Ammaꞌnote Gedensi Hiittooha Ikkakka?—Qullaawu Maxaafi Kulannore

Ammaꞌno horo giwissinohe woy caacceessitinohe? Ammaꞌno mito mannanna dagooma mito geeshsha kaaꞌlitinoha ikkirono, lowo gawajjono iillishshino. Insaykilopiidiya of Rilijin end Woor yinanni maxaafi togo yaanno: “Alamete aana kainohu jajjabbu oli giddo mitoho kora ikkitinoti ammaꞌnote.” Ammaꞌnote massagaano duucha woyte ammaꞌno horoonsidhannohu Magano magaꞌnate ikkikkinni poletiku coye halashshateeti. Wole ammaꞌnote massagaano qolte, mereeronsa assinoonni foorrera woy woxu ledo amadantino jaddora bushsha gante saꞌino.

Ammaꞌnote ikkito giwissinoheha ikkiro, Maganu tenne daafira maa hedinokka yite hedattoha ikkara dandaanno. Qullaawu Maxaafi loosinsanni kainohunni Maganu rooriidi ammaꞌno giwannota kulanno. Qullaawu Maxaafi Maganu albillitte ammaꞌnote aana may qaafo adhannorono kulanno. Qoleno, Maganu muli yannara kalqe woꞌmate noo ammaꞌno aana assannoha konni albaanni horo ikke egenninokki coye masalse kulanno.

Qullaawu Maxaafi ammaꞌnote gedensi daafira maa kulanno?

Masaalo: Qullaawu Maxaafihu Ajuujate maxaafi, Batiꞌra Baabiloone yinanni mancho daafira kulanno; tini mancho foortannote. Ise duumu xiille moychi aana ofolte no. Ikkollana, gedensoonni hakku moychi ise aana kae lubbose hunanno.—Yohaannisi Ajuuja 17:3, 5, 16

Tiro: Tini foora mancho yaano Batiꞌra Baabiloone kaphu ammaꞌno baalate (Maganu hagiidhannokki ammaꞌno baalantera) lawishshaho.a Duumu xiille moychi qole Halantino Gashshootubbara (UN) lawishshaho.b Hatti foora mancho duumu xiille moychi aana ofollase, kaphu ammaꞌno poletiku gashshootubba aana hekko gashshate woy murrisate woꞌnaaltannota leellishshanno. Moychu hattee foora mancho shaasi qolte, Halantino Gashshootubba alamennite kaphu ammaꞌno baalate aana kaꞌannotanna woꞌmunni woꞌma huntannota leellishshanno. Ee, kuni ikke egenninokki coy ikkanno yannara, kaphu ammaꞌno coꞌo yite baꞌanno.

Kaphu ammaꞌno baꞌannohu hiittoonniiti?

Masaalo: “Laittoti tonne buuddanna moyichu, foortanno mancho gibbannose; afidhinore baala mulqite mullicho agurtannose . . . giirateno tuggannose. Maganu hedinori woꞌma geeshsha, mitteenni sumuu yite gashshootunnita wolqansa moyichoho uyitanno gede tenne hedo wodaninsa giddo [gashshaanote wodani giddo] worinohu Maganoho. . . . Mitto barra, reyo, dadillunna hude amaddannose. Giirano ittannose. Qorichishannosehu Mootichu [“Yihowa,”c Haaro Alame Tiro] Maganu wolqaataamoho.”—Yohaannisi Ajuuja 17:16, 17; 18:8.

Tiro: Maganu “tenne hedo” yaano isi hedo alamete gashshaasine wodanira woranno. Qoleno “gashshootunnita wolqansa” woy biilloonyensa Halantino Gashshootubba Uurrinshara uytanno gede kakkaysanno. Hakkiinni haarote biilloonye lendoonniti Halantino Gashshootubba Uurrinsha alame woꞌmate noota kaphu ammaꞌno huntanno. Tini maalaꞌlissanno ikkito hedeweelcho, boode yanna giddo ikkitanno daafira “mitto barra” ikkitinohu gedeeti; hakko daafira, rooru mannira coy dhagge ikkannonsa.—Yohaannisi Ajuuja 18:21.

Kaphu ammaꞌno baꞌannohu mayraati?

Masaalo: “Cubbise kuuso gordu geeshsha iillitinona, Maganuno bunshese dihawino.”—Yohaannisi Ajuuja 18:5.

Tiro: Kaphu ammaꞌno lowo xibbe diro, biso shorodhi assannoha lowoha busha coye assitanni keeshshitino. Maganu ise aana yoo yaanno gede assanno “cubbise” giddo gamu aane nooho:

Poletiku coyra anga wodha. Yesuusi Kiristoosi haꞌrunsaanosi poletiku coyra eꞌannokki gede, hatteentenni Maganu Gashshoote hexxitanno gede rosiisino; kuni Gashshooti uullate gashshoote baala hunannoho gordu gashshooteeti.d (Daanieeli 2:44; Maatewoosi 6:9, 10; Yohaannisi 6:15; 18:36) Kaphu ammaꞌno kay kawiinni baxxinore assitino. Ise Maganoho ammanama agurte poletiku coy giddo sarraaqantino daafira, Ajuujate maxaafi Batiꞌra Baabiloone “foortino” yee loosose xawo fushshanno; “lowo foorrenni egennantino mancho” yaanno suꞌmino isera malinoho.—Yohaannisi Ajuuja 17:1, 2; Yaaqoobi 4:4.



Finqille. Kaphu ammaꞌno “baattote aana shinoonni manni baalu [mundeera]” xaꞌmantannota kulloonni. (Yohaannisi Ajuuja 18:24) Batinye ammaꞌno mannansa keere baxanno gede rosiissinokkitano agurranna olanna shittimma irkissino, wole agurina kakkayissino.



Hafuurre. Kaphu ammaꞌno “umose laꞌmisidhinonna qawaaxxisidhino.” (Yohaannisi Ajuuja 17:4; 18:7) Batinye ammaꞌno noonsa biilloonyenna macca manni ledo noonsa aante horoonsidhe bikka saꞌino jiro duuꞌnitino. Togoo hafuurre Maganu dibaxanno.—Tito 1:7.



Kapho. Kaphu ammaꞌno Qullaawu Maxaafi halaali ledo sumuu yaannokki rosonna assoote halashshitanno.e Manna soꞌrisiisannohunna Maganu suꞌma hunannohu batinyu rosira buicho kaphu ammaꞌno ikkitino daafira, Qullaawu Maxaafi ise “baattote batte baalate ama” yaanno.—Yohaannisi Ajuuja 17:5; 18:23.

Baalanti ammaꞌno baꞌanno yaate?

Deeꞌni. Ajuujate maxaafi giddo, alamete daga baalate giddonni fulinohu ‘lowo manni’ daafira borreessinoonni. (Yohaannisi Ajuuja 7:9) Tenne lowo daga “waajjo uddano uddidhinori” yinoonni; hatto yaa, insa Maganoho ammanante seerisi garinni magansidhannosi yaate. Tini daga “lowo qarra” woy quuxxote qarra qeelte saꞌanno; hatti yanna kaphu ammaꞌnonna wole Maganu diinna baala baꞌanno yannaati. (Yohaannisi Ajuuja 7:13, 14; 19:11, 19-21) Waajjo uddano uddidhinoti lowo daga addu ammaꞌno haꞌrunsanno mannaati; hegerera kaajjite heedhannotino hattee ammaꞌnooti.f

Kaphu ammaꞌno baꞌannota afakki kaaꞌlitannohehu hiittoonniiti?

Ammaꞌno assitinoha busha coye baala Maganu baxannokkita afakki shesho uytannohe. Maganu suꞌma xonsiissannotinna mannaho qarra batissanno ammaꞌno baala muli yannara baꞌannota afootto daafira, albillittete yanna hexxotenni agadha dandaatto.

Qoleno Magano isi hagiidhanno garinni magansiꞌra dandiineemmota wodanchi. Qullaawu Maxaafi kulanno garinni, “halaalunni magansidhannori, Anna ayyaanunninna halaalunni magansidhanno; . . . korkaatuno Maganu hasiꞌrannohu hakko garinni magansiꞌrannosi mannaati.” (Yohaannisi 4:23) Isi konne manna togo yiino: “Mannaꞌya ballo, cubbisera karsantinannikki gede, qoomamase beeqqitinannikki gede, [Batiꞌra] Baabilooninni fulle!” (Yohaannisi Ajuuja 18:4, 5) Ee, Maganu mannu iso halaalunni magansiꞌranno gede koysanni no. (1 Ximootewoosi 2:3, 4) Isi koyishshasi adhanno mannira hegere heeshsho aansara qaale eino.—1 Yohaannisi 2:17.