera Redu,” uye “Rokutsungirira Nhamo.” Zuva racho richaguma neimwe hurukuro inonakidza pagungano racho inoti, “Rambai Muri Murudo rwaMwari.”

Purogiramu yomusi weSvondo ichange iine musoro unoti “Rambai Muchifamba Maererano Nomudzimu,” inobva pana VaGaratiya 5:16. Hurukuro yokusiyirana ine zvikamu zvipfumbamwe ine musoro unoti “Ivai ‘Nezvibereko Zvomudzimu’” ichakurukura chibereko chimwe nechimwe chomudzimu chinotaurwa pana VaGaratiya 5:22, 23. Hurukuro yavose inoti, “Kohwa Zvikomborero Nokuna Mambo waJehovha Anotungamirirwa Nomudzimu!” ndiyo ichagumisa purogiramu yemangwanani. Hurukuro inokosha mupurogiramu yemasikati iwayo ichange iri yomutambo unenge uine vatambi vanenge vakapfeka zvomunguva yekare une musoro unoti, “Usasiya ‘Rudo Rwawaiva Narwo Pakutanga.’” Unoratidza maitiro uye mamiriro ezvinhu angangodaro aivapo pavaKristu zana remakore rokutanga rava kunopera. Gungano racho rinoguma nehurukuro inoti, “Kushumira Takavimbika Musangano raJehovha Rinotungamirirwa Nomudzimu.”

Ronga iye zvino kupinda gungano racho. Kuti uwane nzvimbo iri pedyo, enda paImba yoUmambo yeZvapupu zvaJehovha yokwaunogara kana kuti nyorera vabudisi vemagazini ino.