Meentu Keere​—⁠Qullaawu Maxaafi Yaannore

“Shiima noomma waro, bayiru rodiiꞌya barru baala gananni waadannoe hattono xonannoe. Mine assiꞌrummahu gedensaanni, balloꞌya beebba assidhannoe. Iseranna balliꞌyara ani borojjichote gedeeti. Hakko daafira, aneneeto shaate duucha hige hedoomma.”—Madihu,a Hinde.

Alamenniti Fayyimmate Uurrinsha, “Meento gadadisanna beebba assiꞌra, alame woꞌmate rosantinota ikkitino” yitino. Tini uurrinsha yitanno gara ikkiro, sase meenti giddo mitte ganne gawajjinannise woy giddeessine seyantannise.

Ateno konni garinni miince egenninoonniheha ikkiro, haꞌrittawa baalawa miteekkine xonnannie, gannannie woy giddeessine bushiinshannie yite yaaddanni haꞌrattaha ikkara dandaanno. Meyata ikkootta daafira calla konni garinni miincannihe daafira, rooru manni ‘Meyati kaaꞌlitannori dino’ yee hedanno yite hedattaha ikkara dandaanno. Maganuna? Isi ‘Meentu kaaꞌlannori dino’ yee hedannoni?

Maganu meento ma garinni laꞌꞌanno?

Qummeeshsha: “Maganu . . . labbaahanna meyata asse kalaqinonsa.”—Kalaqama 1:27.

Tiro: Labbaahano meyatano kalaqinohu Maganoho. Maganu illera, labbaahuno meyatino ayirrinyu hasiisannonsareeti. Qoleno Maganu, minaanni galtesi gadadisara woy xissiisanno qaale coyiꞌre woy gane gawajjara ikkikkinni, ‘umisi gede asse baxasera’ hasiꞌranno. (Efesooni Sokka 5:33; Qolasiyaasi Sokka 3:19) Addanko, Maganu meentu keerenna hobbaate heeꞌrara hasiꞌranno.

“Qaaqqo noomma waro, fiixaꞌya ikkino manni giddeesse bushiishinoe. Tonaa lamalu diriti noomma waro, loosiisannoe manchi ‘Ane ledo goxa giwittaro, loosunni fushshe shorreemmohe!’ yee waajjishiishannoe. Jawa ikkummahu gedensaannino, minaanniꞌya, anniꞌyanna amaꞌya hattono olliiꞌya manni woffi assannoe. Gedensoonni kayinni, Kalaqaanchu Yihowab daafira rosumma. Isi meento ayirrisanno. Tini, isi baxannoetanna waagu noote yee hedannoeta wodancheemma gede assitinoe.”—Maariya, Arjentiina.

Wodanikki xisso hurtanno gede, mayi kaaꞌlahera dandaanno?

Qummeeshsha: “Mitu mitu jaali . . . fiixunni roore gamba yaanno.”—Lawishsha 18:24.

Tiro: Addu jaali irkisannohe. Dandiittaro, addaxxatta jaalira giddokkita fushshite hasaaphi.

“Giddeessine bushiinshoonnieta 20 diro woꞌma mittu manchirano dikuꞌloomma. Hakko daafira, dadillaamenna yaadaameette ikkoomma. Kayi gedensoonni, ikkummata ikke giddoꞌyata fushshe mannaho hasaaphummata, lowo duhi aaniꞌyanni hoꞌlinoe.”—Eliifi, Turkiye.

Qummeeshsha: “Kiꞌnere malannohu isootina, qarrisannoꞌnere baala [Maganu] aana tuqqe.”—1 Pheexiroosi 5:7.

Tiro: Huuccatto assiꞌratta woyite, Maganu macca wore macciishshannohe. (Faarso 55:22; 65:2) Atere malannohu iso ikkino daafira, waagu nooheta huwatatta gede kaaꞌlahera dandaanno.

“Yihowa daafira rosaꞌya, giddoꞌya nooti lowo mada hurtanno gede kaaꞌlitanni nooe. Xa wodaniꞌya hedo gudise huuccattotenni Maganoho hasaapha dandeemma. Isi giddiidiꞌya xisso xabbe leeltannosi Jaalaꞌyaati.”—Ana, Beliizi.

Maganu meento beebba assiꞌnannita hoolanno yanna daggakka?

Qummeeshsha: “Kaaliiqa, . . . baattote aana heeꞌrannohu ayino wole waajjishiishannokki gede, annanna ama afidhinokkiriranna qarraataammaho golamattonsa.”—Faarso 10:17, 18.

Tiro: Muli yannara, Maganu bunshenna miico baala hunanno; hatto yaano meyata gawajjanna beebba assiꞌrano gattanno yaate.

“Yihowa muli yannara, meentonna seenne beebba assiꞌnannita hoolannota afaꞌya, wodanaꞌya sissitinoe. Qoleno wodaniꞌya keere afiꞌranno gede assitinoe.”—Rooberta, Meksiko.

Qullaawu Maxaafi giddo hiittoo hexxo nooro, Qullaawu Maxaafi kulanno hexxo addaxxa dandaattahu mayiraatiro, hattono Yihowa Farciꞌraasine Qullaawa Maxaafa horoonsidhe kaaꞌlitannohehu hiittoonniitiro ledde afate, woxe baaxxittakki dange hasaawinseemmohe gede, tenne borro uyihe manchi widoonni xaꞌmiꞌra dandaatta.