Nabbawaano Xaꞌmitanno Xaꞌmo

Sabbakate looso loosa agurreemmohu mamooteeti?

Yesuusi togo yiino: “Daga baalate naqaashshe ikkanno gede, Maganu Gashshootiha dancha duduwo uulla woꞌmate dudumbanni; hakkiinni goofimarchu daanno.” (Mat. 24:14) Konni qummeeshshira hattono kiiro 6 nna 13 ‘goofimarcho’ yine tirroonnihu Giriikete afii qaali telosi yaannoho. Kuni qaali Sheexaanu alame Armagedooninni baꞌannota jeefote yanna leellishannoho. (Aju. 16:14, 16) Hakko daafira goofimarchu daara shiima yanna gatta geeshsha dancha duduwo duduwa diagurreemmo. Tini bashsho huwantoommo gara biddi assinanni gede kaaꞌlitanno.

Bashsho, Batiꞌra Baabiloone baꞌeenna quuxxote qarri hanafanno woyite, dancha duduwo duduwa agurreemmo yine ammanneemmo. (Aju. 17:3, 5, 15, 16) Tini ikkito, Yihowahu ‘maarote diri’ goofinota leellishshannote yine hendeemmo. (Isa. 61:2) Qoleno quuxxote qarra gatte saꞌannori, kuni qarri hanafara albaanni Yihowara ammanantinore ikkansa leellisha hasiissannonsa yine ammanneemmo. Kuni manni 607 K.A. Yerusaalamete baonni gatinohu Ayihudete manni gedeeti yine hendeemmo. Ayihudete manni Yihowa magansiꞌrannohanna bunshe giwannoha ikkino daafira, baotenni gatanno gede balanxe malaate worroonninsa. (Hiz. 5:11; 9:4) Ikkirono, tini Yesuusi Maatewoosi 24:14 coyiꞌrino hedo ledo sumuu diyitanno; kuni qummeeshshi, mannu goofimarchu daara albaanni yaano Armagedooni hanafara shiima yanna gatta geeshsha dancha duduwo macciishshate faro afiꞌrara dandaannota leellishanno.

Maatewoosi 24:14 noo hedo huwantoommo gara biddi assinoonni daafira, kaadete gedee sokka daafira kultannota Ajuuja 16:21 noo hedo huwantoommo garano biddi assa hasiissanno. Tenne hajo daafira lende xiinxallinummoti lamunku qummeeshshi xaadooshshe afiꞌrinota huwantoommo. Hiittoonni? Mannu Maganu Gashshooti sokka macciishshansa woy macciishsha giwansa tenne huwanteemmo gede kaaꞌlitannonke. Soqqamaasinchu Phaawuloosi “gatote doogora noorira” danchu duduwi “heeshshote suꞌniille” ikkinota borreessino. Maganu diinnara kayinni, busha duduwooti yaano “reyote fooleeti.” (2 Qo. 2:15, 16) Kuni manni insa baxxanno alame busha, Sheexaanu gashshannotanna muli yannara baꞌannota ikkitinota leellishshanno daafira, Maganu Gashshooti sokka giwanno.—Yoh. 7:7; 1 Yo. 2:17; 5:19.

Qoleno lawishshunnihu kaadete qoomami “lowo geeshsha” batiꞌra ikkannota wodanchi. Tini hedo quuxxote qarri yannara sabbakate loosi albinni roore kaajjado ikkannota yaano, Yihowa suꞌmi konni albaanni ikke egenninokki garinni egennamannota leellishshannota ikkitara dandiitanno. (Hiz. 39:7) Hattenne gooffe daggino yannara yaano Batiꞌra Baabiloone baꞌuhu gedensaanni mitu manni kulleemmo sokka heeshshote suꞌniilli gede asse laꞌꞌakka? Laꞌꞌannoha ikkara dandaanno. Insa Yihowa Farciꞌraasine kaphu ammaꞌno baꞌannota lowo diro dudubbanni keeshshitinota qaaggara woy huwattara dandiitanno.

Tini hunda Gibitsete tonnu qoomami dirri waro ikkinori ledo mitto garaati. Yihowa ‘Gibitsete maganna baala qorichishihu’ gedensaanni, Israeelete wido ikkinokkihu “wolu lowo manni” Maganu manni ledo fulino. (Ful. 12:12, 37, 38) Kuni wole gobba manni Yihowawa higinohu Muse tonnu qoomami daafira kulinori woꞌmanna laihu gedensaanni ikkara dandaanno.

Batiꞌra Baabiloone baꞌuhu gedensaanni Yihowawa higanno manni, uullate gattinori Kiristoosi roduuwira danchare assate qoosso afiꞌranno. (Mat. 25:34-36, 40) Yesuusi yoo yaanno woyite, insa geꞌreewoho yaansara hasidhuro Armagedooni hanafara albaanni heeshshonsa biddi assiꞌra hasiissannonsa; hatte yannara uullate aana gattinori buurantinori iimira hadhanno.

Tini biddi assinoonni hedo Yihowa baxillinna maaro lowo geeshsha jawa ikkitinota luphi assitanno. Addanko, isi “baalunku maaro eara ikkinnina ayino baꞌꞌara [dihasiꞌranno].”—2 Ph. 3:9.