Huta Ikkummarono Misiyoone Ikke Soqqamoomma

Ilamoommahu 1951 Ostiriyaho Veena yinanni katamiraati; maatenke Kaatoolikete ammaꞌno haꞌrunsitannoreeti. Huta ikkummarono, Maganu noota ammaneemma hattono duucha woyite huuccatto assiꞌreemma. Ani 9 diriti heeꞌreenna anniꞌya Yihowa Farciꞌraasine ledo Qullaawa Maxaafa xiinxalla hanafi; gedensoonni amaꞌyano xiinxallitu.

Mulenni Veenaho noota Dobilingi yinanni songo haꞌra hananfummo. Maatenke mitteenni lowore assitanno. Qullaawa Maxaafa nabbambe xiinxallineemmo, songote gambooshshe haꞌneemmo hattono jajjabbu gambooshshiwa uminke fajjonni soqqammeemmo. Anje noomma yannara anniꞌya Yihowa lubbora baxeemma gede kaaꞌlinoe. Isinni, anniꞌya aninna rodooꞌya suwisaano ikkineemmo gede huuccatto assanno. Ane mixo kayinni tenne diꞌꞌikkitino.

WOꞌMA YANNA SOQQANSHO HANAFUMMA

Cuuamoommahu 1965 14 diriti heeꞌreeti. Ikkirono, soqqanshonniwa afoommakki manna shiqe hasaawisa qarra ikkitannoe. Qoleno, aneneeto woffi asse hedanni qarrameemma hattono wolootu wedellooti ayirrissaera hasiꞌreemma. Hakko daafira cuuamummahunni boode yanna gedensaanni Yihowara soqqantannokkiriwa aana hanafumma. Insa ledo aante baxoommaha ikkirono, lowo yanna Yihowa Farciꞌraasine ikkitinokkiri ledo sayiseemma daafira tiiꞌꞌiꞌya bushiishannoe. Ikkirono, tenne biddi assiꞌrate wolqa hoogoomma. Kaaꞌlinoeri maatiyya?

Hatte yannara Doorooti yinanniti wedellitte rodoo songonke daggu. Ise minunni mine hadhe diinaggaabbe soqqantanno gari dhagge ikkinoe. Ani shiima geeshsha isera bayiꞌreemmaha ikkirono hakkeya soqqanshote worba diꞌꞌikkoomma. Hakkiinni togo yee hedumma: ‘Ane anninna ama Yihowa Farciꞌraasineeti; Doorooti maate kayinni Yihowa Farciꞌraasine diꞌꞌikkitino. Ise dhiwantino amase towaaxxitanni heedhenni woꞌmanka woyite soqqansho fultanno!’ Ise lawishshi Yihowara albinni roore soqqameemma gede kakkayisinoe. Hakkunni gedensaanni, mulenni Doorootinna ani suwisaano ikkine mitteenni soqqama hananfummo. Umo kaaꞌlaano suwisaano ikkinummo; hakkiinni woꞌma yanna suwisaano ikkinummo. Doorooti laala dancha lawishsha ikkiteennae anino diinaggaaweemmata ikkumma. Ise mite yee Qullaawu Maxaafi xiinxallo hanafisiiseemma gede kaaꞌlitinoe. Hakkiinni, sunu sununni manna minensa mare, doogotenna wole bayicho hasaawisa roore shota ikkitinoe.

Woꞌma yanna suwisaancho ikkumma diro, Heenzi yinanni rodii songonke dayi. Isi halaale macciishshinohu Kanaadaho heeꞌrannoha Yihowa Farciꞌraasincho ikkino rodoosi laꞌꞌara marinowaati. Heenzi songonke Veena dayinohu baxxino suwisaancho ikkeeti. Iso daanni heeꞌreennanni baxoomma. Isi misiyoone ikka hasiꞌranno; anera kayinni misiyoone ikke soqqamate hasatto dinoe. Hakko daafira umi qara baxoommasita afara dihasiꞌroomma. Ikkirono, gedensoonni Heenzinna ani baxillu jaalooma amandummo; hakkiinni adhammummo hattono suwisaano ikkine Ostiriyaho mitteenni soqqama hananfummo.

MISIYOONE IKKE SOQQAMATE MIXO FUSHSHIꞌRUMMA

Heenzi misiyoone ikke soqqama halchannota duucha hige kulannoe. Isi misiyoone ikkeemma gede xixxiiwe egenninoekkiha ikkirono, tenne daafira hedeemma gede assitanno xaꞌmuwa xaꞌmannoe; lawishshaho, “Oosotero dinonkena Yihowara kawiinni saꞌne soqqama didandiinammokka?” yaannoe. Huta ikkoomma daafira misiyoone ikke soqqama lowo geya waajjoomma. Hige suwisaancho ikke soqqamanni noomma; misiyoone ikke soqqama kay horo dandeemmakkire lawinoe. Ikkirono, Heenzi tenne daafira heda agureemmakki gede cince kaaꞌlinoe. Qoleno isi umiꞌya daafira yaada agure woloota kaaꞌlate daafira hedeemma gede jawaachishinoe. Amaalesi lowo geeshsha kaaꞌlitinoe.

Sunu sununni, misiyoone ikkate hasattoꞌya lexxitino daafira Giliyaadi Rosi Minira eate forme wonshinummo. Ikkirono, mittu sinu biirora soqqamanno rodii balaxe Ingilizete afoo coyiꞌrate dandooꞌya woyyeessiꞌreemma gede kulie. Sase diro Ingilizete afoo coyiꞌrate dandooꞌya woyyeessiꞌrate sharramummahu gedensaanni, Ostiriyaho Salzibergi yinanniwa Serbo Kiroeshiyu afoo coyiꞌnanni songora gaamminketa lowo geya dhagge assiꞌnummo. Konne afoo coyiꞌranno mannira, woradu aliidi laꞌꞌaano ikkine soqqammoommohu mittu diri ledo lamala diro sabbankoommo. Serbo Kiroeshiyu afii shota ikka hoogirono batinye Qullaawu Maxaafi rosaano noonke.

Hakkiinni 1979 “fooliishshote” Bulgaariya haꞌneemmo gede kullinke. Hatte gobbara sabbakate loosonke agamboonni. Hakko daafira hakkiicho horo disabbankoommo. Kayinni, qaru katamira Soofiyaho heeꞌrannori onte roduuwinkera maanxe shiimmaadda borruwa massineemmonsa. Lowo geeshsha waajjoommaha ikkirono, Yihowa konne dhagge ikkanno looso looseemma gede kaaꞌlinoe. Amande usurransara dandiinanniha ikkirono, kuri roduuwi worbuullenna hagiirraamma ikkinota huwatoomma; insa lawishshi Yihowa dirijjite uyitannoe loosi ikkihano ikkiro, loosate danduummare baala asseemma gede jawaante ikkinoe.

Hatte mereero Giliyaadi Rosi Minira galagalle forme wonshinummo; hakkiinni woshshininke. Konne roso Yunayitidi Isteetisete Ingilizete afiinni ronseemmo yine hendoommo. Kayinni, Bocaasa 1981 Giliyaadi Roso Jarmanennite sinu biirora Wesbadeni yinanniwa ronseemmo gede koyinsinke. Hakko daafira, konne roso Jarmanete afiinni ronsummo. Kuni qaali anera roore leellannoeho. Mama gaammankekka?

LOWO OLI NOO GOBBARA SOQQAMA

Gaammoonninkehu Keeniyahooti! Ikkirono, Keeniyunniti sinu biiro, hatte gobba mule noote Ugaandu gobbara haꞌne soqqama hasiꞌneemmoronna teꞌee xaꞌmitunke. Tonnu diri albaanni Ayidi Amiini yinannihu olantote roorrichi Ugaandu gobba gashshoote galche silxaane adhino. Hakko dirinni hanafe isi gashshooti yannara, lowo kume ikkanno manni reyino hattono lowo miliyoone ikkanno manni buuto qarramino. Hakkiinni 1979 Ugaandu gashshooti galagale qeelamino. Olu batiꞌrinota togoo gobba haꞌra waajjeemmahu mayiraatiro lellannoꞌneha lawannoe. Kayinni Giliyaadi Rosi Mini Yihowa addaxxineemmo gede kaaꞌlinonke. Hakko daafira haꞌrate maahoyye yinoommo.

Ugaandu gobbara heeshsho lowo geya qarraho. Gashshootu waa, caabbichonna wole hasiisanno coye shiqisha didandiino. Silkeno diloossanno. Roorenkanni hashsha mannu mimmitu ledo tokkosamanno hattono mulqiꞌraano batidhino. Hakko daafira hashsha mannu mininni difulanno; hattono mooraano dagge mulqidhannonsakki woy shitannonsakki gede huuccatto assiꞌranno. Hatte gobbara togoo qarri heeꞌrirono hakko heedhanno roduuwi Yihowara soqqama diagurtino.

Hakkiinni, 1982 Heenzinna ani Ugaandunniha qara katama Kampaala haꞌnummo. Ontu agani geeshsha Saaminna Kiristiina Wesiwa yinanni minaanninna minaama mine ontu qaaqquullinsanna shoolu fiixinsa ledo heeꞌnummo. Kuri minaanninna minaama hattono maatensa duucha woyite sagale barrunni mitte higge calla ittanno; ikkirono wosina adhansa lowo geeshsha dhagge ikkitannote. Insawa heeꞌnoommo yannara Heenzinna ani misiyoone ikkine soqqammummo woyite kaaꞌlinonkeha lowo roso ronsoommo. Lawishshaho, shiimu wayinni hayishshiꞌneemmo garanna hayishshiꞌnoommo waa shumate mine horoonsiꞌneemmo gara ronsoommo. Hakkiinni, 1983 Heenzinna ani hakkeya gawajjanno coyi nookki qooxeessira mine afiꞌnummo.

Soqqansho lowo geya banxoommo. Mittu agani giddo calla 4,000 saꞌanno metseete elloommota qaageemma! Kayinni mannu halaale macciishshe adhanno gara laꞌꞌa roore hagiirsiissanno. Insa Magano ayirrissanno hattono Qullaawu Maxaafi daafira hasaawa hasidhanno. Heenzinna ani duucha woyite, mittu mittunku 10-15 geya ikkanno manna Qullaawa Maxaafa xiinxallinseemmo. Hattono Qullaawu Maxaafi rosaanonkewiinni lowore ronsoommo. Lawishshaho, insa lamalate kiiro gambooshshe hadhannohunna higgannohu lekkatenni ikkirono, digunguntanno hattono woꞌmanka woyite faasiiqootaho.

Qoleno 1985-1986 geeshsha Ugaandu gobbara lamu oli kaino. Duucha woyite shiimmaadda ooso olanto ikkite jawa massaara qodhite keellaho agartanna laꞌneemmo. Hatte yannara hasatto noonsa manna hanseemmo woyite, wodanchineemmorenna wodanaaꞌmineemmore ikkineemmo gede kaaꞌlankera Yihowa huucciꞌneemmo. Yihowano huuccattonkera dawaro qolino. Sabbankeemmo sokka macciishshe adhanno manninni xaandeemmo woyite duucha woyite waajjillinke baꞌꞌanno.

Wole gobbanni Ugaanda dayino mannirano farciꞌnoommo. Lawishshaho, mereerimu Ruusiyinni Tataristaani yinanniwiinni dayinore Muraatinna Dilbaari yinanni minaanninna minaama Qullaawa Maxaafa xiinxallinsoommo. Muraati akimichaho. Kuri minaanninna minaama halaalu minira dayino; hattono hatte yannanni kayise Yihowara ammaname soqqamanni no. Gedensoonni Yukireenetenni dagginnote iseneeto shaate heddanni noote Tatiyaana Vileyiska yinanni mancho ledo xaadoomma. Tatiyaana cuuantuhu gedensaanni Yukireene higgino hattono gedensoonni borruwanke tirate looso kaaꞌla hanaffino.a

FONQOLO IKKINONKEHA WOLE COYE

Hakkiinni 1991 Heenzinna ani fooliishshote Ostiriya haꞌnoommowa heeꞌneenna sinu biiro Bulgaariyaho soqqammeemmo gede kultunke. Soojjaati Awuroppira komuniizimete gashshooti uwihu gedensaanni Bulgaariyaho Yihowa Farciꞌraasine loosi higge affinoha ikki. Aleenni qummi assummante gede, hatte gobbara loosonke agambe heeꞌnoonni yannara Heenzinna ani borronke maanxe massineemmo. Xa kayinni hakkira sonkoonninkehu sabbankammoraati.

Ugaanda hingeemmokki gede kulloonninke. Hakko daafira, uduunnenke adhate woy jaallanke keerunni yaate misiyoone ikkine heeꞌnoommo mininkera hingummokkinni Jarmanete Beeteele haꞌnummo; hakkiinni makeena uyineennanke Bulgaariya haꞌnummo. Qaru katamira Soofiyaho, mite 20 ikkitanno halashshaano noo gaamora soqqammeemmo gede kullinke.

Bulgaariyaho qarra ikkannohu batinyu coyi tuncu yiinonke. Umihunni, hatte gobbara coyiꞌnanni qaale didandiineemmo. Tenneno agurranna, Bulgaariyu afiinni qixxaabbino borro Hegere Heeshshowa Massanno Halaale yaanno maxaafaatinna Qullaawu Maxaafi Xagge Roseemmo Maxaafaꞌya yaanno maxaafa callaho. Qullaawu Maxaafi xiinxallo hanafisiisano qarra ikkitinonke. Togoohu qarra ikkanno coyi heeꞌrirono laalaatte soqqantannoti shiima gaamo ayyaanaamittetenni lophitino. Ortodokisete Beetekiristaane tenne affuti qarra kalaqqino.

Hakkiinni, 1994 Yihowa Farciꞌraasine loosi higge affinoha ikkasi gattu; hattono Yihowa Farciꞌraasine mannu gawajjitanno ammaꞌno gede asse laꞌꞌa hanafi. Mito roduuwa amande usurroonni. Xaadooshshu buusira Yihowa Farciꞌraasine qaaqquulle shitannoha calla ikkikkinni, ammaꞌnonsa miilla insaneeto shitanno gede ammansiissanno yine ninke daafira waajjo kapho tareessa hananfi. Henziranna anera fulle sabbaka qarra ikkitinonke. Soqqanshonniwa xaandeemmo manni duucha woyite hanqe coyiꞌrannonke, polise woshshanno hattono mitore aanaho ollolannonke. Borruwanke hatte gobba eessanna gambooshsheho addaraashe karaayyaꞌꞌa qarra ikkitinonke. Isinni, mitte yannara jawa gambooshshe assiꞌnanni heeꞌneenna polise dagge hooltinonke. Heenzinna ane mannu togo giwe diegenninonke. Tenne gobba manni Ugaandaho heeꞌrannohu halaale macciishshe adhanno manniwiinni lowo geeshsha baxxinoho! Konne qarra dandiine saꞌneemmo gede kaaꞌlinonkeri maati?

Hakko noo roduuwiwa aananke hagiirraamma ikkineemmo gede kaaꞌlitinonke. Insa halaale macciishshansanni hagiirraammaho hattono ninke assineemmonsare naaddanno. Insa baalunku mimmitunniwa aantanno hattono kuꞌu koꞌonne kaaꞌlitanno. Ninke tennenni, uyinanninke loosi ikkihano ikkiro uminke daafira ikkikkinni wolootu daafira hendeemmoha ikkiro hagiirraamma ikka dandiineemmota ronsoommo.

Ikkirono, gedensoonni coyi woyyaawanni haꞌrino. Loosinke 1998 galagale higge affinoha ikki hattono Bulgaariyu afiinni batinye borronke qixxeessa hananfi. Hakkiinni 2004 haaro sinu biiro minne maassiinsi. Xaa yannara Bulgaariyaho 57 songora 2,953 halashshaano no. Saihu soqqanshote diro Qaagooshshu Ayyaanira 6,475 manni gamba yiino. Mitte yannara qaru katamira Soofiyaho onte roduuwi callu no; xa kayinni hakko katamira 9 songo no! Addanko ‘ajjino ilama kume ikkitanna’ laꞌnoommo.—Isa. 60:22.

FAYYIMMATE QARRA DANDEE HEEꞌRA

Fayyimmate qarrino waadinoe. Lowo diro muje dhibbanni waaddinoe; mitte isinni umu giddo kalaqantinoe. Tenne muje cararetenni xagisiꞌroomma; hattono Hindete gobbara akimootu umu giddo nooe muje darte fushshitanni 12 saate woꞌma keeshshitino. Woyyae geeshsha Hindennite sinu biirora keeshshummahu gedensaanni galagalle soqqamate Bulgaariya hingoommo.

Hatte mereero Heenzi Hantingiteni yinannihu sirchunni daanno dhibbi waada hanafisi. Isira qaafa, coyiꞌranna hasiꞌri gede milli yaa qarra ikkitusi. Isira dhibbu lexxanni haꞌrita baalankare asseemmasiti ane ikkumma. Mito woyite wolqa baeemma; xaate iso konni garinni towaata didandeemma yee hedoomma. Ikkirono, Boobi yinannihu mittu wedellichu rodii ganye Heenzi soqqansho haaꞌre fulanno. Boobi, Heenzi coyiꞌranna hasiꞌrino gede milli yaa dandaannokki daafira manna disaalanno. Ani dandeemmakki yannara Boobi woꞌmanka woyite Heenzi kaaꞌlanno. Heenzinna ani tenne alamera ooso ila hooga doodhinoommoha ikkirono, Yihowa uyinonkeha Boobi beettinke gede assine laꞌneemmo!—Maq. 10:29, 30.

Heenzi kaanserete dhibbino waadannosi. Muxxe minaanniꞌya 2015 fooliishshiꞌrino. Tennera lowo geeshsha dadilloomma. Heenzi reyihu gedensaanni callimma macciishshantinoe hattono tenne ammane adha qarra ikkitinoe. Ikkirono, xaano isi lubbote noohu gede asse hedeemma! (Luq. 20:38) Barru baala isi shaqqillunni coyiꞌrannorenna amaalannoeta kaajja amaale qaageemma. Lowo diro mitteenni ammanamme soqqammoommo daafira lowo geeshsha tashshi yaannoe.

YIHOWA KAAꞌLINOE DAAFIRA GALAXXEEMMASI

Yihowa iillinoe qarra baala dandee saeemma gede kaaꞌlinoe. Qoleno isi waajja qeeꞌle mannu daafira hedeemma misiyoone ikkeemma gede kaaꞌlinoe. (2 Xi. 1:7) Yihowa galatamona xa maaꞌne rodooꞌyanna ani woꞌma yanna soqqansho soqqammanni heeꞌnoommo. Xaa yannara isenna minaannise Serbiyaho woradu aliidi laꞌꞌaano ikke soqqamanni no. Ninke shiinqaaddu heeꞌneenna anniꞌya huucciꞌrino huuccattora Yihowa dawaro qolino!

Qullaawa Maxaafa xiinxalla giddoyidi keere afiꞌreemma gede assitinoe. Qarru yannara Yesuusi gede “albinni roore hige hige eeggifate” huucciꞌra rosoomma. (Luq. 22:44) Yihowa Soofiyu katamira Nadeshida yinanni songora noo jaallaꞌya baxillenna danchumma leellishshannoe gede asseno huuccattoꞌyara dawaro qolino. Insa ledonsa yanna sayiseemma gede koyissannoe hattono duucha woyite naaddannoeta kultannoe; tini lowo geeshsha hagiidheemma gede assitinoe.

Duucha woyite kaote daafira hiinceemma. Anniꞌyanna amaꞌya adhami wari gede ikke biifinori mininke waalchira uurre noore laꞌꞌanni noommahu gede asse hedeemma. Rodooꞌya sagale qixxeessitanni noohu gede asse hedeemma. Qoleno Heenzi farashshisi mule uurre noohu gede asse hedeemma. Konni garinni hedaꞌya gara ikkitinokki hedo hooꞌleemma gedenna Yihowa galaxxeemma gede assitinoe.

Heeshshoꞌyanna albillittete yanna daafira hiincaꞌya Faarso 27:13, 14 Daawiti coyiꞌrino hedora woꞌma giddoꞌyanni sumuu yeemma gede assitinoe; qummeeshshu togo yaanno: “Lubbotenni heeꞌre Kaaliiqi assanno danchumma, afummokkinni digateemmo. Kaaliiqa hexxi; jawaati; wodanikkino kaajjo; Kaaliiqa hexxi.”