Qullaawa Maxaafa Tirranni Woyite Haꞌrunsinanni Biddishsha

Mitootu Qullaawa Maxaafa qaalunni qaale noo gedeenni tira, nabbawanno manchi umo borreessinoonni qaali sayisanno sokka roore huwatanno gede kaaꞌlitanno yitanno. Ikkollana kuni woꞌmanka woyite dandaamannore diꞌꞌikkino. Hatto yineemmohu mayiraatiro leellishannoha hanni boode lawishsha laꞌno:

• Lamu afiiti afuu jirte, qaallate batinyinna coyi fooliishsho kalanqanni gari fiire mitto gara diꞌꞌikkanno. Ibiraawootu Afii fullahaanchi Saamueeli Dirayiver, “Mittu afii woluwiinni babbaxxannohu afuu jirtenninna qaalu kaiminni calla ikkikkinni . . . mitte hedo coyi fooliishshonni xawinsanni garinnino babbaxxanno” yee borreessino. Addi addi qaale coyiꞌranno manni hedanno garino addi addiiti. Pirofeeseri Dirayiver lede, “Hakko daafira addi addi qaalinni coyi fooliishsho kalanqanni gari babbaxxanno” yiino.

• Xaa yannara, hunda Qullaawa Maxaafa borreessinoonnihu Ibiraawootu, Aremayiketenna Girikete Afii ledo woꞌmunni woꞌma mittu garita qaallate batinyenna afuu jirte afiꞌrinohu mittu qaalino dino. Hakko daafira, Qullaawa Maxaafa qaalunni qaale tirriro xawe leella hoogara woy soꞌro ikkitino hedo saꞌara dandiitanno.

• Mittu qaali woy mitte yaatto tiro eo eonsa garinni babbaxxitara dandiitanno.

Qullaawa Maxaafa tiranno manchi umo borreessini qaalira noo yaatto noo gedeenni tire, mito bayicho sokka garunni sayisara dandaanno; ikkollana hatto assinanni woyite lowo geeshsha qoropha hasiissanno.

Hanni qaalunni qaale tira soꞌro ikkitino sokka sayissara dandiitannota leellishannoha boode lawishsha laꞌno:

• Qullaawu Maxaafi giddo addu goxichonna reyo kulate ‘goxa’ yaanno qaale horoonsiꞌnoonni. (Maatewoosi 28:13; Soqqamaasinete Looso 7:60, lekkaalliidi qaagishsha) Konne qaale reyo kulate horoonsiꞌnoonniha ikkiro, Qullaawa Maxaafa tirtannori xaa yannara nabbawanno manchi gurchaawannokki gede ‘reyotenni goxa’ yite tirtara dandiitanno.—1 Qorontoosi 7:39; 1 Teselonqe 4:13; 2 Pheexiroosi 3:4.

• Soqqamaasinchu Pheexiroosi umi sokkasira noo gedeenni tirriro, “surreꞌne hallo qodhe” yitanno tiro afidhino yaatto horoonsiꞌrino. (1 Pheexiroosi 1:13) Tini yaatto mitto looso loonsanni woyite loosate injaara yine uddano ale qolle saaqiꞌra leellishshannote. Ikkollana rooru afiira tenne yaatto noo gedeenni tirriro yinanni heeꞌnoonniri dileellanno. Hakko daafira tenne yaatto “surreꞌne qixxeessidhine loosoho qodhitine kaꞌe” yine tirriro sokka roore xabbe leeltanno.

• Rooma 12:11 noo gedeenni tirriro ‘ayyaanunni hufa’ yitanno tiro afidhinota Girikete yaatto horoonsiꞌnoonni. Tini yaatto Sidaamu Afiinni yinara hasiꞌnoonni sokka garunni disayissanno; hakko daafira tenne Qullaawu Maxaafi tirora “ayyaanunni huffi yitine iibbe” yine tirroonni.

• 

  Yesuusi egennantinote Ilaalu Sibkatesi yannara coyiꞌrinota mitte yaatto duucha woyite, “Ayyaanunni buxxinori baꞌraadhinoreeti” yine tirranni. (Maatewoosi 5:3, Sidaamu Afiinni Qixxeessinoonniha Qullaawa Maxaafa) Ikkollana duuchu afiinni tenne yaatto noo gedeenni tirriro yinanni heeꞌnoonniri xawe dileellanno. Isinni tenne yaatto mitu qaalinni noo gedeenni tirriro, “ayyaanunni buxxinori” yinoonni manni surrete dhibbi noonsaha woy jawaatoota woy mitte giddore ikkinokkiha lawara dandaanno. Ikkollana Yesuusi tenne yaatto horoonsiꞌrinohu mannu hagiirraamma ikkanno gede hasiisannonsahu qaru coyi maalaamittete hasattonsa wonshiꞌra ikkikkinni Maganu biddishshi hasiisannonsata wodancha ikkitinota rosiisateeti. (Luqaasi 6:20) Hakko daafira, tenne yaatto “ayyaanaamittete coye goodhinori” woy “Maganu hasiisannonsata huwattinori” yee tira umo borreessini woyite yinara hasiꞌnoonnire garunni sayissanno.—Maatewoosi 5:3; Ze Niwu Testamenti Ini Modeerin Ingilishi.

• “Hinaaso” yitanno tiro afiꞌrinoha Girikete qaale duucha bayicho, mittu manchi muli jaalisi ammanama xeinore assannosi woyite giiramanno gara kulate woy wolootu afidhino coyira hinaasa xawisate horoonsiꞌnoonni. (Soqqamaasinete Looso 5:17; Rooma 13:13) Ikkollana konne Girikete qaale danchare kulateno horoonsiꞌnoonni. Lawishshaho Yesuusiranna wole ammanantino soqqamaanora Maganohonna iso magansiꞌrate noonsa “laala” woy “diinaggaawa” xawisateno horoonsiꞌnoonni.—Yohaannisi 2:17; 2 Qorontoosi 9:2.

• 

  Maatewoosi 6:17 noohu, “alba” yine tirroonnihu Girikete qaali eo eosi garinni addi addi tiro afiꞌrino. Konne qaale eo eosi garinni “dana”, “aana” yine woy wolu garinni tira dandiinanni.—Maatewoosi 16:3; Soqqamaasinete Looso 17:16.

Hakko daafira, Qullaawa Maxaafa tirate yaa umo Qullaawa Maxaafa borreessini afiira nooha mitto qaale, dayiwa baalawa mittu garinni tirate yaa diꞌꞌikkino. Tiranno manchi Qullaawa Maxaafa umo borreessini qaalira noo hedo garunni xawissanno qaalla dooranno woyite xiinxalla ikka hasiissannosi. Qoleno coyi fooliishshuwa afuu jirte ledo sumuu yaanno garinni kalaqe, nabbawate injaanno garinni wora hasiissanno.

Wole widoonni kayinni, deerra saꞌne Qullaawa Borro banxi gede assine tirrannikki gede qoropha hasiissanno. Tiranno manchi, Qullaawa Maxaafa isira lawinosi garinni tirannoha ikkiro, sokka soorrantara dandiitanno. Hiittoonni? Tiranno manchi hundi borro amaddino sokka tenne ikkitukkinni digattino yee umisi hedo ledara woy hundi borrora tittirre kulloonnita hasiissanno hedo fushshe hoolara dandaanno. Konni garinni qixxeessinoonni tiro nabbawate shottara dandiitanno; ikkollana togo assine hasiꞌni gede tira nabbawanno manchi Qullaawu Maxaafita gara ikkitino sokka huwatannokki gede guficho ikkitara dandiitanno.

Mitootu ammaꞌnonsa rosi ledo sumuu yaanno garinni tirate yite Qullaawu Maxaafi sokka wirtanno. Lawishshaho Maatewoosi 7:13, “Baote widira massanno waalchi halaꞌladoho” yitanno. Mitootu “bao” yine tira hasiissannoha Girikete qaale “sioole” yite tirtino; insa hakko garinni tirtinohu ammaꞌnonsa rosi ledo sumuu yaara hasidhe ikkara dandaanno.

Qoleno Qullaawa Maxaafa tiranno manchi, Qullaawa Maxaafa borreessinoonnihu, baatto loosidhe galtinori, allaalaasine, qulxuꞌme woshshaaxxitannorinna wolu togoo manni barru baala horoonsiꞌranno qaallanni ikkinota heda hasiissannosi. (Nehimiya 8:8, 12; Soqqamaasinete Looso 4:13) Hakko daafira, mitte Qullaawu Maxaafi tiro danchate yinannihu, budinsa woy heeshshonsa gari ikkihano ikkiro suwashshu wodani noonsa manni giddosi noo sokka huwata dandaannoha ikkirooti. Konnira rooru manni afinokkita wosincho qaalla horoonsiꞌrantenni leeltannota, rosantinotanna huwatate qarrissannokki yaatto horoonsiꞌra woyyitanno.

Yihowa yinannihu Maganu suꞌmi angatenni borreessinoonnite hundite Qullaawu Maxaafi borrora nooha ikkirono, batinyu Qullaawa Maxaafa tiranno manni, haafa yee suꞌmasi Qullaawu Maxaafi tironsa giddonni fushshe hoolino. Batinye tirora Maganu suꞌma “Mooticha” yinannihu suusu suꞌminni riqimboonni; mite tirora isinni Maganoho suꞌmu noosinta anfannikki gede assinoonni. Lawishshaho, mite tirora Yohaannisi 17:6, 26 noota Yesuusi assiꞌrino huuccatto, “Oottoe mannira ate ewelumma egensiisoommo” hattono “Ate egentanno gede assoommo” yine tirroonni. Ikkollana Yesuusi assiꞌrino huuccatto garunni tirriro togo yitanno: “Oottoe mannira suꞌmakki egensiisoommo” hattono “Suꞌmakki egensiisoommonsa.”

Umo Ingilizete Afiinni qixxeessinoonnite Haaro Alame Tirora bitimaho togo yitanno hedo no: “Qullaawa Maxaafa tirroommohu ninkera lawinonke garinni diꞌꞌikkino. Xaa yannara coyiꞌnannihu Ingilizete afii fajjinke geeshsha hattono noo gedeenni tirreenna hedo soorrantannokkiha ikkiro, dandaaminke deerrinni noo gedeenni tirate sharrammoommo.” Hakko daafira, Qullaawu Maxaafi Haaro Alame Tiro Komite, umo Qullaawa Borro borreessinoonni qaalira noo sokka garunni sayissanno qaallanna yaatto horoonsidhino; ikkirono nabbawate gurcheessitannota woy sokka dahaabbanno gede assitanno qaalla horoonsiꞌra qorophite quwa saꞌꞌa hoogate sharrantino. Konnira tini Qullaawu Maxaafi tiro nabbawate baxissannote; qoleno nabbawanno manchi qullaawu ayyaaninni borreessinoonni sokka garunni saꞌinota woꞌmunni woꞌma addaxxa dandaanno.—1 Teselonqe 2:13.