WEDELLOOTU XAꞌMITANNO XAꞌMO
Huuccatto Assiꞌra Hasiissannoehu Mayiraati?
Mitte xiinxallo buuxissino garinni, Ameerikaho 80 anga ikkitanno qeedhonna seenni huuccatto assiꞌranno; kayi kuri giddo huuccatto barru baala assidhannori daratella ikkitanno. Kuri giddo mitootu, ‘Isi huuccatto mulla beedho afiꞌrate yine calla assinannireetinso macciishshannohu no?’ yite hedansa digattanno.
Huuccatto maati?
Huuccatto baalankare kalaqino Kalaqaanchi ledo hasaambanni hasaawaati. Hanni hatto yaa mayyaatero hedi! Yihowa duuchante doogonni manna lowo geeshsha rooranno; ikkirono, “isi ninkewiinni dixeertiꞌrino.” (Soqqamaasinete Looso 17:27) Isinni Qullaawu Maxaafi giddo togo yaannohu dhagge ikkanno koyishshi no: “Maganunniwa shiqqi yiiyye; isino kiꞌnewa shiqqi yaanno.”—Yaiqoobi 4:8.
Maganunniwa shiqqi yaa dandaattohu hiittoonniiti?
Mitte doogo huuccattote—tini ati Magano hasaawisatto doogooti.
Wole doogo Qullaawa Maxaafa xiinxallate—tini Maganu ate hasaawisanno doogooti.
Konni garinni ati Magano hasaawisattohanna isino hasaawisannahe macciishshattoha ikkiro, isi ledo muli jaaloomi heeꞌrannohe.
“Woꞌmunkura Aliidi Magani Yihowa ledo hasaawa, mannu oosora lowo ayirrinyeeti.”—Jeremii.
“Giddoꞌyata fushshe huuccattotenni Yihowara hasaaphaꞌya, isiwa albinni roore gamba yeemma gede assitannoe.”—Miranda.
Maganu addinta macciishshanno?
Magano ammanattohanna iso huucciꞌrattoha ikkirono, isi huuccattokki macciishshannota ammana qarra ikkitahera dandiitanno. Ikkollana, Qullaawu Maxaafi Yihowa ‘huuccatto macciishshannoha’ ikkinota kulanno. (Faarso 65:2) Isinni Maganu Qaali, “Qarrisannoꞌnere baala isi aana tuqqe” yee amaalannonke. Mayira? “[Korkaatuno] kiꞌnere malannohu isooti.”—1 Pheexiroosi 5:7.
Hanni tenne hedi: Muli jaallakki ledo ganyite hasaawate woꞌnaalatto? Maganu ledono hatto hasaawa dandaatto. Iso huuccattotenni woꞌmanka woyite hasaawisi; qoleno hasaawisattosi woyite suꞌmasi gani. (Faarso 86:5-7; 88:9) Ee, Qullaawu Maxaafi “Agurtinikkinni huuccidhe!” yaannonke.—1 Teselonqe 5:17.
“Huuccatto gordoho noo Anniꞌya ledo hasaaweemmo hasaawaati. Huuccatto assiꞌreemmo woyite wodaniꞌyara noore gudise hasaapheemmosi.”—Moyisis.
“Amaꞌya ledo woy muli jaaliꞌya ledo hasaaweemmahu gede, Yihowa ledo baalankare gudise fane hasaaweemma.”—Kaareni.
Mayi daafira huucciꞌra dandeemmo?
Qullaawu Maxaafi togo yaanno: “Baalunku coyira galaxxitinanninna huuccidhinanni hasidhinoonni coye Maganoho kuꞌle.”—Filiphisiyusi Sokka 4:6.
Hatto yaa qarra ikkinohere Maganoho hasaapha dandaatto yaate? Ee! Isinni Qullaawu Maxaafi, “Isi irkisannohena, yaaddokki Maganu aana tugi” yaanno.—Faarso 55:22.
Hige huuccatto assiꞌratto woyite, Maganoho qarrakki calla kula hasiissannohe yaa diꞌꞌikkino. Chanteeli yinanni wedellitte togo yitino: “Yihowa kaaꞌlannoe gede calla huucciꞌreemmaha ikkiro, hatti jaaloomanke hakkeya diseekkitanno.” Leddeno, “Balanxe assinonkerira galaxxa hasiissannonke yee hedeemma; qoleno kulle galaxxa hasiissannonkeri lowori no” yitino.
Hanni tenne hedi: Heeshshokki giddo Yihowa galaxxatto gede assannoheri mayi mayi noohe? Techo Yihowa galaxxatto gede assannoheha sase coye heda dandaattokka?
“Shiimu coyi nafa, lawishshaho biifadu awawi nafa, huuccattotenni Yihowa galaxxineemmo gede kakkayisankera dandaanno.”—Anita.
“Yihowa kalaqinori giddo dhagge ikkannohere woy lowo geeshsha baxattoha Qullaawu Maxaafi qummeeshsha hiinci; hakkiinni hakko coyi daafira Yihowa galaxxi.”—Biriyani.