Yihowa Farciꞌraasine Wongeellu Loosira Qajeeltannohu Hiittoonniiti?

Yihowa Farciꞌraasinera Kiristaanu heeshsho daafira woꞌmanka woyite qajeelsha uyinanninsa; tenne giddo mittu wongeellu loosooti. Wongeellu loosi woy Kiristaanu soqqansho Yesuusi haꞌrunsaanosira loossara uyino loosooti; hakkuno Maganu Gashshootiha dancha duduwo sabbakatenna rosiisate. (Maatewoosi 24:14; 28:19, 20) Qajeelleemmohu lamalate kiiro assiꞌneemmo gambooshshiwanna diru dirunku assiꞌneemmohu qoqqowunna woradu gambooshshiwaati. Songote woy dirijjitete giddo loosu qeechi noonsarira kayinni Qullaawu Maxaafi aana xintaminoha addi qajeelsha uyinanni.

Konni birxichira

Yihowa Farciꞌraasinera hiittoo qajeelsha uyinanni?

Songote gambooshshe. Lamalate kiiro lame hinge, Magano magansiꞌneemmo darga yaano Gambooshshu Addaraashera gamba yineemmo. Roore anga, mitto gambooshshe lamalate mereero assiꞌneemmo; layinkiha kayinni lamalate jeefora assiꞌneemmo. Lamenka gambooshshe aye manchino daa dandaanno; gambooshshinkewa aye manchono woxe fushshi yine dimurrinsanni.

Lamalate mereeri gambooshshe. Nabbawate dandoonke, mannu ledo hasaawate dandoonke, dagate albaanni coyiꞌrate dandoonke, hattono sabbakatenna rosiisate dandoonke woyyeessiꞌneemmo gara qajeelleemmo. Qajeelsha lallawotenni, hasaawunni, loonse leellinshanni ikkitonninna viidiyotenni shiqinshanni. Kuni qajeelshi mannaho Qullaawu Maxaafi sokka kulleemmo woyiteno ikko hasatto noonsarira Qullaawa Maxaafa rosiinseemmo woyite roore guma laalleemmo gede kaaꞌlannonke. Qajeelshu gambooshshenke daanno mannira baalaho kaaꞌlannoho. Roorenkanni, songote gambooshshinke Maganoho noonke ammana kaajjitanno gede kaaꞌlannonke; qoleno Maganohonna ammanate roduuwinkera noonke baxilli lexxanno gede assanno.
Lamalate jeefo gambooshshe. Kuni gambooshshi lame gafa afiꞌrino; umo, roorenkanni Yihowa Farciꞌraasine ikkinokki manna hende qixxeessinoonnita Qullaawu Maxaafi lallawo macciishshineemmo. Layinki gafira, Agarooshshu Shaea xiinxallote ittimera fulino birxicho xaꞌmotenninna dawarotenni hasaambanni. Tini birxichuwa, addi addiha Qullaawu Maxaafi rosonna soqqanshonkeranna heeshshonkera kaaꞌlitannota xintu seerubba xawissanno.

Woradunna qoqqowu gambooshshe. Diru dirunku sase jajjabba gambooshshe assiꞌneemmo; konni mittu mittunku gambooshshira batinye songuwa xaaddanno. Konni hagiirsiisanno gambooshshi yannara, Qullaawu Maxaafi aana xintantinota mitte cuꞌmo xawinsanni; qoleno lallawo, loonse leellinshanni ikkito, qaalu xaꞌmonna viidiyubba heedhanno. Songote gambooshshinkente gede, woradunna qoqqowu gambooshshinkeno Qullaawu Maxaafi egennonke lexxitanno gedenna wongeellu loosira roore worbuulle ikkineemmo gede kaaꞌlannonke. Togoo gambooshsheno ayino daye beeqqa dandaanno; qoleno aye manchono woxe fushshi yine dimurrinsanni.

Yihowa Farciꞌraasineta Qullaawu Maxaafi Rosu Minna

Mite Yihowa Farciꞌraasine roore qajeelsha adhitara yine, addi addihu Qullaawu Maxaafi rosi minira koyinsanni. Kuri rosu minna hiikkuriiti? Mixonsana maati? Tenne rosu minnara mageeshshi yanna ronsanni? Eꞌe rosa dandiitannori ayeooti?

Suwisaanote Soqqansho Rosi Mine

Mixo: Suwisaanoteb yinannire woꞌma yanna soqqamaasine sabbakatenna rosiisate loosira roore gumaamma ikkitanno gede qajeelsate. Tenne korsera rosaanote ledo hasaambanni hasaawi, loonse leellinshanni ikkito, lallawonna workshooppe heedhanno.
Keeshshanno yanna: Lee barra.
Beeqqaasine: Suwisaano ikkitunku mitto diro woꞌminonsare beeqqitanno gede koyinsanni. Suwisaano ikkite lowo diro soqqantinorinna saihu ontu diri giddo tenne korse adhitinokkirino beeqqitanno gede wirro koyinsanni.

Maganu Mangiste Sawaakooti Rosi Mine

Mixo: Woꞌnaalshu noonsarira woꞌma yanna soqqamaanora addi qajeelsha aate. Rosaano sabbakatenna rosiisate dandoonsa roore woyyeessidhanno; hattono Qullaawu Maxaafi roso unte xiinxallitanno. Batinye rosaano maassantuhu gedensaanni sabbakkannori roore hasiissannowa hadhe soqqantanno gede sonkanni.
Keeshshanno yanna: Lame agana.
Beeqqaasine: Suwisaano konni rosi minira fushshinoonni guunte wonshitannohanna sonkinsawa baalankawa haꞌre soqqamate injaannonsaha ikkiro, forme wonsha dandiitanno.

Songote Cimeeyye Rosi Mine

Mixo: Cimeeyyec songote giddo uyinoonninsa looso lawishshaho rosiisatenna allaalshu looso seekkite loossanno gedenna Maganohonna ammanate roduuwinsara noonsa baxilli lexxanno gede kaaꞌlate.—1 Pheexiroosi 5:2, 3.
Keeshshanno yanna: Onte barra.
Beeqqaasine: Haarote shoomantino cimeeyyenna saihu ontu diri giddo konni rosi mine rossinokki cimeeyye eꞌe rossara koyinsanni.

Woradu Aliidi Laꞌꞌaanonna Minaamuwinsa Rosi Mine

Mixo: Woradu aliidi laꞌꞌaanod yinannire bayichunni bayicho hadhanni soqqantannore loosonsa roore woyyino garinni loossanno gede qajeelsate. (1 Ximootewoosi 5:17) Tini korse kuri cimeeyyenna minaamuwinsa Qullaawa Borro yitannore roore huwattanno gede kaaꞌlitanno.
Keeshshanno yanna: Mitto agana.
Beeqqaasine: Haarote shoomantinori woradu aliidi laꞌꞌaanonna minaamuwinsa woradu looso hanaffuhunni mittu diri gedensaanni tenne korse adhitara koyinsanni. Hakkuyi gedensaanni, ontu diri woꞌmi kiiro wirro koyinsanninsa.

Mangistete Soqqansho Rosi Mine

Mixo: Cimeeyyenna songote soqqamaanoe songote loosonsa dancha gede assite loossanno gede, yannate ikkanni noore, haarote rosamanni dayinore, hattono hasiise noore hende qajeelsate. (2 Ximootewoosi 3:1) Tenne korse boodu diri sai kiiro uyinanni.
Keeshshanno yanna: Babbaxxitara dandiitanno; roore anga, mitto barra.
Beeqqaasine: Woradu aliidi laꞌꞌaano, cimeeyyenna songote soqqamaano.

Beeteelete Soqqansho Rosi Mine

Mixo: Beeteeletef soqqantannori loosinsara worbuulle ikkitanno gedenna Maganohonna mimmitoho noonsa baxilli lexxanno gede kaaꞌlate.
Keeshshanno yanna: Onte barranna darate.
Beeqqaasine: Haarote Beeteele eꞌinori tenne korse adha hasiissannonsa. Beeteelete lowo diro soqqantinorinna saihu ontu diri giddo konni rosi minira eꞌinokkiri wirro rossanno gede koyinsanni.

Agarooshshu Shaeha Giiliyaadi Qullaawu Maxaafi Rosi Mine

Mixo: Rosaano Maganu Qaale albinni roore huwattanno gedenna baxxanno gede hattono rossinore loosu aana hosiissanno gede kaaꞌlate. (1 Teselonqe 2:13) Giiliyaadi rosi mine rossannori ayyaanaamittetenni gikki yitino labballinna meenti, Yihowa dirijjiteranna alamete doyichora Qullaawa Maxaafa rosiisate loosinkera albinni roore lowo geeshsha kaaꞌlitannore ikkitanno. Konni rosi mine maassantannore qanchoho soqqantanno gede, woy daggino gobbara woy wole gobbara sinu biirora soqqantanno gede sonkanni.
Keeshshanno yanna: Onte agana.
Beeqqaasine: Sinu biiro konni rosi minira forme wonshitannore woꞌma yanna soqqamaano giddonni doortanno. Kuni rosu mini noohu Ameerikaho, Niwu Yoorkete Patersenira noohu Agarooshshu Shaehu Rosu Mereershiraati.

Agarooshshu Shaehu Giiliyaadi Qullaawu Maxaafi Rosi Mine rosiisaanchu Yerusaalamete qullaawu mini akeeka horoonsiꞌre rosiisanni no.

Sinu Biiro Komite Miillanna Minaamuwinsa Rosi Mine

Mixo: Sinu biirora loonsanni loosonna insa biiro hunda noo gobbara woy gobbuwara loonsanniha Yihowa Farciꞌraasineha ayyaanaamittete looso aleenni higge laꞌannonna towaattanno gede, Sinu Biiro Komiteg miilla qajeelsate.
Keeshshanno yanna: Lame agana.
Beeqqaasine: Yihowa Farciꞌraasineti Qara Biiro, mite Sinu Biiro Komite miillanna minaamuwansa tenne korse adhitara koyissanno; rosu mini noohu Niwu Yoorkete Paatersenira Agarooshshu Shaehu Rosu Mereershiraati.

Yihowa Farciꞌraasinera uyinanni qajeelshi mayi aana xintaminoho?

Yihowa Farciꞌraasinera uyinanni qajeelshira ayewoyiteno xinta ikkannohu Qullaawa Maxaafaati. Qullaawu Maxaafi Maganu ayyaani massaganna borreessinoonniha ikkinotanna Kiristaanu heeshsho baalantera taalle nookki amaale aannota ammanneemmo.—2 Ximootewoosi 3:16, 17.

Yihowa Farciꞌraasine qajeelshinsara woxe baaxxitanno?

Dibaaxxitanno. Korse uyinannihu callaati. Yihowa Farciꞌraasine loosonsa loossannohu mannu uminsa fajjonni fushshanno woxinniiti.—2 Qorontoosi 9:7.

a Qullaawa Maxaafanna Qullaawa Maxaafa xiinxallate kaaꞌlanno uduunnenke, lawishshaho viidiyubba jw.org webisayitenke aana afiꞌra dandiinanni.

b Suwisaanchoho yinannihu, aganu aganunku mannaho Qullaawu Maxaafi sokka kulanni bande kulloonni saate soqqamate mixo noosihonna dancha lawishsha ikkannoho cuuamino Farciꞌraasinchooti.

c Cimeeyye Qullaawa Borro horoonsidhe rosiissannoreetinna Yihowa manna jawaachishshe hattono kaaꞌlite towaattannoreeti gikki yitino Kiristaanaati; insa loosonsa loossannohu woxe baanteenna diꞌꞌikkino.

d Woradu aliidi laꞌꞌaancho yaa, lamalate kiiro soqqamara gaammoonnisi woradi giddo noota addi addi songo towaatanni haꞌrannoho woꞌma yanna soqqamaanchooti. Isi Qullaawu Maxaafi aana xintantino lallawo shiqishatenninna ledonsa soqqansho fulatenni ammanate roduuwasi jawaachishanno.

e Songote soqqamaano roduuwansa kaaꞌlate, hasiisannoha lowo looso loossanno. Konni garinni insa cimeeyye songo rosiisatenna towaatate roore yanna afidhanno gede kaaꞌlitanno.

f Beeteele yaa Yihowa Farciꞌraasineta sinu biiro woshshinanni suꞌmaati. Hakko soqqantannori woꞌma yanna soqqamaano, sinu biironsa hunda loonsanniha Yihowa Farciꞌraasine looso kaaꞌlitanno.

g Sasu woy hakkiinni saꞌannori ayyaanaamittetenni ikkadda ikkitino labballi Sinu Biiro Komite ikkite soqqantanno.

Qajeelshu Yihowa Farciꞌraasinera kaaꞌlinonsahu ma garinniiti?

“Manna ille qase laꞌꞌa waajjeemma daafira, egennoommakki manni ledo Qullaawu Maxaafi daafira hasaawa waajjeemma. Lamalate mereeri gambooshshiwa adheemma qajeelshi kayinni, worba ikkeemma gedenna rosiisate dandooꞌyano woyyeessiꞌreemma gede kaaꞌlinoe. Qoleno xa songote giddono ikko looseemmawa mannu ledo hasaawate dandooꞌya lexxitino.”—Nataasha, Ameerika.
“Maganu Mangiste Sawaakooti Rosi Mine rosaꞌya Yihowa akatta lawishshaho baxillu, cincanna shaqqillu heeꞌrannoe gede kaaꞌlitinoe. Hakko daafira, xa woyyaawoommo Kiristaancho, jaalanna olliicho ikkoommoha lawaae. Qoleno rosu mini Qullaawa Maxaafa ume xiinxalla dandeemmo garanna Maganu Qaale baxisanno garinni xawisa dandeemmo gara rosiisinoe.”—Isteefen, Nayijeeriya.
“Songote Cimeeyye Rosi Mini worba cimeessa ikkate hasiisannoe akata yaano umo heeshshi assate akata lossiꞌreemmo gede kaaꞌlinoe. Shiqinshoonni lallawo Yesuusi faale haꞌra hasiissannoeta albinni roore huwateemmo gede kaaꞌlitinoe.”—Luuka, Ixaaliya.
“Mangistete Soqqansho Rosi Mini ruxxi yinikki shinqanniha, shaqqadonna faasiiqa ikka hasiissannoeta rosiisinoe. Qoleno mannaho mitore asseemmo woyite, mulla assa hasiissinoe daafira calla ikkikkinni baxillunni assa hasiissannoeta rosoommo.”—Saamueeli, Ingilize.
“Giiliyaadi rosi mini ninkeneeto Maganu Qaali hincilaallonni layiꞌneemmo gede kaaꞌlinonke. (Yaiqoobi 1:22-25) Konnira akatinke giddonna Yihowara soqqammeemmo soqqanshora maa woyyeessiꞌra hasiissannonkero bande afa dandiinoommo. Qoleno uminkenni roorsine wolootu daafira heda hasiissannonketanna assineemmorenna coyiꞌneemmore baala baxillunni assa hasiissannonketa ronsoommo.”—Elnaataaninna Pirinses, Filippiinsi.